ಕಾಶೆನಟ್ಟಿ ಗ್ರಾಮದ ರಸ್ತೆ ತುಂಬ ಹೊಂಡ

ಅಳ್ನಾವರ: ಪಟ್ಟಣದಿಂದ ಕಾಶೆನಟ್ಟಿ ಗ್ರಾಮಕ್ಕೆ ತೆರಳುವ ರಸ್ತೆ ತುಂಬ ತೆಗ್ಗು-ಗುಂಡಿಗಳು ಬಿದ್ದು ಸಂಚಾರಕ್ಕೆ ಸಂಕಟ ಅನುಭವಿಸುವಂತಾಗಿದೆ.

ಪಟ್ಟಣದ ಬಹುತೇಕ ರೈತರ ಹೊಲಗಳು ಈ ಮಾರ್ಗದಲ್ಲಿವೆ. ಹೀಗಾಗಿ, ಹೆಚ್ಚಿನ ಸಂಖ್ಯೆಯ ರೈತರು ಓಡಾಡುತ್ತಾರೆ.

ಪಟ್ಟಣದಿಂದ 2 ಕಿಮೀ ಅಂತರದಲ್ಲಿರುವ ಆಶ್ರಯ ಕಾಲನಿ ನಿವಾಸಿಗಳಿಗೆ ಮತ್ತು ಕಾಶೆನೆಟ್ಟಿಯ ಗ್ರಾಮಸ್ಥರಿಗೆ ಮುಖ್ಯ ಮಾರ್ಗವಾಗಿದೆ.

2017ರಲ್ಲಿ ಡಾಂಬರ್ ರಸ್ತೆ ನಿರ್ವಿುಸಲಾಗಿದೆ. ಕೆಲ ವರ್ಷಗಳ ಕಾಲ ಅಲ್ಲಲ್ಲಿ ದುರಸ್ತಿ ಮಾಡಲಾಗುತ್ತಿತ್ತು. ಆದರೆ, ಇತ್ತೀಚೆಗೆ ಸಂಪೂರ್ಣವಾಗಿ ಕಿತ್ತುಹೋಗಿ ನಿತ್ಯವೂ ಜನರು ಸಂಕಟ ಪಡುವಂತಾಗಿದೆ.

ಈ ರಸ್ತೆಯಲ್ಲಿ ಹೊರಟರೆ ಜನರಿಗೆ ಗುಡ್ಡುಗಾಡಿನಲ್ಲಿ ಸಂಚರಿಸಿದ ಅನುಭವ ಉಂಟಾಗುತ್ತಿದೆ. ದ್ವಿಚಕ್ರ ವಾಹನ ಸವಾರರು ಬಿದ್ದು ಗಾಯಗೊಂಡ ಘಟನೆ ಹಲವು ಬಾರಿ ನಡೆದಿದೆ.

ಕಾರು ಮತ್ತಿತರ ವಾಹನಗಳು ಈ ರಸ್ತೆಯಲ್ಲಿ ಸಂಚರಿಸಲು ಸಮಸ್ಯೆ ಅನುಭವಿಸುವಂತಾಗಿದೆ. ಈ ಬಗ್ಗೆ ಹಲವು ಬಾರಿ ಅಧಿಕಾರಿಗಳು ಹಾಗೂ ಜನಪ್ರತಿನಿಧಿಗಳಿಗೆ ಮನವಿ ಸಲ್ಲಿಸಿದರೂ ಪ್ರಯೋಜನ ಇಲ್ಲದಂತಾಗಿದೆ ಎಂದು ಗ್ರಾಮಸ್ಥರು ಹೇಳುತ್ತಾರೆ.