ಏನಿದು ಸಂಧ್ಯಾ ಮಂಟಪ?: ಮಿರ್ಲೆ ಗ್ರಾಮದಲ್ಲಿ ಬಹುತೇಕ ಬ್ರಾಹ್ಮಣರು ವಾಸವಿರುವುದರಿಂದ ಇಲ್ಲಿನ ಪ್ರತಿ ಕುಟುಂಬ ಕಾವೇರಿ ನದಿಯಲ್ಲಿ ಸ್ನಾನ ಮುಗಿಸಿ ಪಕ್ಕದಲ್ಲಿರುವ ಅಗಸ್ತ್ಯೇಶ್ವರ ದೇವಸ್ಥಾನದಲ್ಲಿ ವಿಶೇಷ ಪೂಜೆ ಸಲ್ಲಿಸುವುದು ವಾಡಿಕೆ. ಭಕ್ತರಿಗೆ ಅನುಕೂಲವಾಗುವಂತೆ ಅಗಸ್ತ್ಯೇಶ್ವರ ದೇವಸ್ಥಾನದ ಬಳಿ ಮಿರ್ಲೆ ಜಮೀನ್ದಾರರಾಗಿದ್ದ ನಾಗಣ್ಣ ಅವರು ಸುಮಾರು 185 ವರ್ಷಗಳ ಹಿಂದೆ ಸಂಧ್ಯಾ ಮಂಟಪ ನಿರ್ಮಿಸಿದರು. ನಂತರ ಬಂದ ಋಷಿಮುನಿಗಳು ಮತ್ತು ಭಕ್ತರು ನದಿಯಲ್ಲಿ ಸ್ನಾನ ಮುಗಿಸಿ ಸಂಧ್ಯಾ ಮಂಟಪದಲ್ಲಿ ಈಶ್ವರನ ಧ್ಯಾನ ಮಾಡುತ್ತಿದ್ದರು. ಮಿರ್ಲೆ, ಗಂಧನಹಳ್ಳಿ, ಗಂಧನಹಳ್ಳಿ ಕೊಪ್ಪಲು, ಬೀಚನಹಳ್ಳಿ, ಬೀಚನಹಳ್ಳಿ ಕೊಪ್ಪಲು, ಹನಸೋಗೆ, ಚುಂಚನಕಟ್ಟೆ, ಹೊಸೂರು, ಸಾಲಿಗ್ರಾಮ, ಭೇರ್ಯ, ಹೊಸ ಅಗ್ರಹಾರ, ತಂದ್ರೆ ಗ್ರಾಮಸ್ಥರು ಇಂದಿಗೂ ಕೂಡ ತಮ್ಮ ಇಷ್ಟಾರ್ಥ ಸಿದ್ಧಿಗಾಗಿ ಪೂಜೆ ಸಲ್ಲಿಸುತ್ತಾರೆ.
