ಎರಡು ದಶಕಗಳಿಂದ ರಸ್ತೆಗಾಗಿ ಹೋರಾಟ

ಹಿರಿಕರ ರವಿ ಸೋಮವಾರಪೇಟೆ

ಕೃಷಿ ಕಾಯಕದಲ್ಲಿ ಬದುಕು ಕಟ್ಟಿಕೊಂಡಿರುವ ಯಲಕನೂರು ಹೊಸಳ್ಳಿ ಗ್ರಾಮದ ರೈತರಿಗೆ ಎರಡು ದಶಕದಿಂದ ರಸ್ತೆಗಾಗಿ ಹೋರಾಟ ಮಾಡಬೇಕಾದ ದುರ್ಗತಿ ಬಂದಿದೆ.

ಹೋರಾಟ, ಪ್ರತಿಭಟನೆ ಮಾಡಿದರೂ ರಸ್ತೆಗೆ ಅನುದಾನ ಸಿಗದೇ ಗ್ರಾಮ ನಿವಾಸಿಗಳು ತಲೆ ಮೇಲೆ ಕೈ ಇಟ್ಟುಕೊಳ್ಳುವಂತಾಗಿದೆ. ಸರ್ಕಾರದ ಮೇಲೆ ಒತ್ತಡ ತಂದು ಅನುದಾನ ತರಲು ಜನಪ್ರತಿನಿಧಿಗಳಿಗೆ ಹಾಗು ಅಧಿಕಾರಿಗಳಿಗೆ ಸಾಧ್ಯವಾಗದಿರುವುದು ದುರಂತವೇ ಸರಿ ಎಂದು ರಾಜ್ಯದ ನಂ.೧ ಪತ್ರಿಕೆ ವಿಜಯವಾಣಿ ವತಿಯಿಂದ ಭಾನುವಾರ ಆಯೋಜಿಸಿದ್ದ ಗ್ರಾಮ ಸಂಚಾರದಲ್ಲಿ ಗ್ರಾಮಸ್ಥರು ದೂರಿದ್ದಾರೆ.

ಸೋಮವಾರಪೇಟೆಯಿಂದ ಕುಶಾಲನಗರಕ್ಕೆ ಸಂಪರ್ಕ ಕಲ್ಪಿಸುವ ಮಸಗೋಡು, ನೇರುಗಳಲೆ, ಅರೆಯೂರು, ಸೀಗೆಹೊಸೂರು, ಕಣಿವೆ ಮಾರ್ಗದ ರಸ್ತೆ ಯಲಕನೂರು ಹೊಸಳ್ಳಿ ಗ್ರಾಮದಲ್ಲಿ ಹಾದುಹೋಗುತ್ತದೆ. ಅರೇಯೂರು ಗ್ರಾಮದಿಂದ ಕಣಿವೆಗೆ ತೆರಳುವ ರಸ್ತೆ ಸಂಪೂರ್ಣ ಹಾಳಾಗಿದೆ. ಗುಂಡಿಗಳ ಮಧ್ಯೆ ರಸ್ತೆ ಹುಡುಕುವುದೇ ಕಷ್ಟ ಸಾಧ್ಯವಾಗಿದೆ.

ಇದೇ ರಸ್ತೆಯಲ್ಲಿ ಗ್ರಾಮದ ಜನರು ಸಂಚರಿಸಬೇಕು. ವಾಹನಗಳನ್ನು ಚಾಲಿಸಬೇಕು. ವಿದ್ಯಾರ್ಥಿಗಳು ಕಾಲ್ನಡಿಗೆಯಲ್ಲಿ ಶಾಲಾ ಕಾಲೇಜಿಗೆ ತೆರಳಬೇಕು. ಕಲ್ಲುಗಣಿಗಾರಿಕೆ ಮತ್ತು ಕಾಡಾನೆಗಳು ಹೊಸಳ್ಳಿ ಗ್ರಾಮದ ರೈತರ ನೆಮ್ಮದಿಯನ್ನು ಕಸಿದುಕೊಂಡಿವೆ. ಗ್ರಾಮ ವ್ಯಾಪ್ತಿಯಲ್ಲಿ ೪೦ ಕಲ್ಲುಗಣಿಗಳು ಕಾರ್ಯನಿರ್ವಹಿಸುತ್ತಿದೆ. ಪ್ರತಿದಿನ ಹೆಚ್ಚಿನ ಟಿಪ್ಪರ್‌ಗಳು ಸಂಚರಿಸುತ್ತವೆ. ಇಡೀ ಗ್ರಾಮ ಪ್ರತಿದಿನ ಧೂಳುಮಯವಾಗಿರುತ್ತದೆ. ಅನೇಕರು ಅನಾರೋಗ್ಯದಿಂದ ಬಳಲುವಂತಾಗಿದೆ. ಮಕ್ಕಳು ಸಮಸ್ಯೆ ಎದುರಿಸುವಂತಾಗಿದೆ. ಕಲ್ಲುಗಣಿಯಿಂದ ವಾರ್ಷಿಕ ಕೋಟಿಗಟ್ಟಲೆ ರಾಜಧನ ಸರ್ಕಾರದ ಬೊಕ್ಕಸಕ್ಕೆ ಸೇರುತ್ತಿದೆ. ಆದರೆ ರಸ್ತೆಗೆ ಅನುದಾನ ನೀಡದೆ ಅನ್ಯಾಯ ಎಸಗಲಾಗಿದೆ. ಇದು ಅಮಾನವೀಯ ಕೃತ್ಯ ಎಂದು ಗ್ರಾಮಸ್ಥರು ದೂರಿದರು.

೧೬ ಟನ್‌ನಷ್ಟು ತೂಕದ ಟಿಪ್ಪರ್‌ಗಳು ಮಾತ್ರ ರಸ್ತೆಯಲ್ಲಿ ಸಂಚರಿಸಬೇಕು. ಆದರೆ ೩೦ ಟನ್ ತೂಕದ ಟಿಪ್ಪರ್ ಪ್ರತಿದಿನ ಸಂಚರಿಸುತ್ತವೆ. ಆರ್‌ಟಿಒ ಮತ್ತು ಗಣಿ ಮತ್ತು ಭೂವಿಜ್ಞಾನ ಇಲಾಖೆ ಕೊಡಗಿನಲ್ಲಿ ಇರುವ ಬಗ್ಗೆ ಕುರುಹುಗಳ ಕಾಣಸಿಗುತ್ತಿಲ್ಲ. ಒಂದು ದಶಕದ ಹಿಂದೆ ರಸ್ತೆ ಸುಸ್ಥಿತಿಯಲ್ಲಿದ್ದಾಗ ಈ ಮಾರ್ಗದಲ್ಲಿ ೫ ಖಾಸಗಿ ಬಸ್‌ಗಳು ಸಂಚರಿಸುತ್ತಿದ್ದವು. ಸೋಮವಾರಪೇಟೆ, ಕುಶಾಲನಗರ, ಮಡಿಕೇರಿಯಲ್ಲಿ ವಿದ್ಯಾಭ್ಯಾಸ ಮಾಡುವ ವಿದ್ಯಾರ್ಥಿಗಳು ನೆಮ್ಮದಿಯಿಂದ ಇದ್ದರು. ರೈತರು ಬೆಳೆದ ಕೃಷಿ ಫಸಲು ಸಾಗಾಟಕ್ಕೆ ಸಮಸ್ಯೆಯಿರಲಿಲ್ಲ ಎಂದು ಗ್ರಾಮಸ್ಥರು ಹೇಳಿದರು.

ಗ್ರಾಮದಲ್ಲಿ ೨೦೦ ರೈತ ಕುಟುಂಬಗಳಿವೆ. ಯಡವನಾಡು, ಬಾಣಾವಾರ ಮೀಸಲು ಅರಣ್ಯಕ್ಕೆ ಹೊಂದಿಕೊಂಡಂತೆ ಗ್ರಾಮವಿದೆ. ಕಾಡಾನೆ ಮತ್ತು ಕಾಡುಪ್ರಾಣಿಗಳು ತಿಂದು ಉಳಿದ ಫಸಲನ್ನು ತೆಗೆದುಕೊಳ್ಳುವ ಪರಿಸ್ಥಿತಿ ಒದಗಿದೆ. ಕಾಡಾನೆಗಳ ಹಾವಳಿಗೆ ಸರ್ಕಾರ ಶಾಶ್ವತ ಪರಿಹಾರ ಕಂಡುಹಿಡಿಯದ ಪರಿಣಾಮ ಕಾಡುಪ್ರಾಣಿಗಳಿಂದ ಫಸಲನ್ನು ರಕ್ಷಿಸಿಕೊಳ್ಳಲು ಸಾಧ್ಯವಾಗದೇ ಸಂಕಷ್ಟದ ಬದುಕು ಸಾಗಿಸುತ್ತಿದ್ದಾರೆ.

ರೈತರು ಜೋಳ, ಸಿಹಿಗೆಣಸು, ಭತ್ತ, ಶುಂಠಿ, ಸುವರ್ಣಗೆಡ್ಡೆ ಬೆಳೆಯುತ್ತಾರೆ. ಆದರೆ ಕಾಡಾನೆಗಳ ಹಿಂಡು ರಾತ್ರಿಯಾಗುತ್ತಿದ್ದಂತೆ ಗ್ರಾಮ ವಾಸ್ತವ್ಯ ಮಾಡುತ್ತವೆ. ಕೃಷಿ ಫಸಲನ್ನು ನಾಶಪಡಿಸಿ ರಸ್ತೆಯಲ್ಲೆ ಸಂಚರಿಸುತ್ತವೆ. ಹಗಲಿನ ವೇಳೆಯಲ್ಲೂ ರಸ್ತೆಯಲ್ಲಿ ವಿದ್ಯಾರ್ಥಿಗಳು ನಡೆದಾಡಲೂ ಭಯಪಡುತ್ತಾರೆ.

ಕೃಷಿ ಫಸಲು ಹಾನಿಗೆ ಪರಿಹಾರ ನೀಡುವುದಾಗಿ ಅರಣ್ಯ ಇಲಾಖೆ ಹೇಳುತ್ತದೆ. ೫೦ ಸಾವಿರ ರೂ, ೧ಲಕ್ಷದಷ್ಟು ಬೆಳೆಹಾನಿಯಾದರೆ ೨ಸಾವಿರ ರೂ ಅಥವಾ ೫ ಸಾವಿರ ಪರಿಹಾರ ಸಿಗುತ್ತದೆ. ಪರಿಹಾರ ಪಡೆಯಲು ದಾಖಲಾತಿಗಳನ್ನು ಹೊಂದಿಸಲು ಎರಡು ಸಾವಿರ ಖರ್ಚು ಮಾಡಬೇಕು ಎಂದು ರೈತರು ಹೇಳಿದರು.
ಒಟ್ಟಿನಲ್ಲಿ ಯಲಕನೂರು ಹೊಸಳ್ಳಿ ಗ್ರಾಮಕ್ಕೆ ಉತ್ತಮವಾಗ ರಸ್ತೆ ನಿರ್ಮಾಣವಾದರೆ ಬಹುತೇಕ ಸಮಸ್ಯೆಗಳಿಂದ ಮುಕ್ತಿ ಪಡೆಬಹುದು. ಕಾಡಾನೆಗಳ ನಿಯಂತ್ರಣಕ್ಕೆ ಸರ್ಕಾರ ಶಾಶ್ವತ ಪರಿಹಾರ ಕಂಡುಹಿಡಿಯಲು ಸೂಕ್ತ ಅನುದಾನ ನೀಡಬೇಕಾಗಿದೆ.