ಬಂಡೀಮಠ ಶಿವರಾಮ ಆಚಾರ್ಯ
ತಾಲೂಕು ಕೇಂದ್ರ ಬ್ರಹ್ಮಾವರ ರಾಷ್ಟ್ರೀಯ ಹೆದ್ದಾರಿ 66 ನಗರ ನಡುವೆ 7 ಸರ್ಕಾರಿ ವಸತಿಗೃಹಗಳು ಪಾಳುಬಿದ್ದು ಭೂತ ಬಂಗ್ಲೆಯಂತಾಗಿದ್ದು ಅನೈತಿಕ ಚಟುವಟಿಕೆಗಳ ತಾಣವಾಗಿ ಮಾರ್ಪಟ್ಟಿವೆ.
ಇಲ್ಲಿನ ಸಮುದಾಯ ಆರೋಗ್ಯ ಕೇಂದ್ರ, ಪಶು ಚಿಕಿತ್ಸಾಲಯದ ಬಳಿ 7 ಸರ್ಕಾರಿ ವಸತಿಗೃಹಗಳಿದ್ದು ಹಿಂದೆ ಅನೇಕ ವೈದ್ಯರು ಮತ್ತು ವಿವಧ ಸರ್ಕಾರಿ ಇಲಾಖೆಯ ಅಧಿಕಾರಿಗಳು, ಸಿಬ್ಬಂದಿ ಇಲ್ಲಿ ವಾಸವಾಗಿದ್ದರು. ಇದೀಗ ಕೆಲವು ವರ್ಷದಿಂದ ಪಾಳುಬಿದ್ದಿರುವ ಈ ಕಟ್ಟಡಗಳಿಗೆ ಗಿಡಬಳ್ಳಿಗಳು ಸುತ್ತಿಕೊಂಡು ಕೇಳುವವರೇ ಇಲ್ಲದಂತಾಗಿದೆ.
ಸಬ್ ರಿಜಿಸ್ಟ್ರಾರ್, ಸರ್ವೇ ಸೇರಿದಂತೆ ಹಲವಾರು ಸರ್ಕಾರಿ ಕಚೇರಿ ಹೊಂದಿರುವ ಬ್ರಹ್ಮಾವರ ತಾಲೂಕು ಆಡಳಿತ ಸೌಧಕ್ಕೆ ತಾಗಿಕೊಂಡು ಇರುವ ಒಂದು ಎಕರೆಯಷ್ಟು ಜಾಗದಲ್ಲಿ ಪಾಳುಬಿದ್ದ ವಸತಿಗೃಹಗಳು ನಿರುಪಯುಕ್ತವಾಗಿವೆ. ಈ ಕಟ್ಟಡಗಳಿಗೆ ಕಾಯಕಲ್ಪ ಒದಗಿಸಿ ಯಾವುದಾದರೂ ಇಲಾಖೆಗಳ ಕಚೇರಿ ಅಥವಾ ಹೊಸ ವಸತಿಗೃಹಗಳನ್ನು ನಿರ್ಮಾಣ ಮಾಡಬೇಕಿದೆ.
