ಟೋಲ್ ಗೇಟ್ ನಿರ್ಮಿಸಲು ಸೂರಲ್ಪಾಡಿಯಲ್ಲಿ ಎನ್ಎಚ್ಎಐ ಈಗಾಗಲೇ ಜಾಗ ಸ್ವಾಧೀನಪಡಿಸಿ, ಸರ್ವೇ ಪೂರ್ಣಗೊಳಿಸಿದೆ. ಮೊದಲಿಗೆ ಸೂರಲ್ಪಾಡಿಗೆ ಹತ್ತಿರದ ಮಸೀದಿ ಬಳಿಯಿಂದ ಟೋಲ್ ಗೇಟ್ ಕಾಮಗಾರಿ ಆರಂಭಿಸಲು ಪ್ರಾಧಿಕಾರ ಪ್ರಸ್ತಾವಿಸಿತ್ತಾದರೂ, ನಂತರದಲ್ಲಿ ಒತ್ತಡಕ್ಕೆ ಮಣಿದು ಮಸೀದಿಗಿಂತ ಸ್ವಲ್ಪ ಮುಂದೆ ಟೋಲ್ ನಿರ್ಮಾಣ ಕಾರ್ಯ ಕೈಗೆತ್ತಿಕೊಂಡಿದೆ. ಹಾಗಾಗಿ ಈಗ ಮಸೀದಿ ಜಾಗ ಬಿಟ್ಟು ಟೋಲ್ ಗೇಟ್ ನಿರ್ಮಿಸಲಾಗುತ್ತಿದೆ. ಹೊಸ ಪ್ರಸ್ತಾವ ಕಾರ್ಯಗತ ಹಿನ್ನೆಲೆಯಲ್ಲಿ ಗಂಜಿಮಠದ ರಾಜ್ ಅಕಾಡೆಮಿ ಆಂಗ್ಲ ಮಾಧ್ಯಮ ಶಾಲಾ ಆಟದ ಮೈದಾನ ಮತ್ತು ಶಾಲಾ ಕಟ್ಟಡದ ಎದುರಿನ ಭಾಗ ಸ್ವಾಧೀನಪಡಿಸಿ, ಸರ್ವೇ ಗುರುತು ಹಾಕಲಾಗಿದೆ. ಜತೆಗೆ ಹತ್ತಿರದಲ್ಲಿ, ಅದೇ ಪಾರ್ಶ್ವದಲ್ಲಿರುವ ಹೆಂಚಿನ ಕಾರ್ಖಾನೆ ಜಾಗ ಸ್ವಾಧೀನಪಡಿಸಲಾಗಿದೆ.
