ಸೋಂಕಿತನ ಗ್ರಾಮ ನಿರ್ಲಕ್ಷ್ಯ ; ಕೆಳಹಂತದಲ್ಲಿ ಅನುಷ್ಠಾನವಾಗದ ಜಿಲ್ಲಾಡಳಿತದ ಆದೇಶ

ತುಮಕೂರು: ಜಿಲ್ಲೆಯಲ್ಲಿ ಪತ್ತೆಯಾಗುವ ಕರೊನಾ ಪ್ರಕರಣಗಳ ಪ್ರಾಥಮಿಕ ಹಾಗೂ ದ್ವಿತೀಯ ಸಂಪರ್ಕಿತರನ್ನು ಜಿಲ್ಲಾಡಳಿತ ನಿರ್ಲಕ್ಷಿಸುತ್ತಿರುವುದೇ ಸೋಂಕಿತರ ಸಂಖ್ಯೆ ಹೆಚ್ಚಾಗಲು ಕಾರಣ ಎಂಬ ದೂರುಗಳಿವೆ.

ಪಾವಗಡ ತಾಲೂಕು ಚಿತ್ತಗಾನಹಳ್ಳಿಯಲ್ಲಿ ಮಂಗಳವಾರ 38 ವರ್ಷದ ವ್ಯಕ್ತಿಗೆ ಕರೊನಾ ದೃಢಪಟ್ಟಿದ್ದು, ಬುಧವಾರ ಸಂಜೆಯಾದರೂ ಗ್ರಾಮಕ್ಕೆ ಯಾವೊಬ್ಬ ಅಧಿಕಾರಿ, ಸಿಬ್ಬಂದಿಯೂ ಆಗಮಿಸದಿರುವುದು ಜನರಲ್ಲಿ ಆತಂಕ ಹೆಚ್ಚಿಸಿದೆ.

ಬೆಂಗಳೂರಿನ ಪೆಟ್ರೋಲ್ ಬಂಕ್‌ನಲ್ಲಿ ಕೆಲಸ ಮಾಡುತ್ತಿದ್ದ 38 ವರ್ಷದ ವ್ಯಕ್ತಿಗೆ ವಾರದಿಂದ ರೋಗ ಲಕ್ಷಣ ಕಾಣಿಸಿದ್ದು, ಊರೆಲ್ಲ ಅಡ್ಡಾಡಿದ್ದಾರೆ. ಹಾಗಾಗಿ, ಸೋಂಕು ಹರಡುವುದನ್ನು ತಪ್ಪಿಸಲು ಸ್ಥಳೀಯರ ಕ್ವಾರಂಟೈನ್ ಅಗತ್ಯವಾಗಿದ್ದರೂ ಅಧಿಕಾರಿಗಳು ಗ್ರಾಮಕ್ಕೆ ಕಾಲಿಡದಿರುವುದು ಭಯ ಮೂಡಿಸಿದೆ.

ಮಂಗಳವಾರ ವ್ಯಕ್ತಿಗೆ ಸೋಂಕು ದೃಢವಾದ ಕೂಡಲೇ ದೂರವಾಣಿಯಲ್ಲಿ ಸಂಪರ್ಕಿಸಿ ಆಸ್ಪತ್ರೆಗೆ ಕರೆಸಿಕೊಂಡು ಕ್ವಾರಂಟೈನ್ ಮಾಡಿರುವ ಆರೋಗ್ಯ ಇಲಾಖೆ ಅಧಿಕಾರಿಗಳು ನಂತರ ಊರ ಕಡೆ ತಿರುಗಿಯೂ ನೋಡಿಲ್ಲ. ಇವೆಲ್ಲ ಘಟನೆಗಳನ್ನು ಅವಲೋಕಿಸಿದಾಗ ಜಿಲ್ಲಾಡಳಿತದ ಯೋಜನೆಗಳು ಕೆಳಹಂತದಲ್ಲಿ ಅನುಷ್ಠಾನವಾಗುತ್ತಿಲ್ಲ ಎಂಬುದು ಸ್ಪಷ್ಟವಾಗಿದೆ. ಚಿತ್ತಗಾನಹಳ್ಳಿಯಲ್ಲಿ ಅಧಿಕಾರಿಗಳ ವೈಫಲ್ಯಗಳನ್ನು ಜಿಲ್ಲಾಧಿಕಾರಿ, ಜಿಲ್ಲಾ ಆರೋಗ್ಯಾಧಿಕಾರಿ ಗಮನಕ್ಕೂ ಸ್ಥಳೀಯರು ತಂದರೂ ಪ್ರಯೋಜನವಾಗಿಲ್ಲ ಎಂದು ದೂರಿದ್ದಾರೆ.