ಬೇತಮಂಗಲ: ತೋಟದ ಮನೆಯೊಂದರಲ್ಲಿ ಕೆಲಸಕ್ಕೆ ಸೇರಿದ್ದವ ಮಾಲೀಕನ ಮನೆಯಲ್ಲಿದ್ದ ನಾಡ ಬಂದೂಕು ಮತ್ತು ಲಾಂಗ್ ಕದ್ದೊಯ್ದು ಜೈಲು ಸೇರಿದ್ದಲ್ಲದೇ ಕೆಲಸಕ್ಕೆ ಇಟ್ಟುಕೊಂಡಿದ್ದ ಮಾಲೀಕನಿಗೂ ಸಂಕಷ್ಟ ತಂದಿಟ್ಟಿದ್ದಾನೆ.
ಮಾಲೂರು ತಾಲೂಕಿನ ಸೀನಪ್ಪ ಬಂಧಿತ.
ಬೇತಮಂಗಲ ನಿವಾಸಿ ಕರಗ ನಾಗರಾಜ್ ಅವರು ತೋಟದ ಮನೆಯಲ್ಲಿ ವಾಸಿಸುತ್ತಿದ್ದು, 8 ದಿನಗಳ ಹಿಂದೆಯಷ್ಟೇ ಮಾಲೂರು ಪಕ್ಕದ ಹಳ್ಳಿಯ ಸೀನಪ್ಪ ಎಂಬುವವನನ್ನು ಕೆಲಸಕ್ಕೆ ಸೇರಿಸಿಕೊಂಡಿದ್ದರು. ಆದರೆ, ಸೀನಪ್ಪ, ಸೋಮವಾರ ರಾತ್ರಿ ಮಾಲೀಕರು ಮನೆಯಲ್ಲಿ ಇಲ್ಲದಿರುವುದನ್ನು ಗಮನಿಸಿ ನಾಡ ಬಂದೂಕು ಮತ್ತು ಲಾಂಗ್ ಎತ್ತಿಕೊಂಡು ಪರಾರಿಯಾಗಿದ್ದ. ಮಂಗಳವಾರ ಬೆಳಗ್ಗೆ ಬೇತಮಂಗಲ ಹೊರವಲಯದ ಗೊಸಿನಕೆರೆ ಪೈಪ್ಲೈನ್ ರಸ್ತೆಯಲ್ಲಿರುವ ಇಟ್ಟಿಗೆ ಕಾರ್ಖಾನೆ ಸಮೀಪ ಸೀನಪ್ಪ ಬಂದೂಕು&ಲಾಂಗ್ ಹಿಡಿದುಕೊಂಡು ಹೋಗುವುದನ್ನು ಕಂಡ ಜನರು ಭಯಗೊಂಡು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಪೊಲೀಸರು ಸ್ಥಳಕ್ಕೆ ಬಂದು ಸೀನಪ್ಪನನ್ನು ಬಂಧಿಸಿ ಬಂದೂಕು ಮತ್ತು ಲಾಂಗ್ ವಶಕ್ಕೆ ಪಡೆದಿದ್ದಾರೆ.
ತನಿಖೆಯಲ್ಲಿ ಮಾಲೀಕನ ಹೆಸರು: ವಿಚಾರಣೆ ನಡೆಸಿದ ಪೊಲೀಸರಿಗೆ ಸೀನಪ್ಪ, ನಾಗರಾಜ್ ಹೆಸರು ಬಾಯಿ ಬಿಟ್ಟಿದ್ದಾನೆ. ಈ ಹಿನ್ನೆಲೆಯಲ್ಲಿ ಪೊಲೀಸರು, ಕರಗ ನಾಗರಾಜ್ ಅವರನ್ನೂ ಬಂಧಿಸಿ ವಿಚಾರಣೆ ನಡೆಸಿದ್ದಾರೆ. ಮನೆಯಲ್ಲಿ ನಾಡ ಬಂದೂಕು ಇದ್ದಿದ್ದು ನಿಜ. ಆದರೆ, ಅದು ನನ್ನದಲ್ಲ ನನಗೆ ಕೊಟ್ಟಿದ್ದವರು ಈಗಾಗಲೇ ಮೃತಪಟ್ಟಿದ್ದಾರೆ ಎಂದು ವಿಚಾರಣೆಯಲ್ಲಿ ತಿಳಿಸಿದ್ದಾರೆ. ಶಸ್ತ್ರಾಸ್ತ್ರ ಕಳವು ಮಾಡಿದ್ದ ಸೀನಪ್ಪ ಮತ್ತು ಪರವಾನಗಿ ಇಲ್ಲದ ಶಸ್ತ್ರಾಸ್ತ್ರ ಹೊಂದಿದ್ದ ನಾಗರಾಜ್ ಈಗ ಜೈಲು ಪಾಲಾಗಿದ್ದಾರೆ.
