ಭಾರತೀಯ ಭಾಷಾ ಸಂಸ್ಥಾನ (ಸಿಐಐಎಲ್)ನಲ್ಲಿ ತೋಡ ಭಾಷಾ ಬಾಲಬೋಧೆಯ ಕಮ್ಮಟ

ಮೈಸೂರು: ಭಾಷಾ ದಾಖಲೀಕರಣ ಕುರಿತ ತರಬೇತಿ ಕಾರ್ಯಾಗಾರ ಮತ್ತು ತೋಡ ಭಾಷಾ ಬಾಲಬೋಧೆಯ ಕಮ್ಮಟಕ್ಕೆ ನಗರದಲ್ಲಿ ಸೋಮವಾರ ಚಾಲನೆ ನೀಡಲಾಯಿತು.

ಭಾರತೀಯ ಭಾಷಾ ಸಂಸ್ಥಾನ (ಸಿಐಐಎಲ್)ನಲ್ಲಿ ಆಯೋಜಿಸಿರುವ 15 ದಿನಗಳ ಕಾರ್ಯಾಗಾರ ಹಾಗೂ ಕಮ್ಮಟಕ್ಕೆ ಭಾರತೀಯ ಭಾಷಾ ಸಂಸ್ಥಾನದ ಪ್ರಾದೇಶಿಕ ನಿರ್ದೇಶಕ ಪ್ರೊ. ಶೈಲೇಂದ್ರ ಮೋಹನ್ ಚಾಲನೆ ನೀಡಿ, ಭಾಷಾ ದಾಖಲೀಕರಣದ ಉದ್ದೇಶಗಳ ಜೋಡಣೆಯನ್ನು ವಿಕಸಿತ ಭಾರತದ ರಾಷ್ಟ್ರೀಯ ದೃಷ್ಟಿಕೋನ ಮತ್ತು ಭಾಷಾ ಅಭಿವೃದ್ಧಿಗೆ ಸುಧಾರಿತ ತಂತ್ರಜ್ಞಾನವನ್ನು ಉತ್ತೇಜಿಸುವಲ್ಲಿ ರಾಷ್ಟ್ರೀಯ ಶಿಕ್ಷಣ ನೀತಿ-2020ರ ಪಾತ್ರದ ಬಗ್ಗೆ ಚರ್ಚಿಸಿದರು.

ಭಾರತೀಯ ಭಾಷಾ ವೈವಿಧ್ಯತೆಯ ವೈಶಿಷ್ಟ್ಯತೆಗಳನ್ನು ಉಲ್ಲೇಖಿಸುತ್ತಾ, ಭಾಷಾ ದಾಖಲಾತಿಯಲ್ಲಿ ಔಪಚಾರಿಕ ಮತ್ತು ಕ್ರಿಯಾತ್ಮಕ ಭಾಷಾಶಾಸ್ತ್ರ ಎರಡನ್ನೂ ಸಂಯೋಜಿಸುವ ಪ್ರಾಮುಖ್ಯತೆಯನ್ನು ಅವರು ತಿಳಿಸಿಕೊಟ್ಟರು.

ಸಂಸ್ಥೆಯ ಉಪ ನಿರ್ದೇಶಕ ಪ್ರೊ.ಪಿ.ಆರ್.ಧರ್ಮೇಶ್ ಫರ್ನಾಂಡಿಸ್ ಮಾತನಾಡಿ, ಭಾಷಾ ದಾಖಲೀಕರಣದ ಪ್ರಾಮುಖ್ಯತೆಯನ್ನು ಹಾಗೂ ಅದರ ಮೌಲ್ಯವನ್ನು ಶಿಬಿರಾರ್ಥಿಗಳಿಗೆ ವಿವರಿಸಿದರು.

ಅಳಿವಿನಂಚಿನಲ್ಲಿರುವ ಭಾಷೆಗಳನ್ನು ಸಂರಕ್ಷಿಸುವ ನಿರ್ಣಾಯಕ ಪ್ರಾಮುಖ್ಯತೆ ಜತೆಗೆ ಕಾರ್ಯಾಗಾರವು ಭಾಷಾ ವೈವಿಧ್ಯತೆಯನ್ನು ಸಂರಕ್ಷಿಸಲು ಮಾತ್ರವಲ್ಲದೆ, ಸಾಂಸ್ಕೃತಿಕ ಪರಂಪರೆಯನ್ನು ರಕ್ಷಿಸಲು ಸಹ ಅತ್ಯಗತ್ಯ ಎಂದು ಹೇಳಿದರು.

ಕಿರಿಯ ಸಂಶೋಧನಾಧಿಕಾರಿ ಡಾ. ಸುಜೋಯ್ ಸರ್ಕಾರ್, ಇನ್ನಿತರ ಸಂಪನ್ಮೂಲ ವ್ಯಕ್ತಿಗಳು ಶಿಬಿರದ ಮಾರ್ಗಸೂಚಿ ತಿಳಿಸಿಕೊಟ್ಟರು.

ದೇಶದ ವಿವಿಧ 17 ರಾಜ್ಯಗಳಿಂದ 65 ಶಿಬಿರಾರ್ಥಿಗಳು ಈ ಭಾಷಾ ದಾಖಲೀಕರಣ ಕುರಿತ ತರಬೇತಿ ಕಾರ್ಯಾಗಾರದಲ್ಲಿ ಭಾಗವಹಿಸಿದ್ದಾರೆ.

ಕಮ್ಮಟದಲ್ಲಿ ನೀಲಗಿರಿ ಬೆಟ್ಟಗಳಲ್ಲಿನ ಸಣ್ಣ ಸಣ್ಣ ಸಮುದಾಯದ ತೋಡ ಭಾಷೆ ಮಾತನಾಡುವವರು ಭಾಗವಹಿಸಿರುವುದು ವಿಶೇಷವಾಗಿದೆ.