ಜಗದ ಗಮನ ಸೆಳೆದ 'ಮಣಿಪಾಲ ಮೆರಾಥಾನ್'...

Published on:

09 Feb 2025, 10:24 am

ಮಾಹೆ ಆಯೋಜಿತ 7ನೇ ಆವೃತ್ತಿಯ ಸ್ಪರ್ಧೆ

20 ಸಾವಿರಕ್ಕೂ ಅಧಿಕ ಓಟಗಾರರು ಭಾಗಿ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಮಣಿಪಾಲ ಅಕಾಡೆಮಿ ಆಫ್ ಹೈಯರ್ ಎಜುಕೇಶನ್ (ಮಾಹೆ)ನ ವಿದ್ಯಾರ್ಥಿಗಳಿಗಾಗಿ ಗ್ರೀನ್ಸ್ ಮಣಿಪಾಲದಲ್ಲಿ ಭಾನುವಾರ ನಸುಕಿನ 4:30ಕ್ಕೆ ಆಯೋಜಿಸಿದ್ದ 'ಮಣಿಪಾಲ ಮೆರಾಥಾನ್' ಕಾರ್ಯಕ್ರಮ ಭಾರತದ ಅತಿದೊಡ್ಡ ಓಟವಾಗಿ ದಾಖಲಾಯಿತು.

ಈ ವರ್ಷದ 7ನೇ ಆವೃತ್ತಿಯಾಗಿ ಚಲನೆಯಲ್ಲಿ ನಾವೀನ್ಯತೆ: ಆರೋಗ್ಯ ಮತ್ತು ಸದೃಢತೆಗಾಗಿ ತಂತ್ರಜ್ಞಾನ ಅಳವಡಿಸಿಕೊಳ್ಳುವಿಕೆ ಎಂಬ ಘೋಷವಾಕ್ಯದೊಂದಿಗೆ ಮೆರಾಥಾನ್ ನಡೆದಿದ್ದು, 20 ಸಾವಿರಕ್ಕೂ ಹೆಚ್ಚು ಓಟಗಾರರು ಪಾಲ್ಗೊಂಡಿದ್ದರು. 'ಮಣಿಪಾಲ್ ಗ್ಲೋಬಲ್ ವರ್ಚುಯಲ್ 5ಕೆ ರನ್' ಸೇರ್ಪಡೆಯಿಂದಾಗಿ ವಿಶ್ವಾದ್ಯಂತ 7 ಸಾವಿರಕ್ಕೂ ಅಧಿಕ ಓಟಗಾರರು ವರ್ಚುಯಲ್ ಮೂಲಕ ಸ್ಪರ್ಧೆಯಲ್ಲಿ ಭಾಗವಹಿಸಿದ್ದು ವಿಶೇಷವಾಗಿತ್ತು.

ಮೆರಾಥಾನ್ಗೆ ಚಾಲನೆ

ಐಸಿಐಸಿಐ ಬ್ಯಾಂಕ್ನ ಕರ್ನಾಟಕ ವಲಯ ಮುಖ್ಯಸ್ಥ ಶಶಿಕುಮಾರ್ ನಾಯಕ್ (42 ಕಿಮೀ), ಎಸ್ಬಿಐನ ಉಪ ಪ್ರಧಾನ ವ್ಯವಸ್ಥಾಪಕ ಅಲೋಕಕುಮಾರ್ ದ್ವಿವೇದಿ (21 ಕಿಮೀ), ಯುನೆಕ್ಸ್ಟ್ ಲರ್ನಿಂಗ್ನ ಮುಖ್ಯಸ್ಥ ಅಂಬರೀಷ್ ಸಿನ್ಹಾ (10 ಕಿಮೀ), ಬಾಬ್ಕಾರ್ಡ್ ಲಿಮಿಟೆಡ್ನ ಸಿಇಒ ರವೀಂದ್ರ ರೈ (5 ಕಿಮೀ) ಓಟಗಳಿಗೆ ಚಾಲನೆ ನೀಡಿದರು.

ಉಡುಪಿ ಶಾಸಕ ಯಶ್ಪಾಲ್ ಸುವರ್ಣ, ಕಾಪು ಶಾಸಕ ಗುರ್ಮೆ ಸುರೇಶ್ ಶೆಟ್ಟಿ, ಉಡುಪಿ ಜಿಲ್ಲಾಧಿಕಾರಿ ಡಾ. ಕೆ.ವಿದ್ಯಾಕುಮಾರಿ, ಮಾಹೆ ಟ್ರಸ್ಟ್ನ ಅಧ್ಯಕ್ಷ ಡಾ. ರಂಜನ್ ಪೈ, ಮಾಹೆಯ ಪ್ರೊ-ಚಾನ್ಸೆಲರ್ ಡಾ. ಎಚ್.ಎಸ್. ಬಲ್ಲಾಳ್, ಮಾಹೆಯ ವೈಸ್-ಚಾನ್ಸೆಲರ್ ವಿಎಸ್ಎಂ (ನಿವೃತ್ತ) ಲೆಫ್ಟಿನೆಂಟ್ ಜನರಲ್ (ಡಾ.) ಎಂ.ಡಿ. ವೆಂಕಟೇಶ್ ಹಾಗೂ ವಿವಿಯ ಅಧಿಕಾರಿಗಳು, ಜಿಲ್ಲೆಯ ವಿವಿಧ ಗಣ್ಯರು ಪಾಲ್ಗೊಂಡಿದ್ದರು.

ಅಂಗವಿಕಲರು, ಅಂಧರಿಂದಲೂ ಓಟ!

ಅಮೆರಿಕ, ಫ್ರಾನ್ಸ್, ಜರ್ಮನಿ, ಇಂಗ್ಲಂಡ್, ಟರ್ಕಿ, ಇಥಿಯೋಪಿಯಾ, ಕೀನ್ಯಾ, ನಮೀಬಿಯಾ, ಜಪಾನ್, ಉಗಾಂಡಾ, ಮಲಾವಿ, ಕಾಂಗೋ, ಘಾನಾ, ಸುಡಾನ್, ಅಬುಧಾಬಿ ಯುಎಇ ಮತ್ತು ಆಸ್ಟ್ರೆಲಿಯಾ ದೇಶಗಳಿಂದ 100ಕ್ಕೂ ಅಧಿಕ ಅಂತಾರಾಷ್ಟ್ರೀಯ ಕ್ರೀಡಾಪಟುಗಳು ಭಾಗವಹಿಸಿದ್ದರು. ಸಮರ್ಥನಂ ಟ್ರಸ್ಟ್ ಮತ್ತು ಗಂಗಾ ಫೌಂಡೇಷನ್ನ ಸಹಯೋಗದೊಂದಿಗೆ ಭಾರತದಾದ್ಯಂತ 300ಕ್ಕೂ ಅಧಿಕ ಅಂಧರು, 200ಕ್ಕೂ ಅಧಿಕ ಅಂಗವಿಕಲರೂ ಸಹ ಸ್ಪರ್ಧಿಸಿದ್ದರು.

ಮಣಿಪಾಲ ಮೆರಾಥಾನ್ ಕೇವಲ ಓಟವಲ್ಲ. ಇದು ಚಲನೆಯಲ್ಲಿ ಸ್ಥಿತಿಸ್ಥಾಪಕತ್ವ, ನಾವೀನ್ಯ ಮತ್ತು ಸಮುದಾಯ ಮನೋಭಾವದ ಆಚರಣೆಯಾಗಿದೆ. ಈ ವರ್ಷದ ಘೋಷಣೆಯಂತೆ ಎಲ್ಲರ ಯೋಗಕ್ಷೇಮ ಮತ್ತು ದೈಹಿಕ ಸದೃಢತೆ ಉತ್ತೇಜಿಸಲು ಜಾಗತಿಕ ಮಟ್ಟದಲ್ಲಿ ಈ ಓಟ ಆಯೋಜಿಸಲಾಗಿದೆ. | ಡಾ. ಎಚ್. ಎಸ್. ಬಲ್ಲಾಳ್. ಮಣಿಪಾಲ ಮಾಹೆಯ ಪ್ರೊ-ಚಾನ್ಸೆಲರ್. ತಂತ್ರಜ್ಞಾನವೂ ಸಹ ನಮ್ಮ ದೈಹಿಕ ಸದೃಢತೆಯನ್ನು ಮರುರೂಪಿಸಿ ಸಾಧಿಸುವ ವಿಧಾನವಾಗಿದೆ. ಈ ಬಾರಿ 'ಮಣಿಪಾಲ ಮೆರಾಥಾನ್'ನಲ್ಲಿ ವಿಶ್ವಾದ್ಯಂತ ಓಟಗಾರರು ತೊಡಗಿಸಿಕೊಂಡಿದ್ದು ಮಹತ್ತರ ಸಾಧನೆಯಾಗಿದೆ. ಇದು ಆರೋಗ್ಯಕರ ಭವಿಷ್ಯ ಉತ್ತೇಜಿಸುವಲ್ಲಿ ಡಿಜಿಟಲ್ ರೂಪಾಂತರದ ಶಕ್ತಿಯನ್ನು ಎತ್ತಿ ತೋರಿಸುತ್ತದೆ. | (ಡಾ.) ಎಂ. ಡಿ. ವೆಂಕಟೇಶ್. ಮಣಿಪಾಲ ಮಾಹೆಯ ವೈಸ್ ಚಾನ್ಸೆಲರ್

ಸಚಿನ್ ಪೂಜಾರಿ, ಲೆಶಾರ್ಜ್ ಕೆಫೆಲೆಗನ್ ಪ್ರಥಮ

ಪೂರ್ಣ ಮೆರಾಥಾನ್ (42 ಕಿಮೀ)ನ ಪುರುಷರ ವಿಭಾಗದಲ್ಲಿ ಸಚಿನ್ ಪೂಜಾರಿ (ಪ್ರ), ನಂಜುಂಡಪ್ಪ ಎಂ. (ದ್ವಿ), ಚೆರುಯೋಟ್ ಡ್ಯಾನಿಯಲ್ (ತೃ). ಮಹಿಳೆಯರ ವಿಭಾಗದಲ್ಲಿ ಲೆಶಾರ್ಜ್ ಸೇನೈಟ್ ಕೆಫೆಲೆಗನ್ (ಪ್ರ), ಆಸಾ ಟಿಪಿ (ದ್ವಿ), ಶಕುಂತಲಾದೇವಿ (ತೃ).ಅರ್ಧ ಮೆರಾಥಾನ್ (21 ಕಿಮೀ)ನ ಪುರುಷರ ವಿಭಾಗದಲ್ಲಿ ಅಂಕುಶ್ ಹಕ್ಕೆ (ಪ್ರ), ಕಿಪ್ಟೂ ಅಬ್ರಹಾಂ (ದ್ವಿ), ಶಿವಮ್ ಯಾದವ್ (ತೃ). ಮಹಿಳೆಯರ ವಿಭಾಗದಲ್ಲಿ ಕೆ.ಎಂ. ಲಕ್ಷ್ಮೀ (ಪ್ರ), ನಂದಿನಿ ಜಿ. (ದ್ವಿ), ಮೋಲ್ಲೇಶ್ವರಿ (ತೃ).ಸಮಯದ ಓಟ (10 ಕಿಮೀ) ಪುರುಷರ ವಿಭಾಗ: ಲವ್ ಚೌಧರಿ (ಪ್ರ), ಎ.ಆರ್. ರೋಹಿತ್ (ದ್ವಿ), ಅಂಕಿತ್ ಇಂಡೋಲಿಯಾ (ತೃ). ಮಹಿಳಾ ವಿಭಾಗ: ಸ್ಮಿತಾ ಡಿ.ಆರ್. (ಪ್ರ), ನೀತುಕುಮಾರಿ (ದ್ವಿ), ಶ್ರೇಯಾ ಎಂ. (ತೃ). ಪ್ರಥಮ 1 ಲಕ್ಷ ರೂ. ದ್ವಿತೀಯ 75 ಸಾವಿರ ರೂ. ಹಾಗೂ ತೃತೀಯ 50 ಸಾವಿರ ರೂ. ನಗದು ಬಹುಮಾನ ನೀಡಲಾಯಿತು.

Udupi