ಆದರೆ, ಸರ್ಕಾರ ಅಧಿಕಾರಕ್ಕೆ ಬಂದ ಹಲವು ತಿಂಗಳ ಬಳಿಕ ಈಗ ನಿಗಮ, ಮಂಡಳಿಗಳ ಅಧ್ಯಕ್ಷರ ನೇಮಕ ಪ್ರಕ್ರಿಯೆ ಮಾತ್ರ ಚಾಲನೆ ದೊರಕಿದೆ. ಜಿಲ್ಲಾ ಮಟ್ಟದ ಹುದ್ದೆಗಳಿಗೆ ನಾಮ ನಿರ್ದೇಶನ ಪ್ರಕ್ರಿಯೆ ಇನ್ನಷ್ಟು ವಿಳಂಬವಾಗಲಿದೆ ಎಂದು ಕೆಪಿಸಿಸಿ ಮೂಲಗಳು ತಿಳಿಸಿದ್ದು, ಇದು ಕಾರ್ಯಕರ್ತರ ನಿರಾಸೆಗೆ ಕಾರಣವಾಗಿದೆ. ಎಂಎಲ್ಎ ಆಗಿಯಾಯ್ತು, ಕೆಲವರು ಸಚಿವರೂ ಆದರು, ಈಗ ತಮ್ಮನ್ನು ಗೆಲ್ಲಿಸಲು ದುಡಿದವರ ಋಣ ತೀರಿಸುವ ಅವಕಾಶ ಅವರಿಗಿದೆ. ಅಲ್ಲದೆ ಸದ್ಯ ತಾಲೂಕು ಪಂಚಾಯಿತಿ, ಜಿಲ್ಲಾ ಪಂಚಾಯಿತಿ, ಲೋಕಸಭೆ ಚುನಾವಣೆಗಳಿವೆ. ಈಗಲೇ ಹುದ್ದೆಗಳನ್ನು ನೀಡಿದರೆ, ಜವಾಬ್ದಾರಿ ಹೊತ್ತವರು ಉತ್ಸಾಹದಿಂದ ಕೆಲಸ ಮಾಡಲು ಸಾಧ್ಯವಾಗುತ್ತದೆ. ಐದು ವರ್ಷಗಳ ಅವಧಿಯಲ್ಲಿ ಹಲವು ಮುಖಂಡರಿಗೆ ಹುದ್ದೆಗಳನ್ನು ಒದಗಿಸಿಕೊಡಬಹುದಾಗಿದೆ. ಆದರೆ, ಸರ್ಕಾ ನಿಧಾನ ಗತಿಯಾಗಿದೆ. ಶಾಸಕರು ಸಚಿವರೂ ಈ ಬಗ್ಗೆ ಧ್ವನಿ ಎತ್ತುತ್ತಿಲ್ಲ ಎಂದು ಮುಖಂಡರೊಬ್ಬರು ವಿಜಯವಾಣಿ ಜತೆ ಪಕ್ಷದೊಳಗಿನ ತಮ್ಮ ಗೋಳು ತೋಡಿಕೊಂಡರು.
ಯಾವ್ಯಾವ ಹುದ್ದೆಗಳು..?
ಡಿಸಿಸಿ ಬ್ಯಾಂಕ್ ನಾಮ ನಿರ್ದೇಶಿತ ಸದಸ್ಯ ಹುದ್ದೆ, ಹಾಲು ಒಕ್ಕೂಟದ ನಾಮ ನಿರ್ದೇಶಿತ ಸದಸ್ಯ, ಜಿಲ್ಲಾ ಕೆಡಿಪಿ ಸದಸ್ಯ ಸ್ಥಾನಕ್ಕೆ ಸಾಮಾನ್ಯ, ಎಸ್ಸಿ, ಹಿಂದುಳಿದ ವರ್ಗ, ಅಲ್ಪಸಂಖ್ಯಾತ ಸೇರಿ ಒಟ್ಟು 8 ಹುದ್ದೆಗಳು, ಜಿಲ್ಲಾ ಆರೋಗ್ಯ ಸಮಿತಿಗೆ 6 ಹುದ್ದೆಗಳು, ಜಿಲ್ಲಾ ಹಾಪ್ ಕಾಮ್ಸ 1 ಹುದ್ದೆಗಳನ್ನು ಜಿಲ್ಲಾ ಮಟ್ಟದಲ್ಲಿ ಸರ್ಕಾರ ನಾಮ ನಿರ್ದೇಶನ ಮಾಡಲು ಅವಕಾಶವಿದೆ.
ಇನ್ನು ತಾಲೂಕು ಮಟ್ಟದಲ್ಲಿ ಕಾರವಾರ ನಗರಾಭಿವೃದ್ಧಿ ಹಾಗೂ ಶಿರಸಿಯ ನಗರ ಯೋಜನಾ ಪ್ರಾಧಿಕಾರದ ಅಧ್ಯಕ್ಷರ ಹುದ್ದೆ, ಪ್ರತಿ ಪ್ರಾಧಿಕಾರಕ್ಕೆ ಐದು ಸದಸ್ಯರನ್ನು ನೇಮಕ ಮಾಡಬೇಕಿದೆ. ನಗರ ಸ್ಥಳೀಯ ಸಂಸ್ಥೆಗಳಿಗೆ ನಾಮ ನಿರ್ದೇಶಿತ ಸದಸ್ಯರನ್ನು ನೇಮಕ ಮಾಡಬೇಕಿದೆ. ಪ್ರತಿ ವಿಧಾನಸಭಾ ಕ್ಷೇತ್ರದ ಪಟ್ಟಣ ಆಶ್ರಯ ಸಮಿತಿಗೆ ನಾಲ್ವರು, ಗ್ರಾಮೀಣ ಆಶ್ರಯ ಸಮಿತಿಗೆ ನಾಲ್ವರನ್ನು, ಕ್ಷೇತ್ರದ ಆರಾಧನಾ ಸಮಿತಿಗೆ ನಾಲ್ವರನ್ನು ಶಾಸಕರು ನಾಮ ನಿರ್ದೇಶನ ಮಾಡಬೇಕಿದೆ. ತಾಲೂಕು ಭೂ ನ್ಯಾಯ ಮಂಡಳಿಗಳಿಗೆ ನಾಲ್ವರು, ತಾಲೂಕು ಅಕ್ರಮ ಸಕ್ರಮ ಸಮಿತಿಗೆ ಮೂವರು, ತಾಲೂಕು ಕೆಡಿಪಿ ಸಮಿತಿಗೆ 6 ಜನ, ಎಪಿಎಂಸಿಗಳಿಗೆ ತಲಾ 3 ನಾಮ ನಿರ್ದೇಶಿತ ಸದಸ್ಯರು, ಪಿಎಲ್ಡಿ ಬ್ಯಾಂಕ್ಗೆ 1 ಟಿಎಪಿಸಿಎಂಎಸ್ಗೆ-3, ತಾಲೂಕು ಮಟ್ಟದ ಆಸ್ಪತ್ರೆಗಳ ಆರೋಗ್ಯ ರಕ್ಷಾ ಸಮಿತಿಗೆ 6, ಪ್ರಾಥಮಿಕ ಆರೋಗ್ಯ ಕೇಂದ್ರದ ಸಲಹಾ ಸಮಿತಿಗೆ 6 ಸದಸ್ಯರ ನೇಮಕಕ್ಕೆ ಅವಕಾಶವಿದೆ.
