ಶಾಲೆ ಪಕ್ಕದಲ್ಲಿದ್ದ ಕುಲುಮೆ ಸ್ಥಳಾಂತರ

ಕೋಲಾರ: ಕಾರ್ಯ ನಿಮಿತ್ತ ಬುಧವಾರ ಶ್ರೀನಿವಾಸಪುರದಿಂದ ಕೋಲಾರಕ್ಕೆ ಬರುತ್ತಿದ್ದ ಜಿಲ್ಲಾಧಿಕಾರಿ ಎಂ.ಆರ್​.ರವಿ ಅವರು ಮಾರ್ಗಮಧ್ಯದ ಮುದವಾಡಿ ಗ್ರಾಮದ ಹಿರಿಯ ಪ್ರಾಥಮಿಕ ಶಾಲೆಗೆ ದಿಢೀರ್​ ಭೇಟಿ ನೀಡಿದ್ದರು. ಶಾಲೆ ಹಾಗೂ ಅಂಗನವಾಡಿ ನಡುವೆಯೇ ಕುಲುಮೆ ಶಬ್ದ ಮಕ್ಕಳಿಗೆ ಕಿರಿಕಿರಿ ಉಂಟಾಗುವುದನ್ನು ಕೇಳಿಸಿಕೊಂಡ ಜಿಲ್ಲಾಧಿಕಾರಿಗಳು ತಕ್ಷಣವೇ ಜಿಲ್ಲಾ ಪಂಚಾಯಿತಿ ಸಿಇಒ ಡಾ.ಪ್ರವಿಣ್​ ಬಾಗೇವಾಡಿ ಅವರನ್ನು ಸಂಪರ್ಕಿಸಿ ಕುಲುಮೆಯನ್ನು ಶಾಲೆಯಿಂದ ದೂರ ಬದಲಾಯಿಸುವಂತೆ ಸೂಚಿಸಿದರು.

ಆ ಕ್ಷಣಕ್ಕೆ ಸಿಇಒ ಅವರಿಂದ ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿಗೆ ಸೂಚನೆ ಬಂದ ಹಿನ್ನೆಲೆಯಲ್ಲಿ ಬುಧವಾರ ಸಂಜೆ ವೇಳೆಗೆ ಪಿಡಿಒ ಕುಲುಮೆ ಮಾಲೀಕನಿಗೆ ನೋಟೀಸ್​ ಜಾರಿ ಮಾಡಿ, ಕುಲುಮೆಯನ್ನು ಸ್ಥಳಾಂತರಿಸಿದ್ದಾರೆ. ಇದರಿಂದಾಗಿ ಪ್ರಶಾಂತವಾಗಿ ಮಕ್ಕಳು ಪಾಠ ಕೇಳುವಂತಾಗಿದ್ದು, ಜಿಲ್ಲಾಧಿಕಾರಿಗಳು ಮತ್ತು ಜಿಲ್ಲಾ ಪಂಚಾಯಿತಿ ಸಿಇಒ ಕೈಗೊಂಡ ಕ್ರಮವನ್ನು ಗ್ರಾಮಸ್ಥರು ಸ್ವಾಗತಿಸಿದ್ದಾರೆ.

ಕುಲುಮೆಯ ಶಬ್ದದ ಬಗ್ಗೆ ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋ ತುಣುಕುಗಳು ಹರಿದಾಡುತ್ತಿದ್ದು, ಚರ್ಚೆಗೆ ಗ್ರಾಸವಾಗಿತ್ತು.