ಕಂಪ್ಲಿಯಲ್ಲಿ ಗೋಶಾಲೆ ಆರಂಭಕ್ಕೆ ಬಾಲಗ್ರಹಣ

ಕಂಪ್ಲಿ: ಪಟ್ಟಣದಲ್ಲಿ ಗೋಶಾಲೆ ಆರಂಭದ ಪ್ರಕ್ರಿಯೆ ಕಡತಗಳಲ್ಲಿಯೇ ಉಳಿದಿದ್ದು, ಕಾರ್ಯರೂಪಕ್ಕೆ ಬರುತ್ತಿಲ್ಲ. ಹೀಗಾಗಿ ಬಿಡಾಡಿ ದನಗಳ ಉಪಟಳ ಹೆಚ್ಚುತ್ತಿದ್ದು, ಜನರು ತೊಂದರೆ ಅನುಭವಿಸುವಂತಾಗಿದೆ.

ಕಳೆದ ವರ್ಷ ಹಿಂದಿನ ಬಿಜೆಪಿ ಸರ್ಕಾರ ಜಿಲ್ಲೆಗೊಂದು ಗೋಶಾಲೆ ತೆರೆಯಲು ಕ್ರಮವಹಿಸಿತ್ತು.

ಬಳ್ಳಾರಿ ಜಿಲ್ಲೆಯಲ್ಲಿ ಕಂಪ್ಲಿ ಪಟ್ಟಣದಲ್ಲಿರುವ ಜಿಲ್ಲಾ ಕೃಷಿ ತರಬೇತಿ ಕೇಂದ್ರದ ಸರ್ವೇ ನಂಬರ್ 1464/ಬಿಯ ಐದು ಎಕರೆ ಭೂಮಿಯನ್ನು ಆಗಿನ ಡಿಸಿ ಪವನ್‌ಕುಮಾರ್ ಮಾಲಪಾಟಿ 2022ರ ಅಕ್ಟೋಬರ್‌ನಲ್ಲಿ ಮಂಜೂರು ಮಾಡಿ, ಪಶುಪಾಲನಾ ಇಲಾಖೆ ಉಪನಿರ್ದೇಶಕರಿಗೆ ಸೂಚನೆ ನೀಡಿದ್ದರು. ಆದರೆ, ಒಂಬತ್ತು ತಿಂಗಳು ಕಳೆದರೂ ಕಂಪ್ಲಿಯಲ್ಲಿ ಗೋಶಾಲೆ ಆರಂಭಿಸುವ ಯಾವುದೇ ಪ್ರಕ್ರಿಯೆ ನಡೆದಿಲ್ಲ.

ಪಟ್ಟಣದಲ್ಲಿ ಸುಮಾರು 70ಕ್ಕೂ ಹೆಚ್ಚು ಬಿಡಾಡಿ ದನಗಳಿವೆ. ಪ್ರತಿ ಸಲ ಪುರಸಭೆ ಸಭೆಯಲ್ಲಿ ಬಿಡಾಡಿ ದನಗಳನ್ನು ಗೋಶಾಲೆಗೆ ಕಳುಹಿಸುವ ಪ್ರಸ್ತಾಪವಾಗುತ್ತದೆ. ಪುರಸಭೆ ಅಧಿಕಾರಿಗಳು ಬಿಡಾಡಿ ದನಗಳ ಸಾಗಣೆಗೆ ಮುಂದಾದಾಗ ದನಗಳ ಮಾಲೀಕರು ರಾಜಕೀಯ ಒತ್ತಡ ಹೇರಿ ಮತ್ತೆ ಬೀದಿಗೆ ಬಿಡಿಸುತ್ತಾರೆ ಎನ್ನುವ ಆರೋಪವಿದೆ.

ಜೈನ್ ಸೇವಾ ಟ್ರಸ್ಟ್, ರಾಮಸಾಗರದ ಮಾನಸ ಗಂಗೋತ್ರಿ ಸೇವಾ ಟ್ರಸ್ಟ್‌ಗಳು ಗೋಶಾಲೆ ಆರಂಭಕ್ಕೆ ಜಮೀನು ನೀಡುವಂತೆ ತಾಲೂಕು ಆಡಳಿತವನ್ನು ಒತ್ತಾಯಿಸುತ್ತಿವೆ. ಆದರೆ, ಟ್ರಸ್ಟ್‌ಗಳಿಗೆ ಭೂಮಿಯೂ ದೊರಕಲಿಲ್ಲ. ಇತ್ತ ಸರ್ಕಾರವೂ ಗೋಶಾಲೆ ಆರಂಭಿಸುತ್ತಿಲ್ಲ.

ಇದನ್ನೂ ಓದಿ: ಗೋಶಾಲೆಗೆ ಸಾಗುವಳಿ ಭೂಮಿ ನೀಡದಿರಿ: ಭೂಮಿ ವಸತಿ ಹೋರಾಟ ಸಮಿತಿ ಆಗ್ರಹ

ಇದರಿಂದ ಬೀದಿಗೆ ಬರುವ ಬಿಡಾಡಿ ದನಗಳು ರಸ್ತೆಗಳ ಮಧ್ಯೆ ಠಿಕಾಣಿ ಹೂಡುವುದರಿಂದ ವಾಹನ ಸವಾರರ ಓಡಾಟಕ್ಕೆ ಸಮಸ್ಯೆಯಾಗಿದೆ. ಗೋಶಾಲೆ ಆರಂಭಕ್ಕೆ ಈಗಿನ ಸರ್ಕಾರ ಕೂಡಲೇ ಕ್ರಮವಹಿಸಬೇಕು ಎಂಬುದು ಸ್ಥಳೀಯರ ಒತ್ತಾಯವಾಗಿದೆ.