ಮಾರ್ಗ ಬದಲಿಸಿದ ಮಂಗಳ ರೈಲು ಬರಲೇ ಇಲ್ಲ ; ಜಿಲ್ಲೆಯ ಜನಪ್ರತಿನಿಧಿಗಳ ವೈಫಲ್ಯ ; 3 ಜಿಲ್ಲೆಯ ಯಾತ್ರಾರ್ಥಿಗಳಿಗೆ ಅನನುಕೂಲ

ತಿಪಟೂರು: ತಿಪಟೂರು ಮಾರ್ಗವಾಗಿ ಕುಕ್ಕೆ ಸುಬ್ರಮಣ್ಯಕ್ಕೆ ಸಂಪರ್ಕ ಕಲ್ಪಿಸುವ ಮೂಲಕ ಮೂರು ಜಿಲ್ಲೆಗಳ ಯಾತ್ರಾರ್ಥಿಗಳಿಗೆ ಅನುಕೂಲವಾಗಿದ್ದ ಮಂಗಳ ರೈಲು ಮಾರ್ಗ ಬದಲಿಸಿ ನಾಲ್ಕು ವರ್ಷಗಳಾದರೂ, ಯಥಾಸ್ಥಿತಿ ಜಾರಿಗೆ ತರುವಲ್ಲಿ ಜನಪ್ರತಿನಿಧಿಗಳು ಇನ್ನೂ ಮನಸ್ಸು ಮಾಡಿಲ್ಲ.

ಮಂಗಳ ಎಕ್ಸ್‌ಪ್ರೆಸ್ ವಾರದಲ್ಲಿ 3ದಿನ ಸೋಮವಾರ-ಬುಧವಾರ-ಶುಕ್ರವಾರದಂದು ಯಶವಂತಪುರದಿಂದ ಹೊರಟು ತುಮಕೂರು, ತಿಪಟೂರು, ಅರಸೀಕೆರೆ, ಹಾಸನ, ಸಕಲೇಶಪುರ ಮಾರ್ಗವಾಗಿ ಸುಬ್ರಮಣ್ಯ ರೋಡ್ ಜಂಕ್ಷನಿನಲ್ಲಿ ನಿಲುಗುಡೆಯಾಗುತ್ತಿತ್ತು. ಅಲ್ಲಿಂದ ಮಂಗಳೂರು, ಕಾರವಾರ ತಲುಪುತ್ತಿತ್ತು.

ತುಮಕೂರು, ತಿಪಟೂರು, ಚಿಕ್ಕನಾಯಕನಹಳ್ಳಿ, ತುರುವೇಕೆರೆ, ಹುಳಿಯಾರು ಹಾಗೂ ಶಿವಮೊಗ್ಗ, ಭದ್ರಾವತಿ, ಕಡೂರು, ಬೀರೂರು, ಅಜ್ಜಂಪುರ, ಚನ್ನಗಿರಿ, ದಾವಣಗೆರೆ ಭಾಗದ ಯಾತ್ರಿಗಳು ಬಸ್ ಮೂಲಕ ತಿಪಟೂರು ಅಥವಾ ಅರಸೀಕೆರೆ ಜಂಕ್ಷನ್‌ನಲ್ಲಿ ರೈಲು ಹತ್ತುತ್ತಿದ್ದರು. ಇದರ ಜತೆಗೆ ಮಂಗಳೂರು ಭಾಗದ ಪ್ರತಿಷ್ಠಿತ ಶಾಲಾ-ಕಾಲೇಜುಗಳಿಗೆ ವಿದ್ಯಾಭ್ಯಾಸಕ್ಕೆ ತೆರಳಲು ಹಾಗೂ ಮಂಗಳೂರಿಗೆ ಪ್ರಯಾಣಿಸಲು ಈ ರೈಲು ಪ್ರಮುಖ ಸಂಪರ್ಕ ಕೊಂಡಿಯಾಗಿತ್ತು.

ರಸ್ತೆ ಸಾರಿಗೆಗೆ ಹೋಲಿಸಿದರೆ ರೈಲು ಪ್ರಯಾಣ ದರ ಕಡಿಮೆ. ಮಂಗಳ ರೈಲು ಮಾರ್ಗ ಬದಲಿಸಿರುವುದರಿಂದ ಪುಣ್ಯಕ್ಷೇತ್ರಕ್ಕೆ ತೆರಳುವವರಿಗೆ ಆರ್ಥಿಕ ಹೊರೆಬೀಳುತ್ತಿದೆ. ಈ ಬಗ್ಗೆ ಅಧಿಕಾರಿಗಳನ್ನು ಸಂಪರ್ಕಿಸಲು ವಿಜಯವಾಣಿ ಯತ್ನಿಸಿದಾಗ ಅಧಿಕಾರಿಗಳು ಉತ್ತರಿಸಲು ನಿರಾಕರಿಸಿದರು. ಇನ್ನಾದರೂ ಜಿಲ್ಲೆಯ ಜನಪ್ರತಿನಿಧಿಗಳು ಇತ್ತ ಗಮನಹರಿಸಬೇಕಿದೆ.

ಪ್ರಯಾಣದ ಅವಧಿ ಕಡಿಮೆ: ಯಶವಂತಪುರ-ಹಾಸನ ಜೋಡಿ ಮಾರ್ಗ ಉದ್ಘಾಟನೆಗೊಂಡ ಬಳಿಕ ಹಾಸನ ಮಾರ್ಗವಾಗಿ ಮಂಗಳೂರಿನ ಪ್ರಯಾಣದ ಅವಧಿ 4 ತಾಸು ಕಡಿಮೆಯಾಗಿದೆ. ಇದಲ್ಲದೆ ಮುಂಬೈನಿಂದ ಬರುವ ಚಾಲುಕ್ಯ ಎಕ್ಸ್‌ಪ್ರೆಸ್ ರೈಲಿನ ಸಮಯದಲ್ಲಿ ವ್ಯತ್ಯಯಕ್ಕೆ ಮಂಗಳ ರೈಲು ಕಾರಣವಾಗಿತ್ತು. ಹಾಗಾಗಿ, ರೈಲುಗಾಡಿಯ ಮಾರ್ಗ ಬದಲಾಯಿಸಲಾಯಿತು.