ಜಕ್ಕಲಮಡು ಜಲಾಶಯದ ಕಾಲುವೆಗೆ ಬುಧವಾರ ಭೇಟಿ ನೀಡಿದ ವಿವಿಧ ಇಲಾಖೆಗಳ ಅಧಿಕಾರಿಗಳ ತಂಡ ರಾಸಾಯನಿಕಯುಕ್ತ ನೀರಿನ ಮಾದರಿ ಸಂಗ್ರಹಿಸಿತು. ಚಿಕ್ಕಬಳ್ಳಾಪುರ ಮತ್ತು ದೊಡ್ಡಬಳ್ಳಾಪುರಕ್ಕೆ ಕುಡಿಯುವ ನೀರು ಪೂರೈಸುವ ಜಲಾಶಯದ ಕಾಲುವೆಗೆ ಕಿಡಿಗೇಡಿಗಳು ಟ್ಯಾಂಕರ್ನಲ್ಲಿ ವಿಷಯುಕ್ತ ರಾಸಾಯನಿಕ ತ್ಯಾಜ್ಯ ಸುರಿದಿದ್ದು ನೀರಿಗೆ ಸೇರ್ಪಡೆಯಾಗಿರುವ ಆತಂಕ ವ್ಯಕ್ತವಾಗಿದೆ. ಈ ಹಿನ್ನೆಲೆಯಲ್ಲಿ ದೂರುಗಳು ಹಾಗೂ ವಿಜಯವಾಣಿ ಡಿ.15ರಂದು ‘ಜಲಮೂಲಕ್ಕೆ ಕೈಗಾರಿಕೆ ವಿಷ’ ಶೀರ್ಷಿಕೆಯಲ್ಲಿ ವಿಶೇಷ ವರದಿ ಪ್ರಕಟಿಸಿತ್ತು. ವರದಿ ಹಾಗೂ ದೂರುಗಳಿಂದ ಎಚ್ಚೆತ್ತ ಪರಿಸರ, ಪೊಲೀಸ್, ಕಂದಾಯ, ಮೀನುಗಾರಿಕೆ, ಸಣ್ಣ ನೀರಾವರಿ, ಅರಣ್ಯ, ಕೈಗಾರಿಕೆ ಹಾಗೂ ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್ ಇಲಾಖೆಗಳ ಅಧಿಕಾರಿಗಳ ತಂಡ ಸ್ಥಳ ಪರಿಶೀಲಿಸಿ ಮಾದರಿ ಸಂಗ್ರಹಿಸಿತು.
