ರಾಜ್ಯದಲ್ಲಿ ಜಿಬಿಎ ಜತೆಗೆ ಹತ್ತು ಮಹಾನಗರ ಪಾಲಿಕೆಗಳು ಅಸ್ತಿತ್ವದಲ್ಲಿವೆ. ಇವುಗಳಲ್ಲಿ ಸುಮಾರು 40 ಸಾವಿರ ಕಾಯಂ ಪೌರಕಾರ್ಮಿಕರು ಹಾಗೂ 60 ಸಾವಿರದಷ್ಟು ಗುತ್ತಿಗೆ ಕಾರ್ಮಿಕರಿದ್ದಾರೆ. ಅಂದರೆ, ನಗರಗಳಲ್ಲಿ ಲಕ್ಷ ಕಾರ್ಮಿಕರು ಶುಚಿ ಕಾರ್ಯದಲ್ಲಿ ನಿರತರಾಗಿದ್ದರೂ, ಈ ವರ್ಗದ ಜನರಿಗೆ ಸಿಗಬೇಕಾದ ಸೌಲಭ್ಯಗಳು ಮರಿಚಿಕೆಯಾಗಿದೆ. ಪೌರಕಾರ್ಮಿಕರು ಕೈಗವಸು, ಗಮ್ ಬೂತ್, ಮಾಸ್ಕ್ ಹಾಗೂ ಇತರ ಪರಿಕರಗಳಿಲ್ಲದೆ ಕರ್ತವ್ಯ ನಿಭಾಯಿಸಬೇಕಿದೆ. ರಜೆ ಇಲ್ಲದೆ ಕೆಲಸ ಮಾಡುತ್ತಿದ್ದರೂ, ಮೇಲ್ವಿಚಾರಕರು, ಅಧಿಕಾರಿಗಳ ಬೈಗುಳ ಮಾತ್ರ ನಿತ್ಯವೂ ಬೋನಸ್ ರೀತಿ ಸಿಗುತ್ತಿರುತ್ತದೆ. ಮಹಿಳಾ ಪೌರಕಾರ್ಮಿಕರಿಗೆ ತಿಂಗಳಿಗೊಮ್ಮೆ ರಜೆ ನೀಡದೆ ದುಡಿಸಿಕೊಳ್ಳಲಾಗುತ್ತಿದೆ. ಆರೋಗ್ಯ ಸೌಲಭ್ಯ, ವಿಮೆ, ಪಿಂಚಣಿ ಇಲ್ಲದೆ ಕೆಲಸ ನಿರ್ವಹಿಸಿ ನಿವೃತ್ತಿರಾಗಬೇಕಾದ ಸ್ಥಿತಿ ಇದೆ.
