ಠಾಣೆ ಮುಂದೆ ಇರುತ್ತಿದ್ದ ಕರಿಯ ಎಂಬ ಹೆಸರಿನ ಬೀದಿನಾಯಿ ರಾತ್ರಿ ವೇಳೆ ಯಾರೇ ಬಂದರೂ ಬೊಗಳಿ ಎಚ್ಚರಿಸುವ ಮೂಲಕ ಪೊಲೀಸರೊಂದಿಗೆ ನೈಟ್ ಡ್ಯೂಟಿ ಸಹ ಮಾಡಿ ಮೆಚ್ಚುಗೆಗೆ ಪಾತ್ರವಾಗಿತ್ತು. ಎಎಸ್ಐ ಎ.ಮಹೇಶ್ ಎಂಬುವರು ನಾಯಿಗೆ ಹಾಲು, ಅನ್ನ ತಿಂಡಿ ಹಾಕಿ ಮಗನಂತೆ ಪ್ರೀತಿಯಿಂದ ಸಾಕುತ್ತಿದ್ದರು. ಕಳೆದ 20 ದಿನಗಳ ಹಿಂದೆ ಠಾಣೆಯತ್ತ ಓಡಿಬಂದ ಹುಚ್ಚು ನಾಯಿಯೊಂದು ಬೈಕಿನಿಂದ ಕೆಳಗಿಳಿದ ಕಾನ್ಸ್ಟೇಬಲ್ ಮಂಜುಗೆ ಕಚ್ಚಿತ್ತು. ಇದೇ ಸಂದರ್ಭದಲ್ಲಿ ಸಮೀಪದಲ್ಲೇ ಇದ್ದ ಬೀದಿ ನಾಯಿಗೂ ಕಚ್ಚಿತ್ತು ಎನ್ನಲಾಗಿದೆ. ಕೂಡಲೇ ಆಸ್ಪತ್ರೆಗೆ ತೆರಳಿದ ಮಂಜು ಚುಚ್ಚುಮದ್ದು ಹಾಕಿಸಿಕೊಂಡಿದ್ದರು. ಎರಡು ದಿನಗಳ ನಂತರ ಪಶುವೈದ್ಯರಿಂದ ಬೀದಿನಾಯಿಗೂ ವ್ಯಾಕ್ಸಿನ್ ಹಾಕಿಸಲಾಗಿತ್ತು. ಆದರೆ ಅಷ್ಟರಲ್ಲಾಗಲೇ ನಾಯಿಗೆ ರೇಬಿಸ್ ನಂಜೇರಿತ್ತು.
