ಮೈದುಂಬಿದ ವರದೆ -ನಿಟ್ಟುಸಿರು ಬಿಟ್ಟ ರೈತರು

ಅಕ್ಕಿಆಲೂರ: ವರದಾ ನದಿಯಲ್ಲಿ ನೀರು ಹಾನಗಲ್ಲ ತಾಲೂಕಿಗೆ ಪ್ರವೇಶಿಸಿದ್ದು, ಜನರಲ್ಲಿ ಸಮಾಧಾನ ಮೂಡಿಸಿದೆ.

ಉತ್ತರ ಕನ್ನಡ ಜಿಲ್ಲೆ ಶಿರಸಿ ತಾಲೂಕಿನ ಬನವಾಸಿಯಿಂದ ಹಾನಗಲ್ಲ ತಾಲೂಕಿನ ಹೊಂಕಣದಿಂದ ಆರೇಲಕ್ಮಾಪುರ, ಮಲಗುಂದ ಮಾರ್ಗವಾಗಿ ಹಿರೇಹುಲ್ಲಾಳ ಮೂಲಕ ಸಾಗಿ ಹಾವೇರಿ ತಾಲೂಕು ಪ್ರವೇಶಿಸಲಿದೆ. ವರದಾ ನದಿಯು ಹಾನಗಲ್ಲ ತಾಲೂಕಿನಲ್ಲಿ ಸುಮಾರು 30 ಕಿಲೋ ಮೀಟರನಷ್ಟು ಹರಿಯುತ್ತದೆ. ಉತ್ತರ ಕನ್ನಡ ಜಿಲ್ಲೆಯಲ್ಲಿ ಈಗಾಗಲೆ ಉತ್ತಮ ಮಳೆಯ ಪರಿಣಾಮ ನದಿ ತುಂಬಿ ಹರಿಯುತ್ತಿದೆ. ಕಳೆದ 4-5 ತಿಂಗಳಿಂದ ವರದಾ ನದಿ ಬರಿದಾಗಿತ್ತು.

ನೀರಾವರಿಗೆ ಜೀವಕಳೆ: ನದಿ ಪಾತ್ರದಲ್ಲಿನ ರೈತರ ಬೋರ್‌ವೆಲ್‌ಗಳಿಗೆ ಜೀವ ಬಂದಂತಾಗಿದೆ. ಲಕ್ಷಾಂತರ ರೂಪಾಯಿ ವೆಚ್ಚ ಮಾಡಿ ಅಡಕೆ, ಬಾಳೆ ಮತ್ತು ಭತ್ತ ಬೆಳೆದಿರುವ ರೈತರಿಗೆ ನಿರೀಕ್ಷಿತ ಪ್ರಮಾಣದಲ್ಲಿ ಮಳೆ ಬಾರದೆ, ಬೋರ್‌ಗಳಲ್ಲಿ ನೀರು ಕಡಿಮೆಯಾಗಿ ಸಂಕಷ್ಟ ಅನುಭವಿಸುತ್ತಿದ್ದರು. ಆದರೆ, ಕಳೆದ ಮೂರು ದಿನಗಳಿಂದ ವರದಾ ನದಿಯಲ್ಲಿ ನೀರು ಹರಿಯುತ್ತಿದ್ದಂತೆ ಬೋರ್‌ವೆಲ್‌ಗಳಿಗೆ ಜೀವ ಬಂದಂತಾಗಿದೆ. ಅಲ್ಲದೆ. ವರದಾ ನದಿಯಿಂದ ಕೆರೆ-ಕಟ್ಟೆ ತುಂಬಿಸುವ ತಿಳವಳ್ಳಿ ಹಾಗೂ ಬಾಳಂಬೀಡ ಏತ ನೀರಾವರಿಗೆ ಅನುಕೂಲವಾಗಿದೆ. ಅಕ್ಕಿಆಲೂರ ಮತ್ತು ತಿಳವಳ್ಳಿ ಭಾಗದಲ್ಲಿ ಹೆಚ್ಚು ನೀರಾವರಿ ಸೌಲಭ್ಯಕ್ಕೂ ವದಿಯಿಂದ ಸಹಾಯಕವಾಗಿದೆ ಎನ್ನುತ್ತಾರೆ ರೈತರು.