ಊರ ತುಂಬ ಬಾಯ್ತೆರೆದು ನಿಂತಿವೆ ರಸ್ತೆಗುಂಡಿ

ಹುಬ್ಬಳ್ಳಿ: ಎರಡು ವಾರ ನಿರಂತರ ಸುರಿದ ಮಳೆಯಿಂದಾಗಿ ಸುಸ್ತಾಗಿ ಹೋಗಿದ್ದ ಹುಬ್ಬಳ್ಳಿ ಧಾರವಾಡ ಜನತೆ ಇದೀಗ ಹೊಸ ಸಮಸ್ಯೆ ಎದುರಿಸುತ್ತಿದ್ದಾರೆ. ಮಳೆಗಾಲದಲ್ಲಿ ಎಲ್ಲೆಂದರಲ್ಲಿ ಬಿದ್ದಿದ್ದ ತೆಗ್ಗು ಗುಂಡಿಗಳು ಇದೀಗ ಗೋಚರವಾಗುತ್ತಿವೆ. ಮಳೆ ನಿಂತು ಹೋದ ಮೇಲೆ ಒಂದೊಂದೇ ರಸ್ತೆ ಗುಂಡಿಗಳು ಬಾಯ್ತೆರೆದಿರುವುದು ಕಂಡು ಬರುತ್ತಿವೆ.

ಹೌದು. ಇದು ಹುಬ್ಬಳ್ಳಿ ಮಹಾನಗರದ ಪ್ರಸ್ತುತ ಸ್ಥಿತಿ. ನಗರದ ಪ್ರಮುಖ ರಸ್ತೆಗಳು, ಒಳರಸ್ತೆಗಳಲ್ಲಿ ಎಲ್ಲೆಂದರಲ್ಲಿ ಗುಂಡಿಗಳು ಕಾಣುತ್ತಿವೆ. ವಾಹನ ಸವಾರರು ಎದ್ದು ಬಿದ್ದು ಸಾಗಬೇಕಿದೆ. ಮಳೆಗಾಲದಲ್ಲಿ ಒಂದು ರೀತಿಯ ತೊಂದರೆ, ಯಾತನೆ ಅನುಭವಿಸಿದ ಜನ ಈಗ ತೆಗ್ಗು ಗುಂಡಿಗಳಿಂದ ರೋಸಿ ಹೋಗಿದ್ದಾರೆ.

ನ್ಯೂ ಕಾಟನ್ ಮಾರ್ಕೆಟ್‌ನಿಂದ ಕಿಮ್ಸ್ ಹಿಂಬದಿ ರಸ್ತೆ, ಕಾರವಾರ ರಸ್ತೆ ಗಣೇಶನಗರ, ಹಳೇ ಹುಬ್ಬಳ್ಳಿ ಆನಂದನಗರ ರಸ್ತೆಗಳಲ್ಲಿ ಸಂಚರಿಸಲು ಸಾಧ್ಯವಿಲ್ಲ. ಸಿಮೆಂಟ್ ರಸ್ತೆ ಕಾಮಗಾರಿ ಪ್ರಗತಿಯಲ್ಲಿರುವ ಅಶೋಕನಗರ, ವಿಶ್ವೇಶ್ವರನಗರ, ಅಧ್ಯಾಪಕನಗರ, ವಿಜಯನಗರದಲ್ಲಿನ ರಸ್ತೆಯ ಸ್ಥಿತಿಯೇ ಬೇರೆ. ಸುಧಾರಿತ ರಸ್ತೆ ನಿರ್ಮಾಣಕ್ಕೆ ಕಾಮಗಾರಿ ನಡೆಯುತ್ತಿದೆ ಎಂಬುದು ಸಮಾಧಾನದ ಸಂಗತಿಯಾದರೂ, ಕಾಮಗಾರಿ ನಿಧಾನವಾಗಿ ನಡೆಯುತ್ತಿರುವುದು ಜನರ ಆಕ್ರೋಶಕ್ಕೆ ಕಾರಣವಾಗಿದೆ.

ಧೂಳುಮಯ ವಾತಾವರಣ: ಧೂಳಿನ ಹುಬ್ಬಳ್ಳಿ ಎಂದೇ ಖ್ಯಾತವಾಗಿದ್ದ ನಗರದಲ್ಲಿ ಈಗಷ್ಟೇ ಕಾಂಕ್ರೀಟ್ ರಸ್ತೆ ನಿರ್ಮಾಣ ಆರಂಭವಾದ ನಂತರ ಜನರು ಒಂದಿಷ್ಟು ನಿರಾಳರಾಗಿದ್ದರು. ಆದರೆ, ಬಹುತೇಕ ಕಡೆಗಳಲ್ಲಿ ಕಾಂಕ್ರೀಟ್ ರಸ್ತೆ ಪೂರ್ತಿಯಾಗಿಲ್ಲ.

ಇನ್ನು ಪೂರ್ತಿ ಆಗಿರುವ ರಸ್ತೆಗಳ ಮೇಲೆ ಮಳೆ ನಿಂತ ನಂತರ ಹರಡಿಕೊಂಡಿದ್ದ ರಾಡಿ ಬಿಸಿಲು ಬೀಳುತ್ತಲೆ ಒಣಗಿ ಧೂಳು ಹಾರುತ್ತಿದೆ. ಹಾಗಾಗಿ ವಾಹನಗಳು ಹಾಯ್ದು ಹೋಗುತ್ತಲೇ ಧೂಳು ಎಲ್ಲೆಡೆ ಆವರಿಸುತ್ತಿದೆ. ಮತ್ತೆ ಹುಬ್ಬಳ್ಳಿ ಧೂಳುಮಯವಾಗುತ್ತಿದೆ. ಇದರಿಂದಾಗಿ ಮಹಾನಗರದ ಜನರ ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀರುತ್ತಿದೆ. ತೆಗ್ಗು ಗುಂಡಿಗೆ ಬಿದ್ದು ಬೈಕ್, ಕಾರು ಚಲಿಸುವುದರಿಂದ ಸವಾರರು ತೀವ್ರ ಯಾತನೆ ಅನುಭವಿಸುತ್ತಿದ್ದಾರೆ. ಅದರಲ್ಲೂ ಬೈಕ್ ಸವಾರರು ಕೈ-ಕಾಲು ಮುರಿದುಕೊಳ್ಳುವ ಸಾಧ್ಯತೆಗಳಿವೆ.

ಗುಂಡಿ ತುಂಬಿ: ಮಹಾನಗರ ಪಾಲಿಕೆ ಕೂಡಲೇ ಗುಂಡಿ ತುಂಬುವ ಕೆಲಸ ಮಾಡಬೇಕು. ಎಲ್ಲ ಕಡೆ ಸಂಚರಿಸಿ ಮೊದಲು ಎಲ್ಲೆಲ್ಲಿ ಗುಂಡಿಗಳಿವೆ ಪರಿಶೀಲನೆ ಮಾಡಬೇಕು. ನಂತರ ಜಲ್ಲಿ, ಡಾಂಬರ್ ಅಥವಾ ಕಾಂಕ್ರೀಟ್ ಹಾಕಿ ಭರ್ತಿ ಮಾಡಬೇಕು. ಇದರಿಂದ ತಾತ್ಕಾಲಿಕ ಪರಿಹಾರವಾದರೂ ಸಿಗಲಿದೆ ಎಂಬುದು ಸಾರ್ವಜನಿಕರ ಆಗ್ರಹವಾಗಿದೆ.

ಬಹಳಷ್ಟು ಕಡೆಗಳಲ್ಲಿ ಕಾಂಕ್ರೀಟ್ ರಸ್ತೆ ಪಕ್ಕದಲ್ಲಿ ಹಾಕಲಾಗಿರುವ ಪೇವರ್ಸ್‌ಗಳು ಅಸ್ತವ್ಯಸ್ತವಾಗಿರುವುದರಿಂದ ಬೈಕ್ ಸವಾರರಿಗೆ ಕಿರಿಕಿರಿ ಉಂಟಾಗುತ್ತಿದೆ. ರಸ್ತೆಗೆ ಹೊಂದಿಕೊಂಡು ಪೇವರ್ಸ್‌ ಇವೆ. ಆದರೆ, ಇವು ಕೆಲವೆಡೆ ಎತ್ತರ, ಇನ್ನೂ ಕೆಲವೆಡೆ ಕಿರಿದಾಗಿವೆ. ಇಂತಹ ಸ್ಥಳಗಳಲ್ಲಿ ಬೈಕ್‌ಗಳು ಸ್ಕಿಡ್ ಆಗುತ್ತಿವೆ ಎಂಬುದು ಸವಾರರು ದೂರು.

ಕಟ್ಟಿಕೊಂಡಿರುವ ಒಳಚರಂಡಿ: ಮಹಾನಗರದ ಅನೇಕ ಸ್ಥಳಗಳಲ್ಲಿ ಒಳಚರಂಡಿ ಮಾರ್ಗಗಳು ಮಳೆಗಾಲದಲ್ಲಿ ಕಟ್ಟಿಕೊಂಡು ಅವಾಂತರ ಸೃಷ್ಟಿ ಮಾಡಿದವು. ಮಳೆ ನೀರಿನೊಂದಿಗೆ ಕೊಳಚೆಯೂ ಬಹಳಷ್ಟು ಕಡೆ ಹರಿಯಿತು. ಇದೀಗ ಮಳೆ ಕಡಿಮೆಯಾಗಿದ್ದು, ಕೊಳಚೆ ಮಾತ್ರ ಹೊರಗೆ ಹರಿಯುತ್ತಿದೆ. ಇಂಥವುಗಳನ್ನು ಒಂದಿಷ್ಟು ದುರಸ್ತಿ ಮಾಡಬೇಕಾಗಿದೆ.