ಕಪ್ಪು ಮಸಿ ಬಳಿದ 'ಬಿಳಿ' ದ್ರವ್ಯ..!

ಉಡುಪಿಗೆ ಕುಖ್ಯಾತಿಯಿತ್ತ ಡ್ರಗ್ಸ್​ ದಂಧೆ

ಯಾರೆಲ್ಲ ಇದ್ದಾರೆ ಈ ಜಾಲದ ಹಿಂದೆ?

ಪ್ರಶಾಂತ ಭಾಗ್ವತ ಉಡುಪಿ

ಆರೋಗ್ಯ, ಶಿಕ್ಷಣ, ಧಾರ್ಮಿಕ ಹಾಗೂ ಪ್ರವಾಸಿ ತಾಣಗಳ ಮೂಲಕ ವಿಶ್ವದ ಗಮನ ಸೆಳೆದಿದ್ದ ಕರಾವಳಿ ನಗರಿ ಉಡುಪಿ ಇದೀಗ ಮಾದಕ ವಸ್ತು ದಂಧೆಕೋರರ ಕುಕೃತ್ಯದಿಂದಾಗಿ ಅಪಖ್ಯಾತಿ ಹೊಂದುವಂತಾಗಿದೆ.

ದೆಹಲಿಯ ಕೇಂದ್ರೀಯ ಮಾದಕ ದ್ರವ್ಯ ನಿಯಂತ್ರಣ ಬ್ಯೂರೋ (ಎನ್​ಸಿಬಿ), ಆಪರೇಷನ್​ ಮೆಡ್​ ಮ್ಯಾಕ್ಸ್​ ಎಂಬ ಹೆಸರಿನಲ್ಲಿ ಕಳೆದ ತಿಂಗಳು ನಡೆಸಿದ್ದ ಕಾರ್ಯಾಚರಣೆಯಲ್ಲಿ ವಿಶ್ವದ ದಿಗ್ಗಜ ದೇಶಗಳೊಂದಿಗೆ ಉಡುಪಿಯಲ್ಲೂ ಒಂದು ಸೆಂಟರ್​ ಇರುವುದನ್ನು ಪತ್ತೆ ಮಾಡಿದ್ದು, ಉಡುಪಿಗೆ ಕಪ್ಪು ಮಸಿ ಬಳಿದಂತಾಗಿದೆ.

ಉಡುಪಿಯಲ್ಲೂ ಕಾಲ್​ ಸೆಂಟರ್​

ತಮಿಳುನಾಡಿನ ವ್ಯಕ್ತಿ

ಉಡುಪಿ-ಮಣಿಪಾಲ ರಾಷ್ಟ್ರೀಯ ಹೆದ್ದಾರಿಯ ಹಯಗ್ರೀವ ನಗರದ 7ನೇ ಕ್ರಾಸ್​ನಲ್ಲಿ ಮೆಡ್​ ಮ್ಯಾಕ್ಸ್​ ಡಿಜಿಟಲ್​ ಎಂಬ ಕಾಲ್​ಸೆಂಟರ್​ ಕಾರ್ಯ ನಿರ್ವಹಿಸುತ್ತಿತ್ತು. ಅದನ್ನು ತಮಿಳುನಾಡು ಮೂಲದ ಸುರೇಶಕುಮಾರ್​ ಕೆ. ಎಂಬಾತ ನಿರ್ವಹಿಸುತ್ತಿದ್ದ. ಇಲ್ಲಿದ್ದ 10 ಕೆಲಸಗಾರರಿಗೆ ಇದು ಡ್ರಗ್ಸ್​ಗೆ ಸಂಬಂಧಿಸಿದ ಸೆಂಟರ್​ ಎಂಬ ಮಾಹಿತಿ ಇರಲಿಲ್ಲ. ಸೆಂಟರ್​ನ ಮುಖ್ಯಸ್ಥನನ್ನು ಎನ್​ಸಿಬಿ ಅಧಿಕಾರಿಗಳು ತಿಂಗಳ ಹಿಂದೆಯೇ ಬಂಧಿಸಿ ದಿಲ್ಲಿಗೆ ಕರೆದೊಯ್ದಿದ್ದರೂ ಆತನ ಕುರಿತಂತೆ ಹೆಚ್ಚಿನ ಮಾಹಿತಿ ಇನ್ನೂ ಲಭಿಸಿಲ್ಲ.

ಡ್ರಗ್​ ಸಾಗಾಟ ಮಾಹಿತಿ

ಉಡುಪಿಯ ಕಾಲ್​ಸೆಂಟರ್​ನಿಂದ ಅಮೆರಿಕದಿಂದ ಡ್ರಗ್ಸ್​ ಬರುವ ಬೇಡಿಕೆಗಳನ್ನು ನಿರ್ವಹಿಸುತ್ತಿತ್ತು ಎನ್ನುವುದು ಎನ್​ಸಿಬಿ ಕಾರ್ಯಾಚರಣೆ ವೇಳೆ ಬೆಳಕಿಗೆ ಬಂದಿದೆ. ಅಂತಾರಾಷ್ಟ್ರೀಯ ಮಟ್ಟದಲ್ಲಿ 50 ಡ್ರಗ್​ ಸರಕು ಸಾಗಾಟದ ಮಾಹಿತಿ ಉಡುಪಿಯಿಂದ ಹೊರಬಿತ್ತು. ಅವುಗಳಲ್ಲಿ 29 ಅಮೆರಿಕದಲ್ಲಿ, 18 ಆಸ್ಟ್ರೆಲಿಯಾದಲ್ಲಿ ಹಾಗೂ ಈಸ್ಟೋನಿಯಾ, ಸ್ಪೇನ್, ಸ್ವಿಝರ್​ಲೆಂಡ್​ಗಳಲ್ಲಿ ತಲಾ ಒಂದು ಸರಕು ಸಾಗಾಟ ಮಾಡಿರುವ ಮಾಹಿತಿ ಲಭಿಸಿತ್ತು.

8 ಮಂದಿ ಬಂಧನ

ಡ್ರಗ್ಸ್​ ಅಕ್ರಮ ಚಟುವಟಿಕೆಯ ಸಣ್ಣ ಸುಳಿವೂ ಸಹ ಲಭಿಸದಂತೆ ದೇಶದ ನಾಲ್ಕು ಮೂಲೆಗಳಲ್ಲಿ ಡ್ರಗ್ಸ್​ ಮಾಫಿಯಾದವರು ಜಾಲ ವಿಸ್ತರಿಸಿಕೊಂಡಿದ್ದರು. ಉಡುಪಿಯಲ್ಲಿದ್ದ ಸೆಂಟರ್​ನಲ್ಲಿ ಡ್ರಗ್​ ಸಾಗಾಟ, ಸಂಗ್ರಹ ಇರಲಿಲ್ಲ. ಆದರೆ, ಈ ಕಾಲ್​ಸೆಂಟರ್​ ಮೂಲಕ ವಿಶ್ವದ ಮೂಲೆ ಮೂಲೆಯ ಸಂಪರ್ಕ ಹಾಗೂ ಮಾಹಿತಿ ಬರುತ್ತಿತ್ತು. ದೇಶದ ನಾಲ್ಕು ಕೇಂದ್ರದಿಂದ ಒಟ್ಟು ಎಂಟು ಮಂದಿ ಬಂಧಿಸಲಾಗಿದೆ. ಆಧುನಿಕ ಅಕ್ರಮ ವ್ಯವಹಾರ ಜಗತ್ತು ಬಳಸುವ ಎಲ್ಲ ತಾಂತ್ರಿಕತೆ, -ಡಿಜಿಟಲ್​ ಪ್ಲಾಟ್​ಫಾರಂ, ಕ್ರಿಫ್ಟೋ ಕರೆನ್ಸಿ, ನಿಯಂತ್ರಿತ ಮೆಡಿಸಿನ್​ನ ಕಳ್ಳಸಾಗಣಿಕೆ- ಮಾಡಲಾಗುತ್ತಿತ್ತು ಎಂದು ಎನ್​ಸಿಬಿ ತಿಳಿಸಿದೆ.

ಉಡುಪಿ ಜಿಲ್ಲೆಯಲ್ಲಿ 846 ಜನರ ಬಂಧನ

ವರ್ಷ                ಡ್ರಗ್ಸ್​ ಪ್ರಕರಣ      ಬಂಧಿತರ ಸಂಖ್ಯೆ 2022                262                    282 2023                272                    304 2024                123                    153 2025(ಜೂನ್​)    87                      107

ಡ್ರಗ್ಸ್​ ಜಾಲ ಮಟ್ಟ ಹಾಕಲು ಕಾರ್ಯತಂತ್ರ ರೂಪಿಸಿ

* ಸರ್ಕಾರಕ್ಕೆ ತಿಂಗಳೆ ವಿಕ್ರಮಾರ್ಜುನ ಹೆಗ್ಡೆ ಒತ್ತಾಯ

ಉಡುಪಿ: ಮಾದಕ ದ್ರವ್ಯ ಪೂರೈಕೆ ಪ್ರಕರಣದಲ್ಲಿ ಉಡುಪಿಯಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದ ಕಾಲ್​ಸೆಂಟರ್​ನ ಮುಖ್ಯಸ್ಥನನ್ನು ಎನ್​ಸಿಬಿ ಅಧಿಕಾರಿಗಳು ಬಂಧಿಸಿದ್ದಾರೆ. ತನ್ಮೂಲಕ ಉಡುಪಿ-ಮಣಿಪಾಲದ ಪರಿಸರದಲ್ಲಿ ಡ್ರಗ್ಸ್​ ಜಾಲ ದೊಡ್ಡ ಮಟ್ಟದಲ್ಲಿ ಬೇರೂರಿದ ಅಂಶ ಬಯಲಿಗೆಳೆದಿದ್ದಾರೆ. ರಾಜ್ಯ ಸರ್ಕಾರ ಹಾಗೂ ಜಿಲ್ಲಾ ಪೊಲೀಸ್​ ಇಲಾಖೆ ಡ್ರಗ್ಸ್​ ಜಾಲ ಮಟ್ಟಹಾಕಲು ವಿಶೇಷ ಕಾರ್ಯತಂತ್ರ ರೂಪಿಸಬೇಕು ಎಂದು ಬಿಜೆಪಿ ಮುಖಂಡ ತಿಂಗಳೆ ವಿಕ್ರಮಾರ್ಜುನ ಹೆಗ್ಡೆ ಒತ್ತಾಯಿಸಿದ್ದಾರೆ.

ದಶಕಗಳಿಂದಲೂ ಜಿಲ್ಲೆಯಲ್ಲಿ ಮಾದಕ ದ್ರವ್ಯದ ಜಾಲವಿದೆ ಎಂದು ಬಿಜೆಪಿ ಆರೋಪಿಸುತ್ತಲೇ ಬಂದಿದೆ. ಇದೀಗ ಅಂತಾರಾಷ್ಟ್ರೀಯ ಮಾದಕ ದ್ರವ್ಯ ಜಾಲದಲ್ಲೂ ಉಡುಪಿಯ ನಂಟಿದೆ ಎಂಬ ಮಾಹಿತಿ ಅತ್ಯಂತ ಆಘಾತಕಾರಿಯಾಗಿದೆ.

ಬುದ್ಧಿವಂತರ ಜಿಲ್ಲೆ ಎಂದೇ ಗುರುತಿಸಿಕೊಂಡಿರುವ ಉಡುಪಿಯಲ್ಲಿ ಅನ್ಯ ರಾಜ್ಯ, ದೇಶಗಳಿಂದ ವಿದ್ಯಾಭ್ಯಾಸಕ್ಕೆಂದು ಸಾವಿರಾರು ವಿದ್ಯಾರ್ಥಿಗಳು ಆಗಮಿಸುತ್ತಾರೆ. ಇಂತಹ ಜಿಲ್ಲೆಗೆ ಕಪ್ಪು ಚುಕ್ಕಿಯಾಗಿ ಡ್ರಗ್ಸ್​ ಜಾಲ ಹಬ್ಬಿರುವುದು ಜಿಲ್ಲೆ ಖ್ಯಾತಿಗೆ ಕಳಂಕ ತರುವಂತಾಗಿದೆ. ಜಿಲ್ಲೆಯಲ್ಲಿ ಕಾರ್ಯ ನಿರ್ವಹಿಸುತ್ತಿರುವ ಎಲ್ಲ ಕಾಲ್​ ಸೆಂಟರ್​ಗಳ ಮಾಹಿತಿ ಪಡೆದು ಸಮಗ್ರ ತನಿಖೆ ನಡೆಸಬೇಕು ಎಂದು ವಿಕ್ರಮಾರ್ಜುನ ಹೆಗ್ಡೆ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.