ಪ್ರಸ್ತುತ 58 ವಿದ್ಯಾರ್ಥಿಗಳು ಕಲಿಯುತ್ತಿದ್ದು, ಓರ್ವ ಶಿಕ್ಷಕಿ, ಇಬ್ಬರು ಅತಿಥಿ ಶಿಕ್ಷಕಿಯರು ಕರ್ತವ್ಯದಲ್ಲಿದ್ದಾರೆ. ಈ ಮೊದಲು ಮೂವರು ಕಾಯಂ ಶಿಕ್ಷಕಿಯರಿದ್ದು, ಇಬ್ಬರು ವರ್ಗಾವಣೆಯಾಗಿದ್ದಾರೆ. ಮುಖ್ಯ ಶಿಕ್ಷಕರ ಹುದ್ದೆಯೂ ಖಾಲಿಯಿದ್ದು, ಈ ಹುದ್ದೆ ಭರ್ತಿಯಾಗಬೇಕಿದ್ದರೆ ಶಾಲೆಯಲ್ಲಿ 60 ವಿದ್ಯಾರ್ಥಿಗಳಿರಬೇಕು ಎಂಬುದು ಶಿಕ್ಷಣ ಇಲಾಖೆ ನಿಯಮ. ಈಗಿರುವ ಏಕೈಕ ಕಾಯಂ ಶಿಕ್ಷಕಿಯೇ ಮುಖ್ಯ ಶಿಕ್ಷಕಿಯ ಕರ್ತವ್ಯ ನಿರ್ವಹಿಸುವುದರೊಂದಿಗೆ ‘ನಲಿಕಲಿ’ ತರಗತಿ ನಿರ್ವಹಿಸಬೇಕಾದ ಅನಿವಾರ್ಯತೆ ಎದುರಾಗಿದೆ.
ಪ್ರಸ್ತುತ ಶಿಕ್ಷಣ ನೀತಿಯಂತೆ ಶಾಲೆಯಲ್ಲಿರುವ 58 ಶಿಕ್ಷಕರಿಗೆ ಮೂವರು ಕಾಯಂ ಶಿಕ್ಷಕರ ನೇಮಕವೇ ಆಗಿಲ್ಲ. ಅತಿಥಿ ಶಿಕ್ಷಕರ ನೇಮಕ ತಾತ್ಕಾಲಿಕ ಎಂಬುದು ಸ್ಥಳೀಯ ಶಿಕ್ಷಣ ತಜ್ಞರ ಅಭಿಮತ. ಸರ್ಕಾರಿ ಶಾಲೆಗಳಿಗೆ ಮಕ್ಕಳ ಸೇರ್ಪಡೆಗೆ ಸರ್ಕಾರ ವಿಭಿನ್ನ ಕಸರತ್ತು ಮಾಡುತ್ತಿದೆ. ಕನಿಷ್ಠ 15 ವಿದ್ಯಾರ್ಥಿಗಳಿರುವ ಶಾಲೆ ಮುಚ್ಚಬಾರದೆಂದು ಹೇಳುತ್ತಿರುವ ಸರ್ಕಾರ ಮತ್ತು ಶಿಕ್ಷಣ ಇಲಾಖೆ 58 ವಿದ್ಯಾರ್ಥಿಗಳಿರುವ ಕಲ್ಲಾಡಿ ಶಾಲೆಯ ಶಿಕ್ಷಕರ ಕೊರತೆ ನೀಗಿಸುವಲ್ಲಿ ವಿಫಲವಾಗಿದ್ದು, ಮಲತಾಯಿ ಧೋರಣೆ ಅನುಸರಿಸುತ್ತಿದೆ ಎಂಬ ಕೂಗು ಕೇಳಿ ಬಂದಿದೆ.
