ತಮಿಳುನಾಡಿನಿಂದ ಬರುವ ಟಿಪ್ಪರ್ ಲಾರಿಗಳ ಹಾವಳಿಗೆ ತಾಲೂಕಿನ ಜನ ತತ್ತರಿಸಿದ್ದಾರೆ. ಆನೇಕಲ್ ಮಾರ್ಗವಾಗಿ ಜಲ್ಲಿ, ಎಂ ಸ್ಯಾಂಡ್, ಪಿ ಸ್ಯಾಂಡ್ ಹಾಗೂ ಮಣ್ಣು ತುಂಬಿಕೊಂಡು ಬರುವ ಟಿಪ್ಪರ್ ಲಾರಿಗಳು ನಿಯಮ ಉಲ್ಲಂಘಿಸಿ ಮನಸೋ ಇಚ್ಛೆ ಲೋಡ್ ಹಾಕಿಕೊಂಡು ಬರುತ್ತಿದ್ದು, ಸಣ್ಣಪುಟ್ಟ ವಾಹನಗಳು ಹಾಗೂ ದ್ವಿಚಕ್ರ ವಾಹನಗಳಿಗೆ ಕಿರಿಕಿರಿ ಉಂಟಾಗಿದೆ. ಓವರ್ ಲೋಡ್ ಟಿಪ್ಪರ್ಗಳ ಓಡಾಟದಿಂದ ರಸ್ತೆಯಲ್ಲಿ ಧೂಳು ಹಾಗೂ ಮಣ್ಣು ಗಾಳಿಗೆ ತೂರಿಕೊಂಡು ಬಂದು ದ್ವಿಚಕ್ರ ವಾಹನದಲ್ಲಿ ಹೋಗುವವರ ಕಣ್ಣುಗಳಿಗೆ ಬಿದ್ದು ಅಪಘಾತಗಳಾಗುವ ಸಂಭವವಿದೆ. ಹೊಸೂರಿನಿಂದ ಸಮಂದೂರು ಮಾರ್ಗವಾಗಿ ಆನೇಕಲ್ ಪಟ್ಟಣಕ್ಕೆ ಬರುವ ಟಿಪ್ಪರ್ ಲಾರಿಗಳು ಪಟ್ಟಣದಲ್ಲಿ ಅತಿ ಹೆಚ್ಚು ಭಾರ ಹೇರಿಕೊಂಡು ಬರುತ್ತಿದ್ದು, ಇದರಿಂದ ಪಟ್ಟಣದ ರಸ್ತೆ ಸಂಪೂರ್ಣವಾಗಿ ಕಿತ್ತು ಗುಂಡಿಗಳು ಬಿದ್ದಿವೆ. ಟಿಪ್ಪರ್ಗಳು ಪಟ್ಟಣದಲ್ಲಿಯೂ ಅತಿ ವೇಗವಾಗಿ ಸಂಚಾರ ಮಾಡುತ್ತಿದ್ದು, ದ್ವಿಚಕ್ರ ವಾಹನ ಸವಾರರು ಟಿಪ್ಪರ್ ಲಾರಿಗಳು ಬಂದಾಗ ಭಯದಿಂದ ಓಡಾಡಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ. ಆನೇಕಲ್ ಪಟ್ಟಣದಲ್ಲಿ ಮೊದಲೇ ಪಾದಚಾರಿ ಮಾರ್ಗ ಇಲ್ಲ, ಜನ ರಸ್ತೆಯಲ್ಲೇ ಓಡಾಡಬೇಕು. ಹೀಗಿರುವಾಗ ವೇಗವಾಗಿ ಬರುವ ಟಿಪ್ಪರ್ ಲಾರಿಗಳ ಹಾವಳಿಗೆ ಕಳೆದ ನಾಲ್ಕೆದು ತಿಂಗಳಲ್ಲಿ ಐದಾರು ಜನ ಪ್ರಾಣ ಕಳೆದುಕೊಂಡಿದ್ದಾರೆ.
