ಹಾನಗಲ್ಲ ಹೊರತು ಪಡಿಸಿದರೆ ಅತಿ ಹೆಚ್ಚು ವ್ಯಾಪಾರ, ವಹಿವಾಟು ನಡೆಯುವುದು ಅಕ್ಕಿಆಲೂರಿನಲ್ಲಿಯೇ. ಸಮುದಾಯ ಆರೋಗ್ಯ ಕೇಂದ್ರ, ಎರಡು ಪದವಿ ಕಾಲೇಜುಗಳು, ತಾಲೂಕಿನ ಏಕೈಕ ಪಿಕಾರ್ಡ್ ಬ್ಯಾಂಕ್, ಕೆಸಿಸಿ ಬ್ಯಾಂಕ್, ಹಾವೇರಿ ಜಿಲ್ಲೆಯಲ್ಲಿಯೇ ದೊಡ್ಡ ಜಾನುವಾರು ಮಾರುಕಟ್ಟೆ, ಹತ್ತಾರು ಶಿಕ್ಷಣ ಸಂಸ್ಥೆಗಳಿವೆ. ಹೋಬಳಿಗೆ 16 ಗ್ರಾಪಂಗಳ 50ಕ್ಕೂ ಹೆಚ್ಚು ಗ್ರಾಮಗಳು ಒಳಪಡುತ್ತವೆ. ಇಂತಹ ಪಟ್ಟಣದಲ್ಲಿ ಒಂದೇ ಒಂದು ಸಾರ್ವಜನಿಕ ಶೌಚಗೃಹ ಇಲ್ಲದಿರುವುದು ಸಾರ್ವಜನಿಕರು ಮತ್ತು ವ್ಯಾಪಾರಿಗಳ ಆಕ್ರೋಶಕ್ಕೆ ಕಾರಣವಾಗಿದೆ. ನಿತ್ಯ ಜನದಟ್ಟಣೆ ಇರುವ ಸಿಂಧೂರ ಸಿದ್ದಪ್ಪ ವೃತ್ತ, ಪೇಟೆಓಣಿ, ಸಿ.ಎಂ. ಉದಾಸಿ ಹಾಗೂ ಮನೋಹರ ತಹಶೀಲ್ದಾರ ರಸ್ತೆಗಳಲ್ಲಿ ಹೆಚ್ಚು ಅಂಗಡಿ ಮುಂಗಟ್ಟು ಇದ್ದು, ಇಲ್ಲಿ ಶೌಚಗೃಹದ ಅಗತ್ಯವಿದೆ.
