ಇಲ್ಲಿಯ ರಂಗನಾಥ ನಗರದ ಬಳಿ ರೈಲು ನಿಲ್ದಾಣವಿದೆ. ಇಲ್ಲಿಂದ 2 ಕಿ.ಮೀ. ನಷ್ಟು ದೂರದ ಬಸ್ ನಿಲ್ದಾಣದವರೆಗೆ ನಗರದ ಪ್ರಮುಖ ರಸ್ತೆಯಿದೆ. ಈ ಮಾರ್ಗದಲ್ಲಿ ನಗರಸಭೆ, ಸರ್ಕಾರಿ ಪಶುಪಾಲನಾ ಆಸ್ಪತ್ರೆ, ಸರ್ಕಾರಿ ಹೆರಿಗೆ ಹಾಗೂ ಮಹಿಳೆಯರ ಆಸ್ಪತ್ರೆ, ಬಿಜೆಪಿ ಕಾರ್ಯಾಲಯ, ಮುಖ್ಯ ಅಂಚೆ ಕಚೇರಿ, ಬಿಎಸ್ಎನ್ಎಲ್ ಕಚೇರಿ, ತಾಪಂ ಸೇರಿ ಪ್ರಮುಖ ಸರ್ಕಾರಿ ಕಚೇರಿಗಳಿವೆ. ಇದೇ ಮಾರ್ಗದಲ್ಲಿ ಎಂ.ಜಿ. ರಸ್ತೆ, ನೆಹರು ಮಾರುಕಟ್ಟೆ, ಶಹರ ಪೊಲೀಸ್ ಠಾಣೆ ಸೇರಿ ಪ್ರಮುಖ ಸರ್ಕಾರಿ ಹಾಗೂ ವಿವಿಧ ಸಂಘ-ಸಂಸ್ಥೆಗಳಿಗೆ ಜನತೆ ಸಂಚರಿಸುತ್ತಾರೆ. ಇಂತಹ ಸ್ಥಳದಲ್ಲಿ ಸಾರ್ವಜನಿಕರಿಗೆ ಶೌಚಗೃಹದ ಅವಶ್ಯಕತೆ ಅಧಿಕವಾಗಿದೆ. ಆದರೆ, ಈ ಮಾರ್ಗದಲ್ಲಿ ಈವರೆಗೂ ನಗರಸಭೆ ಸಾರ್ವಜನಿಕ ಶೌಚಗೃಹ ನಿರ್ವಿುಸದಿರುವುದು ವಿಪರ್ಯಾಸವೇ ಸರಿ.
