ನಿಲ್ಲದ ಮಳೆ ಕೊಳೆಯುತ್ತಿದೆ ಬೆಳೆ

ಶಿಗ್ಗಾಂವಿ: ಕಳೆದ ವರ್ಷದ ಅತಿವೃಷ್ಟಿ ಹಾಗೂ ನೆರೆಯಿಂದಾಗಿ ಬೆಳೆ ಹಾನಿಗೀಡಾದ ಕಹಿ ನೆನಪು ಮಾಸುವ ಮುನ್ನವೇ ಈ ಬಾರಿಯ ಮುಂಗಾರಿನ ವರ್ಷಧಾರೆಯೂ ರೈತರನ್ನು ಬೆಳೆ ನಷ್ಟದ ಸಂಕಷ್ಟಕ್ಕೆ ಸಿಲುಕಿಸಿದೆ.

ಈ ವರ್ಷ ಅವಧಿಗೂ ಮುನ್ನವೇ ಸುರಿದ ಮುಂಗಾರು ಮಳೆಯಿಂದ ರೈತರು ಹದವರ್ತಿ ಬಿತ್ತನೆ ಮಾಡಿದ್ದಾರೆ. ಬಿತ್ತನೆ ಮಾಡಿದ ಎರಡ್ಮೂರು ವಾರದ ಬೆಳೆಗಳಿಗೆ ಅತಿಯಾದ ಜಡಿ ಮಳೆಯಿಂದ ಕೀಟ ಬಾಧೆ ವಕ್ಕರಿಸಿದೆ. ಅಲ್ಲದೆ, ಭೂಮಿಯು ಜವಳುಗಟ್ಟಿದ್ದರಿಂದ ತೇವಾಂಶ ಹೆಚ್ಚಾಗಿ ಪಕಳೆ ಬಿಟ್ಟ ಬೆಳೆಗಳೆಲ್ಲ ಕಂದು ಬಣ್ಣಕ್ಕೆ ತಿರುಗುತ್ತಿದೆ. ಇದು ರೈತ ಸಮುದಾಯವನ್ನೇ ಮತ್ತಷ್ಟು ಕಂಗಾಲಾಗಿಸಿದೆ.

ಪ್ರಸಕ್ತ ವರ್ಷದ ಮುಂಗಾರು ಬಿತ್ತನೆ ಉತ್ತಮವಾಗಿತ್ತು. ಬಂಪರ್ ಬೆಳೆ ನಿರೀಕ್ಷೆಯಲ್ಲಿದ್ದ ರೈತರಿಗೆ ಭೂಮಿಯಲ್ಲಿ ತೇವಾಂಶ ಹೆಚ್ಚಾಗಿದ್ದರಿಂದ ಬೆಳೆಗಳೆಲ್ಲ ಕಳಾಹೀನವಾಗಿ ಸ್ಥಿತಿಯಲ್ಲಿದ್ದು, ಕೆಂಬಣ್ಣಕ್ಕೆ ತಿರುಗಿವೆ. ಬಿಟ್ಟು ಬಿಡದೇ ಸುರಿಯುತ್ತಿರುವ ಮಳೆಯಿಂದಾಗಿ ಶಿಗ್ಗಾಂವಿ ಮತ್ತು ಬಂಕಾಪುರ ಹೋಬಳಿ ವ್ಯಾಪ್ತಿಯಲ್ಲಿ ಶೇಂಗಾ, ಸೋಯಾಬೀನ್ ಬೆಳೆಗೆ ಕೀಟಬಾಧೆ ಕಾಣಿಸಿಕೊಂಡಿದೆ. ಎಲೆ ಸುರುಳಿ ರೋಗ ಅಲ್ಲಲ್ಲಿ ಕಂಡು ಬಂದಿದೆ.

ದುಂಡಸಿ ಹೋಬಳಿ ವ್ಯಾಪ್ತಿಯಲ್ಲಿ ಬಿತ್ತನೆ ಮಾಡಿದ ಮೆಕ್ಕೆಜೋಳ ಬೆಳೆ ಸಂಪೂರ್ಣವಾಗಿ ಹಳದಿ ಬಣ್ಣಕ್ಕೆ ತಿರುಗಿದ್ದು, ರೈತರು ಮರುಗುತ್ತಿದ್ದಾರೆ. ತಾಲೂಕಿನಲ್ಲಿ ಪ್ರಸ್ತುತ ಮುಂಗಾರು ಹಂಗಾಮಿನ ಜೂನ್ ತಿಂಗಳಲ್ಲಿ ಈವರೆಗೆ 201.8 ಎಂ.ಎಂ. ವಾಡಿಕೆ ಮಳೆಗಿಂತ 262.0 ಎಂ.ಎಂ. ಮಳೆಯಾಗುವ ಮೂಲಕ ಶೇ. 30ರಷ್ಟು ಹೆಚ್ಚಾಗಿದೆ. ತಾಲೂಕಿನಲ್ಲಿ ಮೆಕ್ಕೆಜೋಳ, ಶೇಂಗಾ, ಸೋಯಾಬೀನ್, ಭತ್ತ, ಹೆಸರು ಬೆಳೆಗಳು ಬೆಳವಣಿಗೆ ಹಂತದಲ್ಲಿವೆ.

ಹವಾಮಾನ ಇಲಾಖೆಯ ವರದಿಯಂತೆ ಮುಂದೆಯೂ ಹೆಚ್ಚಿನ ಮಳೆಯಾಗುವ ಸಾಧ್ಯತೆ ಇದೆ. ರೈತರು ತ್ವರಿತವಾಗಿ ಹೊಲಗಳಲ್ಲಿ ನಿಲ್ಲುವ ಮಳೆ ನೀರನ್ನು ಬಸಿ ಕಾಲುವೆಗಳಿಂದ ಬಸಿದು ಹೋಗುವಂತೆ ಕ್ರಮ ವಹಿಸಬೇಕು ಎಂದು ಕೃಷಿ ಇಲಾಖೆ ರೈತರಿಗೆ ತಿಳಿವಳಿಕೆ ನೀಡಿದೆ.