ರಾಜ್ಯ ರೈಲ್ವೆ ವಲಯದ ಅಭಿವೃದ್ಧಿಗೆ ಉತ್ತೇಜನ ನೀಡುವ ಸಲುವಾಗಿ 2012-13ರಲ್ಲಿ ಅಂದಿನ ರೈಲ್ವೆ ಖಾತೆಯ ಮಾಜಿ ರಾಜ್ಯ ಸಚಿವ ಕೆ.ಎಚ್. ಮುನಿಯಪ್ಪ ಕೋಲಾರದಲ್ಲಿ 1,460 ಕೋಟಿ ರೂ. ವೆಚ್ಚದ ಪ್ರಯಾಣಿಕರ ರೈಲು ಬೋಗಿಗಳ ಉತ್ಪಾದನಾ ಘಟಕ ಸ್ಥಾಪನೆ ಕುರಿತು ಘೋಷಣೆಯಾಗುವಂತೆ ಮಾಡಿದ್ದರು. ಅದಾದ ನಂತರದ ಬಜೆಟ್ನಲ್ಲೂ ಅದು ಪುನರಾವರ್ತನೆಯಾಗಿತ್ತು. ಆದರೆ, ಅದು ಜಾರಿಯಾಗಿಲ್ಲ. ಅಂತಿಮವಾಗಿ ಮಲ್ಲಿಕಾರ್ಜುನ ಖರ್ಗೆ ರೈಲ್ವೆ ಸಚಿವರಾಗಿದ್ದಾಗ ಘಟಕ ಸ್ಥಾಪನೆಗೆ ಹಣ ಮೀಸಲಿಟ್ಟು, ಕೋಲಾರದಲ್ಲಿ ಯೋಜನೆಗಾಗಿ ಕಾಯ್ದಿರಿಸಲಾಗಿದ್ದ 1,123 ಎಕರೆ ಜಾಗದಲ್ಲಿ ಶಂಕುಸ್ಥಾಪನೆ ನೆರವೇರಿಸಿದ್ದರು. ನಂತರ ಸರ್ಕಾರಗಳು ಬದಲಾಗಿ, ಯೋಜನೆಗೆ ಗ್ರಹಣ ಹಿಡಿಯುವಂತಾಗಿತ್ತು.
