ಪಡಿತರಕ್ಕಾಗಿ ಜನಸಾಮಾನ್ಯರ ಪರದಾಟ!

ಗೊಳಸಂಗಿ: ನ್ಯಾಯ ಬೆಲೆ ಅಂಗಡಿಗಳ ಮೂಲಕ ರಾಜ್ಯದ ಜನತೆ ಪಡೆಯುತ್ತಿರುವ ಪಡಿತರ ಧಾನ್ಯ ಪೂರೈಕೆ ಸುಲಲಿತವಾಗಲೇಂದು ನಿರೀಕ್ಷೆಯನ್ನಿಟ್ಟು ಆಹಾರ ಇಲಾಖೆ ಹೊಸದಾಗಿ ಅಳವಡಿಸಿರುವ ತಂತ್ರಾಂಶದಿಂದಲೂ ಸಮಸ್ಯೆಗೆ ಮುಕ್ತಿ ಸಿಕ್ಕಿಲ್ಲ.

ಗ್ರಾಮದ ವಿವಿಧೋದ್ದೇಶ ಪ್ರಾಥಮಿಕ ಗ್ರಾಮೀಣ ಕೃಷಿ ಸಹಕಾರ ಸಂಘದ ಮೂಲಕ ಗೊಳಸಂಗಿ, ದುರ್ಗಾದೇವಿ ನಗರ ಮತ್ತು ಬುದ್ನಿ ಗ್ರಾಮ ಸೇರಿ 718 ಎಪಿಎಲ್ ಕಾರ್ಡುದಾರರನ್ನು ಹೊರತುಪಡಿಸಿ 170 ಅಂತ್ಯೋದಯ, 1518 ಪಿಬಿಎಲ್ ಕಾರ್ಡುದಾರರು ಪ್ರತಿ ತಿಂಗಳು ಪಡಿತರ ಧಾನ್ಯ ಪಡೆಯುತ್ತಿದ್ದಾರೆ.

ತಿಂಗಳಿಗೊಮ್ಮೆ ಇಲ್ಲಿ ಪಡಿತರ ಧಾನ್ಯಕ್ಕಾಗಿ ಚೀಟಿ ಪಡೆಯಲು ಹರಸಾಹಸ ಪಡಬೇಕಾಗಿದೆ. ಪಡಿತರ ಚೀಟಿ ಮಾಡಲು ಅಗತ್ಯವಿರುವ ಸರ್ವರ್ ಯಾವಾಗ ಇರುವುದೋ, ಮತ್ಯಾವಾಗ ಮಾಯವಾಗುವುದೋ ಎಂಬುದು ತಿಳಿಯದೆ ಜನತೆ ನ್ಯಾಯ ಬೆಲೆ ಅಂಗಡಿಗೆ ಅಲೆದಾಡಿ ಸುಸ್ತಾಗುತ್ತಿದ್ದಾರೆ.

ಪಡಿತರರಿಗೆ ಇದು ನುಂಗಲಾಗದ ಬಿಸಿತುಪ್ಪವಾಗಿ ಪರಿಣಮಿಸಿದೆ. ಒಂದು ದಿನದ ದುಡಿಮೆ ಬಿಟ್ಟಾದರೂ ಸರಿ ಪಡಿತರ ತೆಗೆದುಕೊಂಡು ಹೋಗಲೇಬೇಕು ಎಂದುಕೊಂಡರೂ ಸಾಧ್ಯವಾಗುತ್ತಿಲ್ಲ. ಸರ್ವರ್ ಸಮಸ್ಯೆ ಬಗೆಹರಿಯದಿರುವು ವಿಪರ್ಯಾಸ.