ಮೂರು ಕೆಳ ಹಂತದ ಸೇತುವೆ ಮುಳುಗಡೆ

ರಾಮದುರ್ಗ: ನವಿಲುತೀರ್ಥ ಅಣೆಕಟ್ಟೆಯಿಂದ ನೀರು ಬಿಟ್ಟಿರುವುದರಿಂದ ಮಲಪ್ರಭಾ ನದಿ ತೀರದಲ್ಲಿರುವ ರಾಮದುರ್ಗದ ತೇರ ಬಜಾರದ ಹತ್ತಿರ ಇರುವ ಹಳೇ ಸೇತುವೆ, ಟಕನೂರ ಗ್ರಾಮದ ಹತ್ತಿರ ಮಲಪ್ರಭಾ ನದಿಗೆ ನಿರ್ಮಿಸಿದ ಬ್ರಿಡ್ಜ್​ ಕಂ&ಬ್ಯಾರೇಜ್​, ಸುರೇಬಾನದಿಂದ ಕುಳಗೇರಿಗೆ ಸಂಪರ್ಕ ಕಲ್ಪಿಸುವ ಹಂಪಿಹೊಳಿ ಹತ್ತಿರ ನದಿಗೆ ನಿರ್ಮಿಸಿದ ಸೇತುವೆಗಳು ಮುಳುಗಡೆಯಾಗಿದ್ದು, ಸಂಚಾರಕ್ಕೆ ಪರದಾಡುವಂತಾಗಿದೆ.

ನದಿ ತೀರದಲ್ಲಿರುವ ಹೊಲಗಳಲ್ಲಿ ಬೆಳೆದ ಮೆಕ್ಕೆಜೋಳ, ಸೂರ್ಯಕಾಂತಿ, ಹತ್ತಿ, ಚೆಂಡು ಹೂ, ಸೇರಿದಂತೆ ವಿವಿಧ ಬೆಳೆಗಳು ಹಾನಿಗೀಡಾಗುವ ಆತಂಕದಲ್ಲಿ ರೆತರಿದ್ದಾರೆ. ಈ ಕುರಿತು ಪ್ರತಿಕ್ರಿಯಿಸಿರುವ ರಾಮದುರ್ಗ ತಹಸೀಲ್ದಾರ ಪ್ರಕಾಶ ಹೊಳೆಪ್ಪಗೋಳ, ನವಿಲುತೀರ್ಥ ಜಲಾಶಯದಿಂದ ಸುಮಾರು 18 ಸಾವಿರ ಕ್ಯೂಸೆಕ್​ಗೂ ಅಧಿಕ ನೀರು ಬಿಟ್ಟಲ್ಲಿ ಮಾತ್ರ ಜನವಸತಿ ಪ್ರದೇಶಕ್ಕೆ ತೊಂದರೆಯಾಗಲಿದೆ.

15 ಸಾವಿರ ಕ್ಯೂಸೆಕ್​ವರೆಗೂ ನೀರು ಬಿಟ್ಟಲ್ಲಿ ಬೆಳೆ ಹಾನಿ ಸಂಭವಿಸಲಿದೆ. ತಾಲೂಕು ಡಳಿತ ಪ್ರವಾಹ ಪರಿಸ್ಥಿತಿ ಎದುರಿಸಲು ಸಿದ್ಧತೆಗಳನ್ನು ಮಾಡಿಕೊಳ್ಳಲಾಗಿದೆ ಎಂದು ಹೇಳಿದ್ದಾರೆ.