ಹೋಳಿ ಹುಣ್ಣಿಮೆ ಸಂದರ್ಭದಲ್ಲಿ ಪಟ್ಟಣ ಹಾಗೂ ತಾಲೂಕು ಪ್ರದೇಶಗಳಲ್ಲಿ ಮಣ್ಣಿನ ಕಾಮರತಿ ಮೂರ್ತಿಗಳನ್ನು ಪ್ರತಿಷ್ಠಾಪಿಸಿ ಪೂಜಿಸುವ ಪರಂಪರೆಯಿದೆ. ಹೋಳಿ ಹಬ್ಬ ಇನ್ನೂ ಒಂದು ತಿಂಗಳ ಉಳಿದಿರುವಂತೆ ಮೂರ್ತಿ ತಯಾರಿಕೆ ಕಾರ್ಯ ಚುರುಕು ಪಡೆದುಕೊಳ್ಳುತ್ತದೆ. 1 ಅಡಿಯಿಂದ 4 ಅಡಿ ಎತ್ತರದ ಸಾಂಪ್ರದಾಯಿಕ ಕಾಮರತಿ ಮೂರ್ತಿಗಳಿಗೆ ಹಳದಿ, ಕೆಂಪು, ಹಸಿರು, ನೀಲಿ ಬಣ್ಣಗಳನ್ನು ಬಳಸಿ ಸುಂದರವಾಗಿ ಮಾಡಲಾಗುತ್ತದೆ. ಪಟ್ಟಣ ಮತ್ತು ಸುತ್ತಮುತ್ತಲಿನ ಗ್ರಾಮಗಳಿಂದಲೂ ಮೂರ್ತಿಗಳನ್ನು ತೆಗೆದುಕೊಂಡು ಹೋಗುತ್ತಾರೆ. ಈ ಮೂರ್ತಿಗಳ ಬೆಲೆ 500 ರೂ.ಗಳಿಂದ 2500 ರೂ.ಗಳ ವರೆಗೆ ಇರಲಿದೆ. ಈ ವರ್ಷಕ್ಕೆ ಸುಮಾರು 100ಕ್ಕೂ ಹೆಚ್ಚು ಮೂರ್ತಿಗಳನ್ನು ತಯಾರಿಸಲಾಗಿದ್ದು, ಅವುಗಳೆಲ್ಲವೂ ಮಾರಾಟವಾಗಲಿವೆ ಎನ್ನುತ್ತಾರೆ ಮೂರ್ತಿ ತಯಾರಕ ನಾಗೇಶ್ ಪುಂಡಲಿಕ ಕಪಟಕರ್.
