ಮೂವರು ಸರಗಳ್ಳರ ಬಂಧನ

ಕೋಲಾರ: ಒಂಟಿ ಮಹಿಳೆಯರನ್ನೇ ಗುರಿಯಾಗಿಸಿಕೊಂಡು ಸರಗಳ್ಳತನ ಮಾಡುತ್ತಿದ್ದ ಮೂವರನ್ನು ಕೋಲಾರ ನಗರ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಮಂಡ್ಯ ಜಿಲ್ಲೆ ನಾಗಮಂಗಲದ ಶಶಿಧರ್​ (39), ಮಾಲೂರು ತಾಲೂಕಿನ ತೊರಹಳ್ಳಿ ಗ್ರಾಮದ ಹರ್ಷಿತ್​ (25) ಹಾಗೂ ಚಾಮರಾಜನಗರದ ಸೂರ್ಯ ಪ್ರಕಾಶ್​ (24) ಬಂಧಿತರು.

ಆರೋಪಿಗಳಿಂದ 8 ಲಕ್ಷ ರೂ. ಮೌಲ್ಯದ 95 ಗ್ರಾಂ ಚಿನ್ನ ಗಟ್ಟಿ ಹಾಗೂ ಕೃತ್ಯಕ್ಕೆ ಬಳಸುತ್ತಿದ್ದ ಸುಮಾರು 1 ಲಕ್ಷ ರೂ. ಮೌಲ್ಯದ ದ್ವಿಚಕ್ರ ವಾಹನ ವಶಕ್ಕೆ ಪಡೆದುಕೊಳ್ಳಲಾಗಿದೆ.

ಕೋಲಾರದ ಆರ್​.ವಿ. ಶಾಲೆ ಮುಂಭಾಗದ ಹೈವೇ ಸರ್ವೀಸ್​ ರಸ್ತೆ, ಜಯನಗರದ 5ನೇ ಕ್ರಾಸ್​ ಹಾಗೂ ಬಂಗಾರಪೆಟೆ ಪಟ್ಟಣದ 2 ಕಡೆಗಳಲ್ಲಿ ಮಹಿಳೆಯರಿಂದ ಚಿನ್ನದ ಸರಗಳನ್ನು ಕಿತ್ತುಕೊಂಡು ಹೋಗಿರುವುದಾಗಿ ಬಂಧಿತರು ಒಪ್ಪಿಕೊಂಡಿದ್ದು, ನ್ಯಾಯಾಂಗ ಬಂಧನಕ್ಕೆ ಒಳಪಡಿಸಲಾಗಿದೆ.

ಎಸ್ಪಿ ಬಿ.ನಿಖಿಲ್​ ಮಾರ್ಗದರ್ಶನದಲ್ಲಿ ಎಎಸ್ಪಿಗಳಾದ ರವಿಶಂಕರ್​, ಜಗದೀಶ್​, ಡಿವೈಎಸ್ಪಿ ಎಂ.ಎಚ್​.ನಾಗ್ತೆ ಮಾರ್ಗದರ್ಶನದಲ್ಲಿ ಕೋಲಾರ ನಗರ ಠಾಣೆ ಪೊಲೀಸ್​ ಇನ್​ಸ್ಪೆಕ್ಟರ್​ ಸದಾನಂದ, ಪಿಎಸ್​ಐ ಸೈಯದ್​ ಖಾಸಿಂ, ಸಿಬ್ಬಂದಿ ವಿ.ಎನ್​.ಮೋಹನ್​, ಆರ್​.ನಾರಾಯಣಸ್ವಾಮಿ, ಎಂ.ಶ್ರೀನಾಥ, ಮೆಹಬೂಬ್​ ಪಾಷಾ, ಗಂಗಾಧರ, ಅರ್ಚನಾ, ಚಾಲಕ ಮುರಳಿ, ಟೆಕ್ನಿಕಲ್​ ಸಿಬ್ಬಂದಿ ಮುರಳಿ, ಶ್ರೀನಾಥ ಕಾರ್ಯಾಚರಣೆಯಲ್ಲಿ ಭಾಗವಹಿಸಿದ್ದರು.