ಪಡಿತರಕ್ಕೆ ಸರ್ವರ್​ ಸಮಸ್ಯೆ ಜನರ ಪರದಾಟ

ದಿನವಿಡೀ ಕಾದರೂ ಸಿಗದ ರೇಷನ್​ | ಸಂಕಷ್ಟಕ್ಕೆ ಸಿಲುಕಿದ ಗ್ರಾಹಕರು

ವಿಜಯವಾಣಿ ಸುದ್ದಿಜಾಲ ಪಾವಗಡ

ತಾಲೂಕಿನಾದ್ಯಂತ ನ್ಯಾಯಬೆಲೆ ಅಂಗಡಿಗಳಲ್ಲಿ ಸರ್ವರ್​ ಸಮಸ್ಯೆಯಿಂದ ಪಡಿತರ ಪಡೆಯಲು ಪರದಾಡುವ ಪರಿಸ್ಥಿತಿ ನಿಮಾರ್ಣವಾಗಿದೆ.

ತಾಲೂಕಿನಾದ್ಯಂತ ಕಳೆದ ಒಂದು ವಾರದಿಂದ ಆಹಾರ ಇಲಾಖೆ ಸರ್ವರ್​ ಸಮಸ್ಯೆಯಿಂದ ದಿನವಿಡೀ ಸರತಿ ಸಾಲಿನಲ್ಲಿ ನಿಂತರೂ ಸಮಸ್ಯೆಗೆ ಪರಿಹಾರವಿಲ್ಲದಂತಾಗಿದೆ. ಸರ್ವರ್​ ಮಧ್ಯಾಹ್ನಕ್ಕೆ ಸರಿ ಹೋಗಬಹುದು, ಸಂಜೆಗೆ ಸರಿ ಹೋಗುತ್ತದೆ ಎಂದು ಕಾದು ಕುಳಿತ ಗ್ರಾಹಕರು ಬಂದ ದಾರಿಗೆ ಸುಂಕವಿಲ್ಲವೆಂಬಂತೆ ಮರಳಿ ಮನೆಗೆ ವಾಪಸ್ಸಾಗುತ್ತಿದ್ದಾರೆ.

ರಾಜ್ಯ ಸರ್ಕಾರ ಅನ್ನಭಾಗ್ಯ ಯೋಜನೆ ಅಡಿಯಲ್ಲಿ ನ್ಯಾಯಬೆಲೆ ಅಂಗಡಿಗಳ ಮುಖಾಂತರ ಪ್ರತಿ ವ್ಯಕ್ತಿಗೆ 3 ಕೆಜಿ ಅಕ್ಕಿ, 2 ಕೆಜಿ ರಾಗಿ ವಿತರಣೆ ಮಾಡುತ್ತಿದ್ದು, ಕಳೆದ ಒಂದು ವಾರದಿಂದ ಆಹಾರ ಇಲಾಖೆಯ ನ್ಯಾಯಬೆಲೆ ಅಂಗಡಿಗಳ ಸರ್ವರ್​ ಇಲ್ಲದ ಜತೆಗೆ ಲಾಗಿನ್​ ಆಗದೆ ತೀವ್ರ ತೊಂದರೆ ಉಂಟಾಗಿದೆ. ದೈನಂದಿನ ಕೆಲಸ ಬಿಟ್ಟು ಪಡಿತರ ಅಂಗಡಿ ಎದುರು ಸರ್ವರ್​ ಸರಿ ಆಗಬಹುದೆಂಬ ಭರವಸೆಯಲ್ಲಿಯೇ ಕಾದು ಕೂರಬೇಕಿದೆ.

ಸಂಕಷ್ಟದಲ್ಲಿ ಗ್ರಾಹಕರು: ಅಕ್ಟೋಬರ್​ ತಿಂಗಳ ಪಡಿತರ ಪಡೆಯಲು ಒಂದು ವಾರದಿಂದ ಕೂಲಿ ಕೆಲಸ ಬಿಟ್ಟು, ರೈತರು ಹೊಲ&ಗದ್ದೆಗಳ ಕೆಲಸ ಕಾರ್ಯಬಿಟ್ಟು ಪಡಿತರ ಪಡೆಯಲು ಬಂದರೆ ಸರ್ವರ್​ ಸಮಸ್ಯೆ ಉಂಟಾಗಿ ಅತ್ತ ರೈತರು ಬೆಳೆದ ಬೆಳೆ ಮತ್ತು ಕೂಲಿಯು ಇಲ್ಲದೇ ಇತ್ತ ಪಡಿತರವು ಇಲ್ಲದೇ ಕೂಲಿ ಕಾರ್ಮಿಕರು ಹಾಗೂ ರೈತರು ಸಂಕಷ್ಟಕ್ಕೆ ಸಿಲುಕಿದ್ದೇವೆ ಎಂದು ಸಾರ್ವಜನಿಕರು ಅಲವತ್ತುಕೊಂಡಿದ್ದಾರೆ.