ಹೈಕೋರ್ಟ್​ಗೆ ಏ.4ರಂದು ಯುವತಿ ಹಾಜರು...

ಉಡುಪಿ ಎಸ್ಪಿ ಡಾ. ಅರುಣ ಕೆ. ಮಾಹಿತಿ

ಉಡುಪಿ ಯುವಕನಿಂದ ಅಪಹರಣ ಪ್ರಕರಣ

ವಿಜಯವಾಣಿ ಸುದ್ದಿಜಾಲ ಉಡುಪಿ

ತನ್ನ ಪುತ್ರಿ ಜೀನಾ ಮೆರಿಲ್​ (19) ಎಂಬಾಕೆಯನ್ನು ಮುಹಮ್ಮದ್​ ಅಕ್ರಮ್​ ಎಂಬಾತ ಅಪಹರಿಸಿರುವುದಾಗಿ ಕೊಡವೂರು ಗ್ರಾಮದ ಉದ್ದಿನಹಿತ್ಲು ಗ್ರಾಮದ ಗಾಡ್ವಿನ್​ ದೇವದಾಸ ಎಂಬವರು ನೀಡಿದ್ದ ದೂರಿಗೆ ಸಂಬಂಧಿಸಿ ಹೈಕೋರ್ಟ್​ನಲ್ಲಿ ಹೇಬಿಯಸ್​ ಕಾರ್ಪಸ್​ ಅರ್ಜಿ ಸಲ್ಲಿಕೆಯಾಗಿದೆ. ಆ ಹಿನ್ನೆಲೆಯಲ್ಲಿ ಅಪಹರಣಕ್ಕೆ ಒಳಗಾಗಿದ್ದಾಳೆ ಎನ್ನಲಾದ ಯುವತಿ ಏ.4ರಂದು ಹೈಕೋರ್ಟ್​ಗೆ ಹಾಜರಾಗಲಿದ್ದಾಳೆ ಎಂದು ಮಾ.29ರಂದು ಉಡುಪಿ ಜಿಲ್ಲಾ ಪೊಲೀಸ್​ ವರಿಷ್ಠ ಡಾ. ಅರುಣ ಕೆ. ಮಾಹಿತಿ ನೀಡಿದ್ದಾರೆ.

ರಕ್ಷಣೆ ನೀಡುವಂತೆ ಪತ್ರ

ಈ ವಿಚಾರವಾಗಿ ಮಾ.20ರಂದು ಉಡುಪಿ ನಗರ ಪೊಲೀಸ್​ ಠಾಣೆಯಲ್ಲಿ ಅಪಹರಣ ಪ್ರಕರಣ ದಾಖಲಾಗಿತ್ತು. ತನಿಖೆ ನಡೆಸಿದಾಗ ಮಾ.19ರಂದು ಜೀನಾ ಮೆರಿಲ್​ ಹಾಗೂ ಮುಹಮ್ಮದ್​ ಅಕ್ರಂ, ಉಡುಪಿಯ ಸಬ್​ ರಿಜಿಸ್ಟ್ರಾರ್​ ಕಚೇರಿಯಲ್ಲಿ ಮದುವೆ ಆಗುವುದಾಗಿ ಅರ್ಜಿ ಸಲ್ಲಿಸಿರುವುದು ತಿಳಿದುಬಂದಿದೆ. ಅಲ್ಲದೆ, ತಾವಿಬ್ಬರೂ ಸ್ವಯಂಪ್ರೇರಿತರಾಗಿ ಹೋಗಿದ್ದು, ನಮಗೆ ಸೂಕ್ತ ಪೊಲೀಸ್​ ರಕ್ಷಣೆ ನೀಡುವಂತೆ ಪತ್ರ ಬರೆದಿದ್ದಾರೆ ಎಂದು ಎಸ್ಪಿ ತಿಳಿಸಿದ್ದಾರೆ.

ಹೇಬಿಯಸ್​ ಕಾರ್ಪಸ್​ ಅರ್ಜಿ

ಇದೀಗ ಯುವತಿಯ ಪಾಲಕರು ಮಾ.28ರಂದು ಹೈಕೋರ್ಟ್​ನಲ್ಲಿ ತಮ್ಮ ಮಗಳ ಕುರಿತು ಹೇಬಿಯಸ್​ ಕಾರ್ಪಸ್​ ಅರ್ಜಿ ಸಲ್ಲಿಸಿದ್ದಾರೆ. ಈ ಸಂದರ್ಭದಲ್ಲಿ ಹಾಜರಿದ್ದ ಮುಹಮ್ಮದ್​ ಅಕ್ರಮ್​ ಹಾಗೂ ಯುವತಿಪರ ವಕೀಲರು, ಆಕೆಯನ್ನು ಏ.4ರಂದು ವಿಚಾರಣೆಗಾಗಿ ಹೈಕೋರ್ಟ್​ಗೆ ಹಾಜರುಪಡಿಸುವುದಾಗಿ ಹೇಳಿದ್ದಾರೆ. ಆದರೆ, ಈ ಕುರಿತು ಹೈಕೋರ್ಟ್​ನಿಂದ ಪೊಲೀಸರಿಗೆ ಯಾವುದೇ ನಿರ್ದೇಶನ ಬಂದಿಲ್ಲ ಎಂದು ತಿಳಿಸಿದ್ದಾರೆ.

ಸುದ್ದಿಗೋಷ್ಠಿಯಲ್ಲಿ ತಾಯಿ ಅಳಲು

ಮಾ.28ರಂದು ಯುವತಿಯ ತಾಯಿ ಮೇರುಸ್​ ಪುಷ್ಪಲತಾ ಉಡುಪಿಯಲ್ಲಿ ಸುದ್ದಿಗೋಷ್ಠಿ ನಡೆಸಿ, ತನ್ನ ಪುತ್ರಿಯನ್ನು ಅಪಹರಣ ಮಾಡಿರುವ ಮುಹಮ್ಮದ್​ ಅಕ್ರಮ್​ ಮದುವೆಯಾಗಿದ್ದಾನೆ. ಇದು ಲವ್​ ಜಿಹಾದ್​ ಪ್ರಕರಣವಾಗಿದ್ದು, ಈ ಕುರಿತು ದೂರು ನೀಡಿದರೂ ಸಹ ಪೊಲೀಸರು ಯಾವುದೇ ಕ್ರಮ ಕೈಗೊಳ್ಳುತ್ತಿಲ್ಲ ಎಂದು ಅಳಲು ವ್ಯಕ್ತಪಡಿಸಿದ್ದರು. ಅಲ್ಲದೆ, ಹೈಕೋರ್ಟ್​ನಲ್ಲಿ ಹೇಬಿಯಸ್​ ಕಾರ್ಪಸ್​ ಅರ್ಜಿ ಸಲ್ಲಿಸುವುದಾಗಿ ತಿಳಿಸಿದ್ದರು.