ಮಂಗಳೂರಿಗೆ ಬಂದ ಕದನ ಕಲಿ ಟಿ-55 ಯುದ್ಧ ಟ್ಯಾಂಕ್ ಗೆ ಲಭಿಸಿದ ನೆಲೆ

ಸರ್ಕೀಟ್ ಹೌಸ್ ಬಳಿ ಇರುವ ಕದ್ರಿ ಯುದ್ಧ ಸ್ಮಾರಕದ ಬಳಿಯಲ್ಲಿ ಮಹಾನಗರ ಪಾಲಿಕೆ ವತಿಯಿಂದ ನಿರ್ಮಿಸಲಾದ ವೇದಿಕೆಯಲ್ಲಿ ಬುಧವಾರ ಬೃಹತ್ ಕ್ರೇನ್ ಮೂಲಕ ಯುದ್ಧ ಟ್ಯಾಂಕರನ್ನು ಎತ್ತಿ ಜೋಡಿಸಲಾಗಿದೆ. ವರ್ಷದ ಹಿಂದೆಯೇ ಮಂಗಳೂರಿಗೆ ತರಲಾಗಿದ್ದರೂ, ಸೂಕ್ತ ವ್ಯವಸ್ಥೆ ಆಗುವ ತನಕ ಸರ್ಕೀಟ್ ಹೌಸ್ ಆವರಣದಲ್ಲಿ ಟರ್ಪಾಲು ಮುಚ್ಚಿ ಇಡಲಾಗಿತ್ತು.

ಈ ಯುದ್ಧ ಟ್ಯಾಂಕ್‌ನ್ನು ಸಂಸದ ಕ್ಯಾ.ಬ್ರಿಜೇಶ್ ಚೌಟ ಅವರು ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಅವರಿಗೆ ಮನವಿ ಮಾಡಿ ತರಿಸಿಕೊಂಡಿದ್ದರು. ಭಾರತೀಯ ಸೇನೆಯಲ್ಲಿ 1961ರಿಂದ 2001ರ ವರೆಗೆ ಸೇವೆಯಲ್ಲಿದ್ದ ಈ ಯುದ್ದ ಟ್ಯಾಂಕ್‌ನ್ನು ಪುಣೆಯಲ್ಲಿರುವ ಭಾರತೀಯ ಸೇನೆಯ ಡಿಪೋದಲ್ಲಿ ಇರಿಸಲಾಗಿತ್ತು. 40 ಟನ್ ತೂಕವಿರುವ ಟಿ -55 ಯುದ್ದ ಟ್ಯಾಂಕ್‌ನ್ನು ವಿಶೇಷ ಟ್ರೈಲರ್‌ನಲ್ಲಿ 2025 ಆಗಸ್ಟ್‌ನಲ್ಲಿ ಮಂಗಳೂರಿಗೆ ತರಲಾಗಿತ್ತು.

ಯುದ್ಧ ಬಳಕೆಯ ಟ್ಯಾಂಕ್ ಮಂಗಳೂರು ಪ್ರವಾಸೋದ್ಯಮಕ್ಕೂ ಮೆರುಗು ತರಲಿದೆ. ಮಂಗಳೂರಿನಲ್ಲಿ ಐದಾರು ತಿಂಗಳು ನಿರಂತರ ಮಳೆ, ಪ್ರಖರ ಬಿಸಿಲು ಬೀಳುವ ಸ್ಥಳ. ಸಮುದ್ರವೂ ಹತ್ತಿರದಲ್ಲೇ ಇರುವುದರಿಂದ ಉಪ್ಪಿನ ಅಂಶ ಇರುವ ಗಾಳಿ ಬೀಸುವುದರಿಂದ ಯುದ್ದ ಟ್ಯಾಂಕ್ ತುಕ್ಕು ಹಿಡಿಯದಂತೆ ಕಾಲ ಕಾಲಕ್ಕೆ ನಿರ್ವಹಣೆ ಮಾಡಬೇಕಿದೆ.

ಸಿಗಲಿ ಮಹಾನ್ ಗೌರವ

ಸಾಮಾನ್ಯವಾಗಿ ದೇಶದ ಜನರಿಗೆ ಯುದ್ಧವೆಂದರೆ ಅದೊಂದು ರೋಚಕ ಕ್ಷಣ. ತ್ಯಾಗ, ರೋಷ, ದೇಶಭಕ್ತಿ ಹಾಗೂ ಕರ್ತವ್ಯದ ಸಾರ ತುಂಬಿಕೊಂಡಿರುವ ಯುದ್ಧದ ಒಂದು ಸಣ್ಣ ವಸ್ತುವು ನಮ್ಮ ಕಣ್ಮುಂದೆ ನೋಡಲು ಸಿಕ್ಕರೆ ನಾವು ಅದಕ್ಕೆ ಮಹಾನ್ ಗೌರವ ಕೊಡುತ್ತೇವೆ. ಹೀಗೊಂದು ಸದಾವಕಾಶ ಈಗ ಮಂಗಳೂರಿನ ಜನರಿಗೆ ಒಲಿದಿದೆ. ಈ ಮೂಲಕ ಯುದ್ದ ಟ್ಯಾಂಕ್‌ಗೆ ಗೌರವ ಸಿಗುವ ಜತೆಗೆ ಯುವ ಮನಸ್ಸುಗಳಿಗೆ ಸೈನ್ಯಕ್ಕೆ ಸೇರುವ ಕಿಚ್ಚು ಹೆಚ್ಚಾಗಲಿ.