ಟೋಲ್ ಅವಧಿ ಜೂ. 23ರವರೆಗೆ ವಿಸ್ತರಣೆ

ವಿಜಯವಾಣಿ ಸುದ್ದಿಜಾಲ ಹುಬ್ಬಳ್ಳಿ: ಹುಬ್ಬಳ್ಳಿ-ಧಾರವಾಡ ಬೈ ಪಾಸ್ ಮಾರ್ಗದಲ್ಲಿ ಟೋಲ್ ಸಂಗ್ರಹಿಸುವ ಅವಧಿ ಜೂನ್ 23ರವರೆಗೆ ವಿಸ್ತರಣೆಗೊಂಡಿದೆ. ಇದು ಮೇ 6ರಂದು ಕೊನೆಗೊಳ್ಳಬೇಕಿತ್ತು.

ಹುಬ್ಬಳ್ಳಿ-ಧಾರವಾಡ ದ್ವಿಪಥ ರಸ್ತೆ (ಬೈಪಾಸ್) ನಿರ್ವಿುಸಿ ಈ ಮಾರ್ಗದಲ್ಲಿ ಹಾದು ಹೋಗುವ ವಾಹನಗಳಿಂದ ಟೋಲ್ ಸಂಗ್ರಹಿಸುತ್ತಿರುವ ನಂದಿ ಹೈವೇ ಡೆವಲಪರ್ಸ್ ಲಿಮಿಟೆಡ್ (ಎನ್​ಎಚ್​ಡಿಎಲ್)ಗೆ ಕೇಂದ್ರ ಸರ್ಕಾರದ ಭೂ ಸಾರಿಗೆ ಮತ್ತು ರಾಷ್ಟ್ರೀಯ ಹೆದ್ದಾರಿಗಳ ಸಚಿವಾಲಯವು ಅವಧಿ ವಿಸ್ತರಣೆ ಮಾಡಿಕೊಟ್ಟಿದೆ.

‘ನೋಟ್​ಗಳ ಅಮಾನ್ಯೀಕರಣ ಹಾಗೂ ಕರೊನಾ ಕಾಲಘಟ್ಟದಲ್ಲಿ ಟೋಲ್ ಸಂಗ್ರಹ ಬಹಳ ಕಡಿಮೆ ಇತ್ತು. ಇದರಿಂದ ಆದಾಯ ನಷ್ಟವಾಗಿದ್ದು, ಈ ಮಾರ್ಗದಲ್ಲಿ ಟೋಲ್ ಸಂಗ್ರಹಿಸಲು ಇನ್ನಷ್ಟು ಕಾಲಾವಧಿ ನೀಡಬೇಕೆಂದು ಎನ್​ಎಚ್​ಡಿಎಲ್ ಸಚಿವಾಲಯಕ್ಕೆ ಮನವಿ ಮಾಡಿತ್ತು. ಅವರ ಮನವಿಯನ್ನು ಸಚಿವಾಲಯ ಪುರಸ್ಕರಿಸಿದೆ’ ಎಂದು ಲೋಕೋಪಯೋಗಿ ಇಲಾಖೆ (ರಾಷ್ಟ್ರೀಯ ಹೆದ್ದಾರಿ ವಿಭಾಗ ಹುಬ್ಬಳ್ಳಿ)ಯ ಕಾರ್ಯನಿರ್ವಾಹಕ ಇಂಜಿನಿಯರ್ ಎಚ್.ಜಿ. ಗುಂಡಳ್ಳಿ ‘ವಿಜಯವಾಣಿ’ಗೆ ತಿಳಿಸಿದ್ದಾರೆ.

ಹು-ಧಾ ಬೈಪಾಸ್ ರಸ್ತೆ ನಿರ್ಮಾಣ ಕಾಮಗಾರಿ 1998ರಲ್ಲಿ ಪೂರ್ಣಗೊಂಡಿತ್ತು. 2000ದಿಂದ ಟೋಲ್ ಸಂಗ್ರಹ ಜಾರಿಯಲ್ಲಿದೆ. 31.6 ಕಿಲೋ ಮೀಟರ್ ಮಾರ್ಗದಲ್ಲಿ ಹುಬ್ಬಳ್ಳಿ ಗಬ್ಬೂರ್ ಹಾಗೂ ಧಾರವಾಡ ನರೇಂದ್ರದಲ್ಲಿ ಮುಖ್ಯ ಟೋಲ್ ಗೇಟ್​ಗಳು ಹಾಗೂ ನಾಲ್ಕು ಇಂಟರ್​ಚೇಂಜರ್ ಗಳಿವೆ.

ಈಗಿರುವ ದ್ವಿಪಥ ರಸ್ತೆಯನ್ನು ಅಷ್ಟಪಥವನ್ನಾಗಿ ಮಾಡುವ ಕಾಮಗಾರಿ ಪ್ರಗತಿಯಲ್ಲಿದೆ.