ಸ್ವಾತಂತ್ರ್ಯ ಪೂರ್ವದ ರಾಜಕೀಯ ನೇತಾರರ ನಡೆ, ನಿಲುವುಗಳನ್ನು ಒರೆಗೆ ಹಚ್ಚುವಂತಹ ಪ್ರಯತ್ನ, ಬಹಿರಂಗವಾಗುವ ತಲ್ಲಣದ ಸಂಗತಿಗಳ ಹೂರಣವನ್ನು ನಾಟಕದಲ್ಲಿ ಪ್ರದರ್ಶಿಸಲಾಯಿತು. ಚರಿತ್ರೆಯ ಉತ್ಖನನ ಎಂಬ ಅಡಿ ಟಿಪ್ಪಣಿಯ ಈ ನಾಟಕ ಸ್ವಾತಂತ್ರ್ಯ ಹೋರಾಟದ ಆರು ಮಂದಿ ನಾಯಕರ ಸುತ್ತ ಗಿರಕಿ ಹೊಡೆಯುತ್ತದೆ. ಮಹಾತ್ಮ ಗಾಂಧಿ, ಜವಾಹರಲಾಲ್ ನೆಹರು, ಸರದಾರ ವಲ್ಲಭಬಾಯಿ ಪಟೇಲ್, ಸುಭಾಷ್ ಚಂದ್ರ ಬೋಸ್, ಬಿ.ಆರ್. ಅಂಬೇಡ್ಕರ್ ಮತ್ತು ವೀರ ಸಾವರ್ಕರ್ ಈ ನಾಯಕರು. ನೈಜ ಪಾತ್ರಧಾರಿಗಳಾದ ಅವರೆಲ್ಲ ಸಾಮಾನ್ಯ ರೈತನೊಬ್ಬ ನ್ಯಾಯಾಧೀಶ ಸ್ಥಾನದಲ್ಲಿ ಕುಳಿತು ವಕೀಲರ ಮೂಲಕ ವಿಚಾರಣೆ ನಡೆಸುವಾಗ ಕಟಕಟೆಯಲ್ಲಿ ನಿಂತು ಉತ್ತರಿಸುವ ರೀತಿಯಲ್ಲಿ ನಾಟಕ ಸಾಗಿದೆ.
