ಯುದ್ಧಭೂಮಿಯಿಂದ ಹೆತ್ತವರ ಮಡಿಲು ಸೇರಿದ ಶೀತಲ್ ; ಮೃತ ನವೀನ್ ನಾನೂ ಸಹಪಾಠಿಗಳು

ತಿಪಟೂರು : ಎಂಬಿಬಿಎಸ್ ವ್ಯಾಸಂಗಕ್ಕಾಗಿ ಯೂಕ್ರೇನ್‌ಗೆ ಹೋಗಿದ್ದ ನಗರದ ಬಿ.ಎಂ.ಆರ್.ಲೇಔಟ್ ಗುತ್ತಿಗೆದಾರ ರಾಮಚಂದ್ರ, ವೀಣಾ ದಂಪತಿ ಪುತ್ರಿ ಶೀತಲ್, ಯುದ್ಧಭೂಮಿಯಲ್ಲಿ ಕುಡಿಯಲು ನೀರಿಲ್ಲದೆ ಮಂಜು ಗಡ್ಡೆಯನ್ನೇ ಕರಗಿಸಿ ಕುಡಿಯುವ ಸ್ಥಿತಿಯಿಂದ ಪಾರಾಗಿ, ಹೆತ್ತವರ ಮಡಿಲು ಸೇರಿದ್ದಾಳೆ.

ಶೀತಲ್ ಪಿಯುಸಿ ನಂತರ ಎಂಬಿಬಿಎಸ್ ವಿದ್ಯಾಭ್ಯಾಸಕ್ಕಾಗಿ ಕಾರ್ಕೀವ್ ಯೂಕ್ರೇನ್ ಯೂನಿವರ್ಸಿಟಿಗೆ ದಾಖಲಾಗಿದ್ದಳು. ಒಟ್ಟು ನಾಲ್ಕೂವರೆ ವರ್ಷದ 12 ಸೆಮಿಸ್ಟರ್ ಪೈಕಿ 7 ಸೆಮಿಸ್ಟರ್ ಮುಗಿಸಿದ್ದ ಶೀತಲ್, ವೈದ್ಯಕೀಯ ಪದವಿಗೆ ಸನಿಹದಲ್ಲಿದ್ದಾಗ ಯುದ್ಧ ಯೂಕ್ರೇನ್ ತೊರೆಯುವಂತೆ ಮಾಡಿತು.

ಆಕಸ್ಮಿಕ ಗುಂಡು ತಗುಲಿ ಮೃತಪಟ್ಟ ನವೀನ್ ಮತ್ತು ನಾನು ಸಹಪಾಠಿಗಳು. ಒಂದೇ ತರಗತಿಯಲ್ಲಿ ಕಲಿಯುತ್ತಿದ್ದೆವು. ಆತ ಹಾಸ್ಟೆಲಿನಲ್ಲಿದ್ದರೆ, ನಾನು ಅಪಾರ್ಟ್‌ಮೆಂಟಿನಲ್ಲಿದ್ದೆ. ಆತ ಸ್ನೇಹಿತನೊಂದಿಗೆ ಆಹಾರ ಸಾಮಗ್ರಿ ಖರೀದಿಸಲು ಹೊರಗೆ ಹೊರಟಾಗ ಜತೆಯಲ್ಲಿದ್ದ ಸ್ನೇಹಿತನನ್ನು ಜರ್ಕಿನ್ ಹಾಕಿಕೊಂಡು ಬರುವಂತೆ ವಾಪಸ್ ಕಳಿಸಿದ್ದ. ಸಾಲಿನಲ್ಲಿ ನಿಂತಿದ್ದಾಗ ಆಕಸ್ಮಿಕವಾಗಿ ತಗುಲಿದ ಗುಂಡೇಟಿನಿಂದ ಮೃತನಾದ. ಯುದ್ಧ ಶುರುವಾಗುವ 15 ದಿನಗಳ ಮುಂಚೆಯೇ ಭಾರತ ಸರ್ಕಾರ ವಾಪಸ್ ಬನ್ನಿ ಎಂದು ಹೇಳಿತ್ತು. ಆದರೆ ಕಾಲೇಜು ಆಡಳಿತ ಮಂಡಳಿ ಮುಕ್ತಾಯದ ಹಂತದಲ್ಲಿರುವ ಸೆಮಿಸ್ಟರ್ ಮುಗಿಸಿ ಎಂದಾಗ ತಡವಾಗಿತ್ತು. ನಾವೇನೋ ಮುಂಚಿತವಾಗಿ ಕುಡಿಯುವ ನೀರು, ಆಹಾರ ಶೇಖರಿಸಿಟ್ಟುಕೊಂಡಿದ್ದೆವು. ಆದರೆ ಕೆಲವರು ಕುಡಿಯಲು ನೀರಿನ ಸಮಸ್ಯೆಗೆ ಮಂಜನ್ನು ಶೇಖರಿಸಿಟ್ಟುಕೊಂಡು ಬಳಸುವ ಅನಿವಾರ್ಯತೆ ಸೃಷ್ಟಿಯಾಗಿತ್ತು.

ಅಂತೂ ಫೆ.27ರಂದು ದೇಶಕ್ಕೆ ಹೊರಡಲು ತೀರ್ಮಾನಿಸಿ, ಸತತ 20 ಗಂಟೆಗಳ ರೈಲು ಪ್ರಯಾಣ, ನಂತರ ಖಾಸಗಿ ಟ್ಯಾಕ್ಸಿಯಲ್ಲಿ ನಾಲ್ಕಾರು ಗಂಟೆಗಳ ಪ್ರಯಾಣದ ನಂತರ ಪೋಲೆಂಡ್ ಗಡಿ ತಲುಪಿದಾಗ ಇನ್ನು ನಾವು ಸುರಕ್ಷಿತ ಎಂಬ ಭಾವನೆ ಮೂಡಿತ್ತು. ಅಲ್ಲಿನ ರಾಯಭಾರ ಕಚೇರಿಯವರು ನಮ್ಮನ್ನು ಸತ್ಕರಿಸಿದ್ದು ನೋಡಿದರೆ ನಿಜಕ್ಕೂ ನಾವು ಭಾರತೀಯರಾಗಿ ಹುಟ್ಟಿದ್ದು ಸಾರ್ಥಕ ಎನ್ನುವಂತಿತ್ತು ಎಂದು ಶೀತಲ್ ಹೇಳುವಾಗ ಆಕೆಯ ಕಣ್ಣಲ್ಲಿ ಯುದ್ಧಭೂಮಿಯ ಚಿತ್ರಣವಿತ್ತು. ಈಕೆಯ ಆಗಮನದ ಸುದ್ದಿ ತಿಳಿದು ಶಿಕ್ಷಣ ಸಚಿವ ಬಿ.ಸಿ.ನಾಗೇಶ್, ಶನಿವಾರ ರಾತ್ರಿ ಶೀತಲ್ ಮನೆಗೆ ಆಗಮಿಸಿ ಕುಶಲೋಪರಿ ವಿಚಾರಿಸಿದರು.