*ಟೊಮ್ಯಾಟೋ ಬೆಳೆಗಾರರ ಅಳಲು*
ಹವಾಮಾನ ವೈಪರೀತ್ಯದಿಂದ ಟೊಮ್ಯಾಟೋ ಬೆಳೆಗಳಿಗೆ ನಾನಾ ಸೋಂಕುಗಳು, ಕೀಟ ಸಮಸ್ಯೆಗಳು ಬಾಧಿಸಿದ್ದು ಗುಣಮಟ್ಟ ಕುಸಿತವು ನಷ್ಟಕ್ಕೆ ಪ್ರಮುಖ ಕಾರಣವಾಗಿದೆ.
ಕಳೆದ ಏಪ್ರಿಲ್ನಲ್ಲಿ ಹೈಬ್ರಿಡ್ ತಳಿಯನ್ನು ಹೆಚ್ಚಿನ ರೈತರು ನಾಟಿ ಮಾಡಿದ್ದು ಗಿಡಗಳು ಒಳ್ಳೆಯ ಬೆಳೆಯುವ ಹಂತಕ್ಕೆ ಬಂದಾಗ ವರುಣರಾಯನ ಆರ್ಭಟದ ಸಮಸ್ಯೆ ಕಾಡಿತು. ಚಿಕ್ಕಬಳ್ಳಾಪುರ ಜಿಲ್ಲೆಯಲ್ಲಿ ಮೇ ನಲ್ಲಿ ವಾಡಿಕೆ ಮಳೆಗಿಂತಲೂ ಹೆಚ್ಚಿನ ಮಳೆ(೬೫.೪ ಮಿ.ಮೀ ೧೪೨ ಮಿ.ಮೀ) ಸುರಿಯಿತು. ಇದೇ ವೇಳೆ ಎಲೆಗಳು ಹಾಗೂ ಕಾಯಿಗಳಲ್ಲಿ ಮಚ್ಚೆಗಳು, ಹಣ್ಣು ಹಳದಿ ಬಣ್ಣಕ್ಕೆ ಪರಿವರ್ತನೆಗೊಳ್ಳುವ ಜಾಂಡೀಸ್ ಸೇರಿದಂತೆ ಹಲವು ಸೋಂಕುಗಳು ಬಾಧಿಸಿದವು. ಇವುಗಳಿಂದ ಬೆಳೆಯನ್ನು ರಕ್ಷಿಸಿಕೊಳ್ಳಲು ರಾಸಾಯಾನಿಕ ಔಷಧಗಳು, ಕೀಟನಾಶಕಗಳನ್ನು ಸಿಂಪಡಿಸಬೇಕಾಯಿತು. ಆದರೂ ಬಹುತೇಕ ಕಡೆ ಗುಣಮಟ್ಟದ ಇಳುವರಿ ಸಿಗಲಿಲ್ಲ. ಸಾಮಾನ್ಯವಾಗಿ ಸಣ್ಣ, ಮಧ್ಯಮ ಹಾಗೂ ಬೃಹತ್ ಗಾತ್ರದ ಆಧಾರದ ಮೇಲೆ ದರವನ್ನು ನಿಗದಿಯಾಗುವುದರಿಂದ ಒಳ್ಳೆಯ ಬೆಲೆ ಸಿಗಲಿಲ್ಲ.
ಒಂದು ಎಕರೆಯಲ್ಲಿ ಟೊಮ್ಯಾಟೋ ಬೆಳೆಯಲು ನಾರಿಗೆ ೨೫ ಸಾವಿರ ರೂ, ರಾಸಾಯಾನಿಕ ಔಷಧಗಳು ಹಾಗೂ ಕೀಟನಾಶಕಗಳಿಗೆ ೮೦ ಸಾವಿರ ರೂ, ಕಾರ್ಮಿಕರಿಗೆ ಕೂಲಿ, ಸಾಗಾಣೆ ಇತರ ನಿರ್ವಹಣೆ ವೆಚ್ಚ ಸೇರಿದಂತೆ ೨ ಲಕ್ಷ ರೂ ಬಂಡವಾಳ ಹೂಡಿದ್ದು ಇದಕ್ಕೆ ೧.೫೦ ಲಕ್ಷ ರೂ ಆದಾಯ ಮಾತ್ರ ಸಿಕ್ಕಿದೆ ಎಂದು ಬೆಳೆಗಾರ ಶ್ರೀನಿವಾಸ್ ಅಳಲು ತೋಡಿಕೊಂಡಿದ್ದಾರೆ.
