ಆಲಮಟ್ಟಿ ಜಲಾಶಯಕ್ಕೆ ಬಿಗಿ ಭದ್ರತೆ

ಆಲಮಟ್ಟಿ: ಪಾಕಿಸ್ತಾನದ ಮೇಲಿನ ವೈಮಾನಿಕ ದಾಳಿಯ ನಂತರ ಕೇಂದ್ರ ಗುಪ್ತಚರ ಇಲಾಖೆ ಮಾಹಿತಿಯ ಮೇರೆಗೆ ರಾಜ್ಯ ರಾಜಧಾನಿ ಸೇರಿದಂತೆ ಹಲವಾರು ಪ್ರಮುಖ ದೇವಸ್ಥಾನ, ಅಣೆಕಟ್ಟು, ಐತಿಹಾಸಿಕ ಸ್ಥಳಗಳ ಮೇಲೆ ಉಗ್ರರು ಕಣ್ಣು ಹಾಕುತ್ತಿದ್ದಾರೆಂಬ ಸೂಚನೆಯಂತೆ ದೇಶದಲ್ಲಿಯೇ ಎರಡನೇ ದೊಡ್ಡ ಜಲಾಶಯವಾದ ಲಾಲ್​ಬಹಾದ್ದೂರ್​ ಶಾಸ್ತ್ರಿ ಅಣೆಕಟ್ಟೆಗೆ ಮುಂಜಾಗೃತಕ್ರಮವಾಗಿ ಬಿಗಿ ಪೊಲೀಸ್​ ಬಂದೋಬಸ್ತ್​ ಒದಗಿಸಲಾಗಿದೆ.

ಆಲಮಟ್ಟಿಯ ಉದ್ಯಾನವನಗಳಿಗೆ ಹಾಗೂ ಸಮೀಪದ ದೇವಸ್ಥಾನಗಳಿಗೆ ಪೊಲೀಸರು ಸರ್ಪಗಾವಲಿಟ್ಟಿದ್ದು, ಜಲಾಶಯದ 1.5ಕಿ.ಮೀ ವ್ಯಾಪ್ತಿ ಹಾಗೂ ಜಲಾಶಯದ ಎರಡೂ ಬದಿಯಲ್ಲಿ ಕರ್ನಾಟಕ ಕೈಗಾರಿಕಾ ಭದ್ರತಾಪಡೆಯ ಸಹಾಯಕ ಕಮಾಂಡೆಂಟ್​ ಅರುಣ ಡಿ.ವಿ. ಅವರ ನೇತೃತ್ವದಲ್ಲಿ 85 ಜನ ಸಿಬ್ಬಂದಿ ವಿಶೇಷ ತರಬೇತಿ ಹೊಂದಿದ ಮತ್ತು ಶಸ್ತ್ರಾಸ್ತ್ರಗಳ ಸಮೇತ ದಿನಕ್ಕೆ ಮೂರು ಪಾಳೆಯದಲ್ಲಿ ಜಲಾಶಯದ ಭದ್ರತೆ ಒದಗಿಸಿದ್ದಾರೆ.

36 ಗುಪ್ತ ಕ್ಯಾಮರಾ: ಜಲಾಶಯದ ಹಲವಾರು ಭಾಗಗಳಲ್ಲಿ ಗುಪ್ತ ಕ್ಯಾಮರಾಗಳನ್ನು ಅಳವಡಿಸಲಾಗಿದೆ. ಪ್ರತಿ ತಾಸಿಗೊಮ್ಮೆ ಅವಳಿ ಜಿಲ್ಲೆಯ ಎಸ್ಪಿಗಳಿಗೆ ಮಾಹಿತಿ ಕಳುಹಿಸಲಾಗುತ್ತಿದೆ. ಜಲಾಶಯದ ಪ್ರತಿಯೊಂದು ಗೇಟ್​ಗಳು ಸೇರಿದಂತೆ ಎಡ&ಬಲಗಳಲ್ಲಿ ತಲಾ ಎರಡು ಕ್ಯಾಮರಾಗಳನ್ನು ಅಳವಡಿಸಲಾಗಿದೆ.

ಉಗ್ರರ ಕಣ್ಣು ಜಲಾಶಯದ ಮೇಲೆ ಬಿದ್ದಿರುವ ಯಾವುದೇ ಮಾಹಿತಿ ಇಲ್ಲ. ರಾಷ್ಟ್ರೀಯ ಸಂಪತ್ತು ಆಗಿರುವುದರಿಂದ ಕರ್ನಾಟಕ ರಾಜ್ಯ ಕೈಗಾರಿಕಾ ಭದ್ರತಾಪಡೆಯ ಸಿಬ್ಬಂದಿ ಅವಳಿ ಜಿಲ್ಲೆಯ ಪೊಲೀಸರು ಹೈಅರ್ಲಟ್​ ಆಗಿದ್ದಾರೆ. ಅಷ್ಟೇ ಅಲ್ಲದೇ ಸ್ಥಳಿಯ ಪೊಲೀಸ್​ ಸಿಬ್ಬಂದಿ ಗಸ್ತು ಹಾಕುತ್ತಿದ್ದಾರೆ ಎಂದು ಕೆಬಿಜೆನ್ನೆಎಲ್​ ಮುಖ್ಯ ಅಭಿಯಂತರ ಡಿ.ಬಸವರಾಜ ಹೇಳಿದರು.

ನಮ್ಮಲ್ಲಿ ನಾಲ್ಕು ಚಕ್​ ಪೊಸ್ಟ್​ಗಳಿದ್ದು, ಅಲ್ಲಿ ಸರ್ಕಾರಿ ವಾಹನಗಳು ಸೇರಿದಂತೆ ಎಲ್ಲ ವಾಹನಗಳನ್ನು ತಪಾಸಣೆ ಮಾಡಲಾಗುತ್ತಿದೆ ಎಂದರು.