ಬಳ್ಳಾರಿಯ ವಿಮ್ಸ್, ಮೈಸೂರಿನ ಕೆ.ಆರ್.ಆಸ್ಪತ್ರೆ, ಬೀದರ್ ಮೆಡಿಕಲ್ ಕಾಲೇಜು, ಹುಬ್ಬಳ್ಳಿ ಮೆಡಿಕಲ್ ಕಾಲೇಜು, ಬೆಂಗಳೂರು ವೈದ್ಯಕಿಯ ಕಾಲೇಜು ಸೇರಿ ಹೊಸದಾಗಿ ಆರಂಭವಾಗಿರುವ ಮೆಡಿಕಲ್ ಕಾಲೇಜು, ಆಸ್ಪತ್ರೆಗಳು ಕೆಟಿಪಿಪಿ ಕಾಯ್ದೆ ಬದಲು ನಿಯಮಬಾಹಿರವಾಗಿ ಕೋಟೋಷನ್ ಮೂಲಕ ಹತ್ತಾರು ಕೋಟಿ ರೂ.ವೆಚ್ಚದಲ್ಲಿ ವಿವಿಧ ಔಷಧ, ಉಪಕರಣ ಖರೀದಿಸುತ್ತಿವೆ. ತುರ್ತು ಪರಿಸ್ಥಿತಿಯಲ್ಲಿ ಅತಿ ಅವಶ್ಯಕತೆ ಇದ್ದಾಗ, ಸತತವಾಗಿ ಟೆಂಡರ್ ವಿಳಂಬವಾದರೆ ಕೋಟೇಷನ್ ಮೂಲಕ ಒಂದು ಲಕ್ಷ ರೂ.ಒಳಗಿನ ಔಷಧ ಖರೀದಿಸಲು ಅವಕಾಶವಿದೆ. ಟೆಂಡರ್ ಮೌಲ್ಯ ಒಂದು ಲಕ್ಷ ರೂ. ದಾಟಿದರೆ ಕೆಟಿಪಿಪಿ ಕಾಯ್ದೆಯಂತೆ ಆನ್ಲೈನ್ನಲ್ಲಿ ಟೆಂಡರ್ ನಡೆಸಿ ಅತಿ ಕಡಿಮೆ ಮೊತ್ತಕ್ಕೆ ಬಿಡ್ ಸಲ್ಲಿಸಿದವರಿಗೆ ಕಾರ್ಯಾದೇಶ ಪತ್ರ ನೀಡಬೇಕು. ಆದರೆ, ಹಲವು ವೈದ್ಯಕಿಯ ಮಹಾವಿದ್ಯಾಲಯ ಮತ್ತು ಸಂಶೋಧನಾ ಸಂಸ್ಥೆಗಳು, ಕೆಟಿಟಿಪಿ ನಿಯಮ ಪಾಲಿಸದೆ ಕಮಿಷನ್ ಆಸೆಗಾಗಿ ಅರ್ಹತೆ ಇಲ್ಲದ ಕಂಪನಿಗಳಿಗೆ ಕಾರ್ಯಾದೇಶ ಪತ್ರ ನೀಡುತ್ತಿರುವ ಬಗ್ಗೆ ಗಂಭೀರ ಆರೋಪಗಳಿವೆ.
