ಉಳ್ಳವರು ಸಮಾಜದ ಅಭಿವೃದ್ಧಿಗೆ ಕೈ ಜೋಡಿಸಲಿ

ವಿಜಯವಾಣಿ ಸುದ್ದಿಜಾಲ ಧಾರವಾಡ

ಸಾಮಾಜಿಕ ಕಳಕಳಿ ಹೊಂದಿದ ಲಯನ್ಸ್​ ಕ್ಲಬ್​ನಂತಹ ಸಂಘ-ಸಂಸ್ಥೆಗಳಿಗೆ ಸದಸ್ಯರು ಸೇರಿ ಉಳ್ಳವರು ದಾನ ನೀಡುವ ಮೂಲಕ ಸಮಾಜದ ಅಭಿವೃದ್ಧಿಗೆ ಕೈ ಜೋಡಿಸಬೇಕು ಎಂದು ಲಯನ್ಸ್​ ಜಿಲ್ಲಾ ಗವರ್ನರ್​ ಮನೋಜ ಮಾನೇಕ್​ ಮನವಿ ಮಾಡಿದರು.

ನಗರದ ಖಾಸಗಿ ಹೋಟೆಲ್​ನಲ್ಲಿ ಇತ್ತೀಚೆಗೆ ಏರ್ಪಡಿಸಿದ್ದ ಲಯನ್ಸ್​ ಕ್ಲಬ್​ನ ವಾರ್ಷಿಕೊತ್ಸವ ಸಮಾರಂಭದಲ್ಲಿ ಅವರು ಮಾತನಾಡಿದರು.

ಸಮಾಜದ ಆರ್ಥಿಕ ಸ್ಥಿತಿಗತಿಯಲ್ಲಿ ಏರಿಳಿತ ಸಮಾನ್ಯ. ಈ ನಿಟ್ಟಿನಲ್ಲಿ ಸಮಾಜದ ಸಮತೋಲನಕ್ಕಾಗಿ ಅಭಿವೃದ್ಧಿ ಕಾರ್ಯಗಳನ್ನು ಕೈಗೆತ್ತಿಕೊಳ್ಳುವ ಸಂಘ-ಸಂಸ್ಥೆಗಳಿಗೆ ಉಳ್ಳವರು ದಾನ ಮಾಡುವ ಮೂಲಕ ಬಡ ಜನರ ಹಾಗೂ ಅಶಕ್ತ ಸಮುದಾಯಕ್ಕೆ ಬಲ ನೀಡುವ ಕೆಲಸ ಮಾಡಬೇಕು ಎಂದರು.

ಧಾರವಾಡ ಲಯನ್ಸ್​ ಕ್ಲಬ್​ 60 ವರ್ಷಗಳಿಂದ ಸಮಾಜದ ಉನ್ನತಿಗೆ ಸೇವೆ ಸಲ್ಲಿಸುತ್ತಿದೆ. ಪ್ರಸ್ತುತ ಸಂದರ್ಭದಲ್ಲೂ ಸಮಾಜದಲ್ಲಿರುವ ಮೂಲಭೂತ ಸಮಸ್ಯೆಗಳಿಗೆ ಪರಿಹಾರ ಒದಗಿಸುವ ನಿಟ್ಟಿನಲ್ಲಿ ಕೆಲಸ ಮಾಡಲಿ. ಸರ್ಕಾರಿ ಶಾಲೆ-ಕಾಲೇಜುಗಳಲ್ಲಿ ವಿದ್ಯಾರ್ಥಿಗಳಿಗೆ ಶೌಚಗೃಹ ಸೌಲಭ್ಯ ಕಲ್ಪಿಸುವಲ್ಲಿ ಹೆಚ್ಚು ಕಾರ್ಯೋನ್ಮುಖವಾಗಲಿ. ಸಾಮಾಜಿಕ ಕಳಕಳಿಯ ಇಂತಹ ಸಂಸ್ಥೆಗಳಿಗೆ ಯುವಕರು ಸದಸ್ಯರಾಗುವ ಮೂಲಕ ಗ್ರಾಮೀಣಾಭಿವೃದ್ಧಿಗೆ ಶ್ರಮಿಸಬೇಕು ಎಂದರು.

ಅಧ್ಯಕ್ಷತೆ ವಹಿಸಿದ್ದ ಕ್ಲಬ್​ ಅಧ್ಯಕ್ಷ ಗುರುರಾಜ ಪಿಸೆ ಮಾತನಾಡಿದರು. ಕವಿತಾ ಅಂಗಡಿ ಸೇವಾ ಕಾರ್ಯಗಳನ್ನು ವಿವರಿಸಿದರು. ಕ್ಲಬ್​ ನೂತನ ಸದಸ್ಯರಾದ ಡಾ. ಅಶ್ವಿನ್​ ಕುಲಕರ್ಣಿ, ರಶ್ಮಿ ಭಾರದ್ವಾಜ, ಡಾ. ರಮೇಶ ಹೆಬ್ಬಳ್ಳಿ, ಡಾ. ಶ್ರೇಯಾ ಪಾಸ್ತೆ, ಜಯಂತ ಇಟಗಿ, ಸಂತೋಷ ಮೇಸ್ತ್ರಿ, ಷಣ್ಮುಖ ಸವಣೂರ, ಗಿರೀಶ ಅಂಗಡಿ ಅವರಿಗೆ ಜಿಲ್ಲಾ ಗವರ್ನರ್​ ಪ್ರತಿಜ್ಞಾ ವಿಧಿ ಬೋಧಿಸಿದರು.

ಹರ್ಷ ದೇಸಾಯಿ, ಅರವಿಂದ ಹೆಬಸೂರ, ಖಜಾಂಚಿ ವೃಷಭ ಕರೋಲೆ, ಆರ್​.ಕೆ. ಹೆಗಡೆ, ಮುಕುಂದ ಹೆಬ್ಳೀಕರ, ಶೈಲಾ ಕರಗುದರಿ, ರಾಜೀವ ಪಾಟೀಲ ಕುಲಕರ್ಣಿ, ಡಾ. ಅನಿರುದ್ಧ ಕುಲಕರ್ಣಿ, ವಿನಾಯಕ ಜೋಶಿ, ಇತರರು ಇದ್ದರು.