ವಿಜಯವಾಣಿ ಸುದ್ದಿಜಾಲ ಧಾರವಾಡ
ಕೆನರಾ ಬ್ಯಾಂಕ್ ಇಂದು ಇಷ್ಟೊಂದು ಪ್ರಸಿದ್ಧಿ, ಸುರಕ್ಷತೆಗೆ ಹೆಸರಾಗಲು ನಮಗಿಂತ ಮೊದಲು ಕೆಲಸ ಮಾಡಿ ಭದ್ರ ಅಡಿಪಾಯ ಹಾಕಿದ ಹಿರಿಯರು ಕಾರಣ. ಅವರ ಪರಿಶ್ರಮ, ಶ್ರದ್ಧೆ, ತ್ಯಾಗ, ವಿನಯ ಪೂರ್ಣ ಸೇವೆಯಿಂದ ಬ್ಯಾಂಕ್ ರಾಷ್ಟ್ರದ ಮುಂಚೂಣಿಯಲ್ಲಿ ತನ್ನ ಸ್ಥಾನ ಉಳಿಸಿಕೊಳ್ಳಲು ಸಾಧ್ಯವಾಗಿದೆ ಎಂದು ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ಅಧ್ಯಕ್ಷ ಶ್ರೀಕಾಂತ ಭಂಡಿವಾಡ ಹೇಳಿದರು.
ನಗರದ ಆಲೂರು ವೆಂಕಟರಾವ್ ಭವನದಲ್ಲಿ ಇತ್ತೀಚೆಗೆ ಏರ್ಪಡಿಸಿದ್ದ ಕೆನರಾ ಬ್ಯಾಂಕ್ ನಿವೃತ್ತ ಅಧಿಕಾರಿಗಳ ಸಂಘದ ಸದಸ್ಯರ ಹಾಗೂ ಸಹ ಸದಸ್ಯರ ಸಭೆಯಲ್ಲಿ ಅವರು ಮಾತನಾಡಿದರು.
ನಿವೃತ್ತರು ತಮ್ಮ ಆರೋಗ್ಯ ಕಾಪಾಡಿಕೊಳ್ಳುವುದರ ಜತೆಗೆ ಸಾಧ್ಯವಾದಷ್ಟು ಸಾಮಾಜಿಕ ಸೇವೆಯಲ್ಲಿ ತೊಡಗಿ ಯುವಕರಿಗೆ ಮಾರ್ಗದರ್ಶನ ಮಾಡಬೇಕು ಎಂದರು.
ಕೆನರಾ ಬ್ಯಾಂಕ್ ಪ್ರಾದೇಶಿಕ ಕಚೇರಿ ಉಪ ಮಹಾ ಪ್ರಬಂಧಕ ಸಾಜಲ್ ಸಮೀರ ಮಾತನಾಡಿ, ಕೆನೆರಾ ಬ್ಯಾಂಕ್ ದೊಡ್ಡ ಸಂಸ್ಥೆಯಾಗಿ ಬೆಳೆಯುವಲ್ಲಿ ಹಿಂದೆ ದುಡಿದು ಭದ್ರ ಬುನಾದಿ ಹಾಕಿದ ಹಿರಿಯರ ಶ್ರಮ ದಾಖಲಿಸುವಂತಹದು. ನಿವೃತ್ತರ ಯಾವುದೇ ಸಮಸ್ಯೆಗಳನ್ನು ತಮ್ಮ ಜತೆ ಹಂಚಿಕೊಂಡು ಪರಿಹರಿಸಿಕೊಳ್ಳಬೇಕು ಎಂದರು.
ಉದಯ ಮಹಾಲೆ, ವಿಲಾಸ ಮಹಾಲೆ, ಇತರರು ಇದ್ದರು. ನಿವೃತ್ತ ವಿಭಾಗೀಯ ಮ್ಯಾನೇಜರ್ ಕೆ.ಪಿ. ರಾವ್ ಅಧ್ಯಕ್ಷತೆ ವಹಿಸಿದ್ದರು. ನಿವೃತ್ತರ ಸಮಸ್ಯೆಗಳಾದ ಆರೋಗ್ಯ ವಿಮೆ, ಪಿಂಚಣಿ ಹೆಚ್ಚಳ, ಕುಟುಂಬ ಪಿಂಚಣಿ ಸೇರಿ ಇತರ ವಿಷಯಗಳ ಕುರಿತು ಜೆ.ಎಸ್.ಎಸ್ ಜಗದೀಶ, ಶಾಶ್ವತ ಸಲಹೆಗಾರ ಕೆ.ಬಿ. ಬಳ್ಳೂರ ಸದಸ್ಯರ ಜತೆ ಸಂವಾದ ನಡೆಸಿದರು. 75 ವರ್ಷಗಳನ್ನು ಪೂರ್ಣಗೊಳಿಸಿದ ನಿವೃತ್ತ ಅಧಿಕಾರಿಗಳಾದ ಸುರೇಶ ಕಾಮತ, ಜಿ.ಆರ್. ಮಳೇಕರ, ಅನಂತ ಥಿಟೆ, ಪ್ರಕಾಶ ಕುಲಕಣಿರ್, ಬಿ.ಎಂ. ಜೋಶಿ ಅವರಿಗೆ ಸನ್ಮಾನಿಸಲಾಯಿತು.
ಕಿಶೋರ ಮಾಡಲಗಿ ಸ್ವಾಗತಿಸಿದರು. ಗುರುನಾಥ ಇನಾಮದಾರ ನಿರೂಪಿಸಿದರು. ಮಾಲತೇಶ ಹುಬ್ಬಳ್ಳಿ ವಂದಿಸಿದರು.
