ಅದ್ದೂರಿ ವಾಲ್ಮೀಕಿ ಜಯಂತಿಗೆ ಚಿಂತನೆ

ಮಧುಗಿರಿ : ಶ್ರೀ ಮಹರ್ಷಿ ವಾಲ್ಮೀಕಿ ಎಲ್ಲ ವರ್ಗದವರಿಗೆ ಸೇರಿದವರಾಗಿದ್ದು, ಅಂತಹ ಮಹಾನ್​ ವ್ಯಕ್ತಿಯ ಜಯಂತಿಯನ್ನು ವಿಜೃಂಭಣೆಯಿಂದ ಆಚರಿಸಲು ಪ್ರತಿಯೊಬ್ಬರೂ ಸಹಕರಿಸಬೇಕು ಎಂದು ತಹಸೀಲ್ದಾರ್​ ಶ್ರೀನಿವಾಸ್​ ತಿಳಿಸಿದರು.

ತಹಸೀಲ್ದಾರ್​ ಕಚೇರಿ ಸಭಾಂಗಣದಲ್ಲಿ ತಾಲೂಕು ಆಡಳಿತ ಹಾಗೂ ಸಮಾಜ ಕಲ್ಯಾಣ ಇಲಾಖೆಯ ಸಹಯೋಗದೊಂದಿಗೆ ಕರೆಯಲಾಗಿದ್ದ ಜಯಂತಿಯ ಪೂರ್ವಭಾವಿ ಸಭೆಯಲ್ಲಿ ಮಾತನಾಡಿ, ಈ ಬಾರಿಯ ಜಯಂತಿಯು ಅರ್ಥಪೂರ್ಣವಾಗಿ ಹಾಗೂ ವಿಜೃಂಭಣೆಯಿಂದ ಆಚರಿಸಲು ತೀಮಾರ್ನಿಸಿದ್ದು, ಜಯಂತಿಗೆ ಶಾಸಕ ಕೆ.ಎನ್​.ರಾಜಣ್ಣ ಅವರನ್ನು ಆಹ್ವಾನಿಸಲಾಗುತ್ತದೆ. ಹಾಗಾಗಿ ಎಲ್ಲರೂ ಕೈ ಜೋಡಿಸಿ ಅರ್ಥಪೂರ್ಣವಾಗಿ ಆಚರಿಸಲು ಸಿದ್ಧತೆಗಳನ್ನು ಮಾಡಿಕೊಳ್ಳುವಂತೆ ತಿಳಿಸಿದರು.

ಸಮಾಜ ಕಲ್ಯಾಣ ಇಲಾಖೆಯ ಹಿರಿಯ ಸಹಾಯಕ ನಿರ್ದೇಶಕ ಡಾ.ದಿನೇಶ್​ ಮಾತನಾಡಿ, ಮಹರ್ಷಿ ವಾಲ್ಮೀಕಿಯ ಸಂದೇಶಗಳನ್ನು ಜಯಂತಿ ಕಾರ್ಯಕ್ರಮದಲ್ಲಿ ವಿಶೇಷವಾಗಿ ತಿಳಿಸಿಕೊಡಲು ಕ್ರಮವಹಿಸಲಾಗಿದೆ. ವಿವಿಧ ಕಲಾತಂಡಗಳೊಂದಿಗೆ ಅಂಬೇಡ್ಕರ್​ ವೃತ್ತದಿಂದ ಮೆರವಣಿಗೆ ಮೂಲಕ ಸಾಗಿ ಕನ್ನಡಭವನ ತಲುಪಿ ಅದ್ದೂರಿಯಾಗಿ ಕಾರ್ಯಕ್ರಮ ಆಚರಿಸಲು ತೀಮಾರ್ನಿಸಲಾಗಿದೆ ಎಂದರು.

ಪಿಎಸ್​ಐ ಮುತ್ತುರಾಜು, ಹಿರಿಯ ನಿಲಯಪಾಲಕ ಪಿ.ಚಿಕ್ಕರಂಗಪ್ಪ, ವ್ಯವಸ್ಥಾಪಕ ರಾಂಪ್ರಸಾದ್​, ತಾಲೂಕು ನಾಯಕ ಸಂಘದ ಗೌರವ ಅಧ್ಯಕ್ಷ ರಂಗಾಶ್ಯಾಮಣ್ಣ, ಅಧ್ಯಕ್ಷ ಜಗದೀಶ್​, ಕುಮಾರ್​, ಕಾರ್ಯದರ್ಶಿ ಶಂಕರನಾರಾಯಣ, ಕಿಶೋರ್​, ಚಿರಂಜೀವಿ, ಟಿವಿಎಸ್​ ಮಂಜು, ಚಂದ್ರಮ್ಮ, ಮಂಜುಳಾ, ಕಿರಿಯ ನಿಲಯಪಾಲಕ ಗೋವಿಂದರಾಜು, ಪಯಾಜ್​, ಮನೋಜ್​ ಮತ್ತಿತರರು ಇದ್ದರು.