ಪೌರ ಕಾರ್ಮಿಕರಿಗೆ ಗಾಡಿ ತಳ್ಳೋ ಭಾಗ್ಯ

ಮುಳಬಾಗಿಲು: ಸರ್ಕಾರಿ ಕಚೇರಿಗಳ ನಿರ್ವಹಣೆ ಜತೆಗೆ ಸರ್ಕಾರಿ ಜವಾಬ್ದಾರಿಗಳನ್ನು ರ್ನಿಲಕ್ಷಿಸುವುದಕ್ಕೆ ಪ್ರತಿದಿನ ಹಲವು ಸ್ಪಷ್ಟ ಉದಾಹರಣೆಗಳು ಸಾರ್ವಜನಿಕವಾಗಿಯೇ ಕಾಣುತ್ತಿದ್ದರೂ ಸಂಬಂಧಿಸಿದ ಇಲಾಖೆ ಅಧಿಕಾರಿಗಳು ಮತ್ತು ಸಿಬ್ಬಂದಿ ಗಮನಹರಿಸದೆ ಇರುವುದು ಆಡಳಿತ ವ್ಯವಸ್ಥೆಗೆ ಹಿಡಿದ ಕೈಗನ್ನಡಿಯಾಗಿದೆ.

ಮುಳಬಾಗಿಲು ನಗರಸಭೆಯ ವಾಹನಗಳಿಗೆ ಫಿಟ್ನೆಸ್​ ಇದಿಯೋ ಇಲ್ಲವೋ ಎಂಬ ಬಗ್ಗೆ ಯಾರಲ್ಲೂ ಮಾಹಿತಿ ಇಲ್ಲ, ಕಸ ಸಾಗಿಸುವ ಟ್ರಾ$್ಯಕ್ಟರ್​ಗಳು ನಿಲ್ಲಿಸಿದರೆ ಮತ್ತೆ ಆನ್​ ಆಗುವುದೇ ಉಲ್ಲ. ಪೌರಕಾರ್ಮಿಕರು ಕಸವನ್ನು ಟ್ರ್ಯಾಕ್ಟರ್​ಗೆ ತುಂಬುವುದಲ್ಲದೆ, ಆನ್​ ಆಗದ ವಾಹನಗಳನ್ನು ತುಳ್ಳುವ ಭಾಗ್ಯವನ್ನು ನಗರಸಭೆ ನೀಡಿದೆ.

ನಗರಸಭೆಯಲ್ಲಿರುವ 8 ಕಸ ತುಂಬುವ ಟ್ರ್ಯಾಕ್ಟರ್​ಗಳಲ್ಲಿ 1 ರಿಪೇರಿಯಲ್ಲಿದ್ದು, ಉಳಿದ 7ರಲ್ಲಿ ಸ್ಟಾರ್ಟ್​ ಆಗದ ವಾಹನಗಳೆ ಹೆಚ್ಚು, 11 ಆಟೋ ಟಿಪ್ಪರ್​ಗಳಲ್ಲಿ ಹಳೆ ವಾಹನಗಳು ರಿಪೇರಿ ಸರ್ವೇ ಸಾಮಾನ್ಯ, ಹೊಸದಾಗಿ ಬಂದಿರುವ 3 ಎಲೆಕ್ಟ್ರಿಕ್​ ಆಟೋ ಟಿಪ್ಪರ್​ಗಳಿಗೆ ವಿಮೆ, ಆರ್​ಟಿಒ ನೋಂದಣಿ ಸಂಖ್ಯೆ ಇನ್ನೂ ಆಗಿಲ್ಲ, ಯುಜಿಡಿ ಸ್ವಚ್ಛ ಮಾಡುವ ಎರಡು ಟಿಪ್ಪರ್​ ಯಂತ್ರಗಳಲ್ಲಿ ಒಂದು ಕೆಟ್ಟಿದ್ದು, ಮತ್ತೊಂದು ಮಾತ್ರ ಜಗ್ಗಾಡುತ್ತಿದೆ. 2 ಜೆಸಿಬಿ ಯಂತ್ರಗಳಲ್ಲಿ ಒಂದು ದುರಸ್ತಿಗೆ ಬಂದಿದ್ದು, ಮತ್ತೊಂದು ದುಡಿಯುತ್ತಲೇ ಇದೆ. ಮಿನಿ ಜೆಸಿಬಿ ಒಂದಿದ್ದು, ನಗರದ ಸ್ವಚ್ಛತೆಗೆ ಇರುವ ಯಂತ್ರಗಳೇ ಸಾಕಾಗುತ್ತಿಲ್ಲ ಇದರಲ್ಲಿ ದುರಸ್ತಿಗೆ ಬಂದ ವಾಹನಗಳು, ಬಳಕೆಗೆ ಯೋಗ್ಯವಿರುವ ವಾಹನಗಳ ಫಿಟ್ನೆಸ್​ ಸರ್ಟಿಫಿಕೇಟ್​ ಮತ್ತು ವಿಮೆ ಇಲ್ಲದಿರುವುದು ಉಪ ಲೋಕಾಯುಕ್ತರು ಭೇಟಿ ವೇಳೆಯಲ್ಲಿ ಮಾಹಿತಿ ಹೊರಬಂದಿದ್ದು, ಇನ್ನಾದರೂ ನಗರಸಭೆ ಮತ್ತು ಜಿಲ್ಲಾಡಳಿತ ಎಚ್ಚೆತ್ತು ಸರ್ಕಾರಿ ಆಡಳಿತ ವ್ಯವಸ್ಥೆಗೆ ಚಿಕಿತ್ಸೆ ನೀಡಬೇಕಾಗಿದೆ.

ನಗರಸಭೆಗೆ ಸೇರಿದ 27 ವಾಹನಗಳಲ್ಲಿ 6 ಮೂಲೆ ಸೇರಿದ್ದು, ಉಳಿದ ವಾಹನಗಳು ಎಲ್ಲಿಂದರಲ್ಲಿ ನಿಂತರೆ ಮುಂದಕ್ಕೆ ಚಲಿಸುವುದು ಕಷ್ಟ ಕಷ್ಟ ಎನಿಸಿದೆ. ಮಳೆಗಾಲದಲ್ಲಿ ಮರಗಳಿಂದ ವಿದ್ಯುತ್​ ಪ್ರವೇಶಿಸಿ ಅವಘಡಗಳು ಸಂಭವಿಸುವುದಕ್ಕಿಂತ ಮುಂಚೆ ನಗರಸಭೆ ಮತ್ತು ಬೆಸ್ಕಾಂ ಜಂಟಿಯಾಗಿ ಕ್ರಮ ಕೈಗೊಂಡು ಜನರು ಸೇರಿ ಪ್ರಾಣಿಗಳ ರಕ್ಷಣೆಗೆ ಮುಂದಾಗಬೇಕಾಗಿದೆ.

ಮರಗಳ ಮಧ್ಯದಲ್ಲಿ ವಿದ್ಯುತ್​ ತಂತಿ

-ಸಾಮಾನ್ಯವಾಗಿ ಗ್ರಾಮಾಂತರ ಪ್ರದೇಶದಲ್ಲಿ ಮರಗಳ ಮಧ್ಯೆ ವಿದ್ಯುತ್​ ತಂತಿಗಳು ಇರುವುದು ಸರ್ವೇಸಾಮಾನ್ಯ. ಆದರೆ, ಮುಳಬಾಗಿಲು ನಗರದಲ್ಲೇ ಈ ಪರಿಸ್ಥಿತಿ ಹೆಚ್ಚಿದೆ. ಹಲವು ಕಡೆಗಳಲ್ಲಿ ಗಿಡ&ಮರಗಳಲ್ಲಿ ವಿದ್ಯುತ್​ ತಂತಿಗಳು ಇರುವುದನ್ನು ಕಾಣಬಹುದು. ಇದಲ್ಲದೆ ವಿದ್ಯುತ್​ ಪರಿವರ್ತಕಗಳಿಗೆ, ಕಂಬಗಳಿಗೆ, ತಂತಿಗಳಿಗೆ ಹಸಿರು ಬಳ್ಳಿಗಳು ಸುತ್ತಿಕೊಂಡರೂ ಕೇಳುವವರೇ ಇಲ್ಲದಂತಾಗಿದೆ.

=

ನಗರಸಭೆಯ ಎಲ್ಲ ವಾಹನಗಳ ಫಿಟ್ನೆಸ್​ ಬಗ್ಗೆ ಆರ್​ಟಿಒ ಅಧಿಕಾರಿಗಳಿಂದ ಪರಿಶೀಲಿಸಲು ಪತ್ರ ಬರೆಯಲಾಗುತ್ತದೆ. ಅವರ ಒಪ್ಪಿಗೆ ದೊರೆತ ತಕ್ಷಣ ವಿಮೆ ಮಾಡಿಸಿ ಆರ್​ಟಿಒ ನವೀಕರಣ ಮಾಡಿಸಲಾಗುವುದು. ಹೊಸ ವಾಹನಗಳ ಬೇಡಿಕೆ ಬಗ್ಗೆ ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಲಾಗುವುದು. ಮರಗಳಲ್ಲಿ ವಿದ್ಯುತ್​ ತಂತಿಗಳು ಇರೋ ಬಗ್ಗೆ ಬೆಸ್ಕಾಂಗೆ ಮಾಹಿತಿ ನೀಡಲಾಗುವುದು.

> ವಿ.ಶ್ರೀಧರ್​

ಪೌರಾಯುಕ್ತ, ನಗರಸಭೆ, ಮುಳಬಾಗಿಲು

ನಗರದಲ್ಲಿ ಮರಗಳ ಮಧ್ಯೆ ಇರುವ ವಿದ್ಯುತ್​ ತಂತಿಗಳನ್ನು ಪರಿಶೀಲನೆ ಮಾಡುವಂತೆ ಜೆಇ ಮತ್ತು ಸಿಬ್ಬಂದಿಗೆ ತಕ್ಷಣ ಸೂಚನೆ ನೀಡಿ ಟ್ರಿಮ್ಮಿಂಗ್​ ಮಾಡಿ ರಂಬೆ ಕತ್ತರಿಸಿ ಸರಿಪಡಿಸಲಾಗುವುದು.

> ವಿ.ಎಂ. ರಮೇಶ್​

ಎಇಇ, ಬೆಸ್ಕಾಂ, ಮುಳಬಾಗಿಲು