ಟಿಕ್​ಟಾಕ್​ಗೂ ಲಗ್ಗೆಯಿಟ್ಟ ಬೆಂಗಳೂರು ನಗರ ಪೊಲೀಸರಿಂದ ವಿನೂತನ ಪ್ರಯತ್ನ!

ಬೆಂಗಳೂರು: ಯುವಕರಿಂದ ಹಿಡಿದು ವಯಸ್ಕರನ್ನು ತನ್ನತ್ತ ಸೆಳೆದಿರುವ ವಿಡಿಯೋ ಶೇರಿಂಗ್​ ಆ್ಯಪ್​ ಟಿಕ್​ಟಾಕ್​ ಇದೀಗ ಬೆಂಗಳೂರು ಪೊಲೀಸರ ಗಮನವನ್ನು ಸೆಳೆದಿದೆ.

ಹೌದು, ಜನಪ್ರಿಯ ಟಿಕ್​ಟಾಕ್​ ಆ್ಯಪ್​ಗೆ ಬೆಂಗಳೂರು ನಗರ ಪೊಲೀಸರು ಪ್ರವೇಶ ನೀಡಿದ್ದಾರೆ. ಪರಿಣಾಮಕಾರಿಯಾಗಿ ಸಾರ್ವಜನಿಕರನ್ನು ತಲುಪಲು ಈ ನಿರ್ಧಾರ ಮಾಡಿದ್ದು, ಬೆಂಗಳೂರು ಸಿಟಿ ಪೊಲೀಸ್ ಹೆಸರಿನಲ್ಲಿ ಟಿಕ್​ಟಾಕ್ ಖಾತೆ ತೆರೆಯಲಾಗಿದೆ.

ವಿಶೇವೆಂದರೆ ದೇಶದಲ್ಲಿ ಮೊದಲ ಬಾರಿಗೆ ಟಿಕ್​ಟಾಕ್ ಖಾತೆ ತೆರೆದ ಕೀರ್ತಿಗೆ ಬೆಂಗಳೂರು ಪೊಲೀಸರು ಭಾಜನರಾಗಿದ್ದಾರೆ. ತಮ್ಮ ವತಿಯಿಂದ ಯಾವುದಾದರೂ ಜನಪರ ಕಾರ್ಯಕ್ರಮ ನಡೆದರೆ, ಅದನ್ನು ಟಿಕ್​ಟಾಕ್ ಖಾತೆಗೆ ಅಪ್​ಲೋಡ್​ ಮಾಡಿ, ಈ ಮೂಲಕ ಜನರನ್ನು ತಲುಪುವ ವಿನೂತನ ಪ್ರಯತ್ನಕ್ಕೆ ಕೈಹಾಕಿದ್ದಾರೆ.

ಸದ್ಯ ಖಾತೆಯಲ್ಲಿ ಬೆಂಗಳೂರು ಪೊಲೀಸರು ಮೂರು ವಿಡಿಯೋಗಳನ್ನು ಶೇರ್ ಮಾಡಿದ್ದು, ಸಾಮಾಜಿಕ ಜಾಲತಾಣಗಳನ್ನು ಪರಿಣಾಮಕಾರಿಯಾಗಿ ಬಳಸಿಕೊಳ್ಳಲು ಇರುವ ಮಾರ್ಗಗಳನ್ನು ಬೆಂಗಳೂರು ಪೊಲೀಸರು ಅನುಸರಿಸುತ್ತಿದ್ದಾರೆ.

ಸದ್ಯದ ಮಟ್ಟಿಗೆ ಭಾರತದಲ್ಲಿ ಟಿಕ್​ಟಾಕ್​ ಹೆಚ್ಚು ಸದ್ದು ಮಾಡುತ್ತಿದೆ. ಅದರಲ್ಲೂ ಹೆಚ್ಚಿನ ಸಂಖ್ಯೆಯಲ್ಲಿ ಯುವಕರೇ ಟಿಕ್​ಟಾಕ್​ ಬಳಸುತ್ತಿದ್ದಾರೆ. ಹೀಗಾಗಿ ಯುವ ಸಮುದಾಯ ತಲುಪಲು ಇದೊಂದು ಪರಿಣಾಮಕಾರಿ ಮಾರ್ಗವಾಗಿದೆ. (ದಿಗ್ವಿಜಯ ನ್ಯೂಸ್​)