ಚುನಾವಣೆಗಷ್ಟೇ ಬಸರಾಳಿನ ನೆನಪು: ಮಂಡ್ಯ ವಿಧಾನಸಭಾ ಚುನಾವಣೆಯಲ್ಲಿ ಬಸರಾಳು ಪ್ರಮುಖ ಪಾತ್ರ ವಹಿಸುತ್ತವೆ. ಆದರೆ ಚುನಾವಣೆ ನಂತರ ಈ ಹೋಬಳಿಯನ್ನು ನಿರ್ಲಕ್ಷ್ಯ ಮಾಡಿದವರೇ ಹೆಚ್ಚು ಎನ್ನುವುದನ್ನು ಬಿಡಿಸಿ ಹೇಳಬೇಕಿಲ್ಲ. ಹಿಂದಿನಿಂದ ನಡೆದುಕೊಂಡು ಬಂದಿರುವ ಸಂಪ್ರದಾಯದಂತೆ ಈಗಲೂ ಹೋಗುತ್ತಿದೆ. ಚುನಾವಣೆ ಸಮಯದಲ್ಲಿ ಭರವಸೆಗಳ ಮಹಾಪೂರವನ್ನೇ ಹರಿಸಿ ಬಳಿಕ ನಿರ್ಲಕ್ಷೃ ಮಾಡಲಾಗುತ್ತಿದೆ.
ಇನ್ನು ಈ ವರ್ಷದ ವಿಷಯವನ್ನು ಪ್ರಸ್ತಾಪಿಸುವುದಾದರೆ ಕೃಷಿಗಂತೂ ನೀರು ಸಿಗುವುದು ಅನುಮಾನವಾಗಿದೆ. ಆದರೆ ಜನ, ಜಾನುವಾರುಗಳಿಗೆ ಕುಡಿಯಲು ತತ್ವಾರ ಎದುರಾಗುವ ಆತಂಕವಿದೆ. ಮೊದಲ ಮಳೆಯಾಶ್ರಿತ ಪ್ರದೇಶವಾಗಿರುವುದರಿಂದ ಕೆರೆ ಕಟ್ಟೆ ಖಾಲಿಯಾಗಿದ್ದು, ಬೋರ್ವೆಲ್ಗಳ ಅಂರ್ತಜಲವೂ ಕುಸಿಯುತ್ತಿದೆ.
ಬಸರಾಳಿಗೆ ಸಿಗದ ಗ್ಯಾರಂಟಿ: ಗ್ಯಾರಂಟಿ ಸರ್ಕಾರದ ಶಾಸಕರಾಗಿರುವ ರವಿಕುಮಾರ್ ಗಣಿಗ, ಈ ಬಾರಿ ಬೆಳೆಗೆ ನೀರು ಕೊಡುವುದು ಖಚಿತ. ಅಂತೆಯೇ ಬಸರಾಳು ಹೋಬಳಿ ವ್ಯಾಪ್ತಿಯ ಕೆರೆಗಳನ್ನು ತುಂಬಿಸುವುದು ನಿಶ್ಚಿತವೆಂದು ಹೇಳಿದರು. ಆದರೆ ಅಂತಹ ಯಾವುದೇ ಲಕ್ಷಣ ಕಂಡುಬರುತ್ತಿಲ್ಲ. ಮಾತ್ರವಲ್ಲದೆ ಮಂಡ್ಯದಲ್ಲಿ ಕಾವೇರಿ ಹೋರಾಟ ಹಾಗೂ ನೀರು ಸಿಗಲಿದೆಯೇ ಆತಂಕದಲ್ಲಿ ರೈತರಿದ್ದಾರೆ. ಈ ನಡುವೆ ಶಾಸಕರು, ಗೃಹ ಸಚಿವ ಡಾ.ಜಿ.ಪರಮೇಶ್ವರ್ ಅವರೊಂದಿಗೆ ಬಹರೇನ್ ದೇಶದ ಪ್ರವಾಸದಲ್ಲಿದ್ದಾರೆ. ಅಲ್ಲಿನ ಕನ್ನಡ ಭವನದಲ್ಲಿ ಆಯೋಜಿಸಿರುವ ಸಮಾರಂಭದಲ್ಲಿ ಪಾಲ್ಗೊಂಡಿದ್ದಾರೆ.
ಮಾತ್ರವಲ್ಲದೆ ಮಳವಳ್ಳಿ ಕ್ಷೇತ್ರದಲ್ಲಿಯೂ ಕೆರೆಗಳು ಖಾಲಿಯಾಗಿರುವ ಬಗ್ಗೆ ಇತ್ತೀಚೆಗೆ ಬರ ಸಂಬಂಧಿಸಿದ ಸಭೆಯಲ್ಲಿ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ ಶಾಸಕ ಪಿ.ಎಂ.ನರೇಂದ್ರಸ್ವಾಮಿ, ಬಳಿಕ ಕೆರೆಗೆ ನೀರು ತುಂಬಿಸುವ ಕೆಲಸ ಮಾಡುತ್ತಿದ್ದಾರೆ. ನಾಗಮಂಗಲ ಹಾಗೂ ಮೇಲುಕೋಟೆ ವಿಧಾನಸಭಾ ಕ್ಷೇತ್ರದ ಭಾಗದ ಕೆರೆಗಳನ್ನು ನೀರು ತುಂಬಿಸುವ ಪ್ರಕ್ರಿಯೆ ನಡೆಯುತ್ತಿದೆ. ಆದರೆ ಇತ್ತ ಮಂಡ್ಯ ಶಾಸಕರು ಗಮನಹರಿಸದಿರುವುದು ಆಕ್ಷೇಪಕ್ಕೆ ಕಾರಣವಾಗಿದೆ.
ಹೋಬಳಿಯಲ್ಲಿ ಬಿತ್ತನೆ ಎಷ್ಟೆಷ್ಟು?: ಬಸರಾಳು ಹೋಬಳಿಯಲ್ಲಿ ಭತ್ತ 975 ಹೆಕ್ಟೇರ್, ಜೋಳ 2 ಹೆಕ್ಟೇರ್, ರಾಗಿ 2,558 ಹೆಕ್ಟೇರ್, ಮುಸುಕಿನ ಜೋಳ 14 ಹೆಕ್ಟೇರ್ ಸೇರಿದಂತೆ 3,550 ಹೆಕ್ಟೇರ್ನಲ್ಲಿ ಏಕದಳ, ಹುರುಳಿ 400 ಹೆಕ್ಟೇರ್, ಅಲಸಂದೆ 39 ಹಾಗೂ ಅವರೆ 20 ಹೆಕ್ಟೇರ್, ಎಳ್ಳು 87 ಹೆಕ್ಟೇರ್, ಕಬ್ಬು(ತನಿ) 328 ಹಾಗೂ ಕಬ್ಬು(ಕೂಳೆ) 580 ಹೆಕ್ಟೇರ್ ಪ್ರದೇಶದಲ್ಲಿ ಬಿತ್ತನೆ ಮಾಡಲಾಗಿದೆ.
