ತೊಗರಿ ಬೆಳೆಗೆ ಲದ್ದಿ ಹುಳು ಕಾಟ

ಕನಕಗಿರಿ: ಪ್ರಸಕ್ತ ವರ್ಷ ಮುಂಗಾರು ಹಾಗೂ ಹಿಂಗಾರು ಮಳೆ ಸಮೃದ್ಧವಾದ್ದರಿಂದ ತಾಲೂಕಿನಾದ್ಯಂತ ದಾಖಲೆ ಪ್ರಮಾಣದಲ್ಲಿ ಬಿತ್ತನೆಯಾಗಿರುವ ತೊಗರಿ ಬೆಳೆ ಹೂ-ಕಾಯಿ ಕಟ್ಟುವ ವೇಳೆ ಲದ್ದಿ ಹುಳುಗಳು ದಾಂಗುಡಿ ಇಟ್ಟಿದ್ದು. ರೈತರನ್ನು ಆತಂಕಕ್ಕೀಡು ಮಾಡಿವೆ.

ಇದನ್ನೂ ಓದಿ: ಮೆಕ್ಕೆಜೋಳ ಕಣಜದಲ್ಲಿ ತೊಗರಿಯ ಕಂಪು

ಮೂರ‌್ನಾಲ್ಕು ವರ್ಷಗಳ ಹಿಂದೆ ಪಟ್ಟಣಕ್ಕೆ ಬಂದ ಕುಷ್ಟಗಿ ತಾಲೂಕಿನ ರೈತರು, ಇಲ್ಲಿನ ಭೂಮಿಯಲ್ಲಿ ಆಧುನಿಕ ಪದ್ಧತಿಯಲ್ಲಿ ತೊಗರಿ ಬೆಳೆದು ಒಳ್ಳೆಯ ಲಾಭ ಪಡೆದಿದ್ದರು. ಇದನ್ನು ನೋಡಿದ ಸ್ಥಳೀಯ ರೈತರು ಸಹ ತೊಗರಿ ಬೆಳೆಯಲು ಮುಂದಾಗಿದ್ದು, ಇದರಿಂದ ಪಾಳುಬಿದ್ದ ಜಮೀನುಗಳಲ್ಲೂ ಈ ಬಾರಿ ತೊಗರಿ ಬೆಳೆ ರಾರಾಜಿಸುತ್ತಿವೆ. ಬೆಳೆಗಳು ಉತ್ತಮವಾಗಿವೆ. ಆದರೆ, ಕಳೆದ ಮುರ‌್ನಾಲ್ಕು ದಿನಗಳಿಂದ ಲದ್ದಿ ಹುಳು ಕಾಣಿಸಿಕೊಂಡಿದ್ದು, ಬೆಳಗಿನ ಜಾವ ಹಾಗೂ ಸಂಜೆ ಎಲೆ, ಹೂವು ತಿಂದು ಹಾಳು ಮಾಡುತ್ತಿವೆ.

ಬಿಸಿಲು ಬಂದಾಕ್ಷಣ ಎಲೆ ಕೆಳ ಭಾಗದಲ್ಲಿ ಅಡಗಿಕೊಳ್ಳುತ್ತಿರುವ ಲದ್ದಿ ಹುಳುಗಳು, ಕ್ರಿಮಿನಾಶಕ ಸಿಂಪಡಿಸಿದರೂ ನಾಶವಾಗುತ್ತಿಲ್ಲ. ದುಬಾರಿ ಬೆಲೆಯ ಔಷಧ ತಂದು ಕೈ ಸುಟ್ಟುಕೊಳ್ಳುವಂತಾಗಿದೆ ಎನ್ನುತ್ತಿದ್ದಾರೆ ರೈತರು. ಕೃಷಿ ಅಧಿಕಾರಿಗಳ ಸಲಹೆ ಪಡೆದು ಹುಳುವಿನ ನಿಯಂತ್ರಣಕ್ಕೆ ಮುಂದಾದರೂ ಕಾಟ ತಪ್ಪುತ್ತಿಲ್ಲ. ಕಳೆದ ವರ್ಷದಂತೆ ಈ ಬಾರಿಗೂ ಅನ್ನದಾತನಿಗೆ ಆರ್ಥಿಕ ಸಂಕಷ್ಟ ಎದುರಾಗಿದ್ದು, ಕೈಗೆ ಬಂದ ತುತ್ತು ಬಾಯಿಗೆ ಬರುತ್ತದೆಯೋ ಇಲ್ಲವೋ ಎನ್ನುವ ಆತಂಕ ಮನೆ ಮಾಡಿದೆ.