ಆರ್.ಕೃಷ್ಣ ಮೈಸೂರು
ಪ್ರವಾಸಿತಾಣ, ಸಾಂಸ್ಕೃತಿಕ ನಗರಿಯನ್ನು ಭಿಕ್ಷುಕ ಮುಕ್ತಗೊಳಿಸಲು ಯೋಜನೆ ರೂಪಿಸಿದ್ದರೂ ನಿರಾಶ್ರಿತರಿಗೆ ಆಶ್ರಯ ನೀಡಲು ಕಾರ್ಯಾರಂಭ ಮಾತ್ರ ದೂರದ ಮಾತಾಗಿದೆ.
ಜನಸಂಖ್ಯೆಗೆ ಅನುಗುಣವಾಗಿ ನಗರದಲ್ಲಿ ಹೆಚ್ಚುವರಿ ನಾಲ್ಕು ನಿರಾಶ್ರಿತರ ಕೇಂದ್ರ ಸ್ಥಾಪಿಸುವಂತೆ ಹೈಕೋರ್ಟ್ ಆದೇಶ ನೀಡಿದ್ದರೂ ಕೇಂದ್ರಗಳ ಆರಂಭ ಈಗ ಕೇವಲ ಕಾಗದದಲ್ಲಿ ಇದೆ. ಇದು ಅಧಿಕಾರಿಗಳ ಇಚ್ಛಾಶಕ್ತಿಗೆ ಸಾಕ್ಷಿಯಾದಂತಾಗಿದೆ.
ಕುಟುಂಬದಿಂದ ದೂಡಲ್ಪಟ್ಟವರು, ಸೂರಿಲ್ಲದವರು, ರಸ್ತೆ ಬದಿಯಲ್ಲಿ ಜೀವನ ಕಳೆಯುವವರಿಗಾಗಿ ನಗರದಲ್ಲಿ ನಿರಾಶ್ರಿತ ಕೇಂದ್ರಗಳು ಕಾರ್ಯಾರಂಭ ಮಾಡಬೇಕು. ಅವರಿಗೆ ಕನಿಷ್ಠ ಮೂಲಸೌಲಭ್ಯ ಒದಗಿಸಬೇಕು ಎನ್ನುವ ಆದೇಶವಿದೆ.
ಹೈಕೋರ್ಟ್ ಆದೇಶದಂತೆ ಮೈಸೂರು ನಗರದಲ್ಲಿ ನಾಲ್ಕು ಹೆಚ್ಚುವರಿ ನಿರಾಶ್ರಿತರ ಕೇಂದ್ರಗಳನ್ನು ಸ್ಥಾಪಿಸುವುದಾಗಿ ಮಾಹಿತಿ ನೀಡಿದ್ದ ಪಾಲಿಕೆ ಅಧಿಕಾರಿಗಳು 3 ವರ್ಷ ಕಳೆದರೂ ನಿರಾಶ್ರಿತರ ಕೇಂದ್ರ ಸ್ಥಾಪಿಸುವ ಗೋಜಿಗೆ ಹೋಗಿಲ್ಲ.
ಹೀಗಾಗಿ ಕೇಂದ್ರ ಸ್ಥಾಪನೆಯ ಘೋಷಣೆ ಪತ್ರದಲ್ಲಿ ಮಾತ್ರ ಉಳಿದಂತೆ ಅಗಿದೆ. ಇದರಿಂದ ನಿರಾಶ್ರಿತರ ಬದುಕು ಅತಂತ್ರವಾಗಿ ರಸ್ತೆ ಬದಿಯೇ ಜೀವನ ನಡೆಸುವಂತಾಗಿದೆ.
ಪ್ರತಿ ಒಂದು ಲಕ್ಷ ಜನಸಂಖ್ಯೆಗೆ ಒಂದು ನಿರಾಶ್ರಿತರ ಕೇಂದ್ರ ಇರಬೇಕು ಎಂದು ಸುಪ್ರೀಂಕೋರ್ಟ್ 2019ರಲ್ಲಿ ಕಟ್ಟುನಿಟ್ಟಿನ ಆದೇಶ ನೀಡಿದೆ. ಆದರೆ, ಇದನ್ನು ಅನುಷ್ಠಾನಗೊಳಿಸದ ಕಡೆಗಳಲ್ಲಿ ಅನುಷ್ಠಾನ ಮಾಡುವಂತೆ ಹಲವು ಸ್ವಯಂಸೇವಾ ಸಂಸ್ಥೆಗಳು ಹೈಕೋರ್ಟ್ ಮೆಟ್ಟಿಲೇರಿ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ಸಲ್ಲಿಸಿದ್ದವು.
ಸುಪ್ರೀಂ ಕೋರ್ಟ್ ಆದೇಶಂತೆ ರಾಜ್ಯದ ಎಲ್ಲ ನಗರ ಮತ್ತು ಜಿಲ್ಲೆಗಳಲ್ಲಿ ಜನಸಂಖ್ಯೆಗೆ ಅನುಗುಣವಾಗಿ ನಿರಾಶ್ರಿತರ ಕೇಂದ್ರ ತೆರೆಯುವಂತೆ ಹೈಕೋರ್ಟ್ ಕೂಡ ರಾಜ್ಯ ಸರ್ಕಾರಕ್ಕೆ ನಿರ್ದೇಶನ ನೀಡಿತು.
ನ್ಯಾಯಾಲಯದ ಆದೇಶದಂತೆ ಮೈಸೂರು ನಗರದಲ್ಲಿಯೂ 9 ವಲಯ ಕಚೇರಿ ವ್ಯಾಪ್ತಿಯಲ್ಲಿ 9 ನಿರಾಶ್ರಿತರ ಕೇಂದ್ರ ಸ್ಥಾಪಿಸಬೇಕು ಎಂಬುದರ ಬಗ್ಗೆ ಚರ್ಚೆಯಾಯಿತು. ಈಗಾಗಲೇ ಒಂದು ನಿರಾಶ್ರಿತರ ಕೇಂದ್ರವಿದ್ದು, ಹೆಚ್ಚುವರಿಯಾಗಿ ನಾಲ್ಕು ಕೇಂದ್ರಗಳನ್ನು ಸ್ಥಾಪಿಸುವುದಾಗಿ ಲಿಖಿತ ಮಾಹಿತಿ ನೀಡಲಾಗಿತ್ತು. ಆದರೆ ಪಾಲಿಕೆ ಅಧಿಕಾರಿಗಳು ನಮ್ಮಲ್ಲಿ ಅಷ್ಟು ಜನ ನಿರಾಶ್ರಿತರು ಇಲ್ಲ ಎನ್ನುವ ಕಾರಣ ನೀಡಿ 2021ರಲ್ಲಿ ನಗರದ ನಾಲ್ಕು ಕಡೆ ನಿರಾಶ್ರಿತರ ಕೇಂದ್ರವನ್ನು ನಾಮ್ ಕೆ ವಾಸ್ತೆ ಸ್ಥಾಪಿಸಿ ನ್ಯಾಯಾಲಯದ ಕೆಂಗಣ್ಣಿನಿಂದ ಪಾರಾಗಿದ್ದಾರೆ. ಆದರೆ ಪಾಲಿಕೆ ಆರಂಭಿಸಿರುವ ನಿರಾಶ್ರಿತ ಕೇಂದ್ರಗಳಲ್ಲಿ ಯಾವುದೇ ಮೂಲಸೌಲಭ್ಯವೂ ಇಲ್ಲದೆ, ನಿರಾಶ್ರಿತರೂ ಇಲ್ಲದೆ ದಾಖಲೆಯಲ್ಲಿ ಮಾತ್ರ ಕೇಂದ್ರಗಳು ಉಳಿದಂತಾಗಿದೆ.
