ತಾಲೂಕಿನ ತಿಪ್ಪಾಪೂರದಿಂದ ಬೆಣ್ಣಿಹಳ್ಳಿ ಸಮೀಪವಿರುವ ನವೋದಯ ಶಾಲೆಯವರೆಗೆ ರಸ್ತೆಗೆ ಡಾಂಬರೀಕರಣ ಮಾಡಲಾಗಿದೆ. ಆದರೆ, ನವೋದಯ ಶಾಲೆಯ ಭಾಗದಿಂದ ಬೆಣ್ಣಿಹಳ್ಳಿ-ಬೀಡನಾಳ ರಸ್ತೆವರೆಗೆ ಸುಮಾರು 200 ಮೀಟರ್ ರಸ್ತೆಯನ್ನು ಡಾಂಬರೀಕರಣ ಮಾಡದೇ ಹಾಗೆ ಬಿಡಲಾಗಿದೆ. 200 ಮೀಟರ್ ರಸ್ತೆಯ ನಡುವೆ ಕಲಕೇರಿ ಭಾಗದಿಂದ ಬರುವ ಹಿರೇಹಳ್ಳ ಇರುವುದರಿಂದ ಸದ್ಯ ಮಳೆಗಾಲ ಆರಂಭಗೊಂಡಿದ್ದರಿಂದಾಗಿ ಹಳ್ಳದಲ್ಲಿ ನೀರು ಹರಿಯಲು ಆರಂಭಿಸಿದೆ. ಇದರಿಂದ ಈ ರಸ್ತೆ ಮಾರ್ಗವಾಗಿ ರೈತರಿಗೆ ಹೊಲಗಳಿಗೆ ತೆರಳಲು ಸಾಧ್ಯವಾಗುತ್ತಿರಲಿಲ್ಲ. ಬಿತ್ತನೆ ಕಾರ್ಯ, ಹೊಲಗಳಲ್ಲಿನ ಮತ್ತಿತರ ಕೆಲಸಗಳಿಗೆ ಮತ್ತು ತಿಪ್ಪಾಪೂರ-ಬೆಣ್ಣಿಹಳ್ಳಿ ಮಾರ್ಗಕ್ಕೆ ಸಂಚರಿಸುವುದು ತೊಂದರೆಯಾಗುತ್ತಿತ್ತು. ಹೀಗಾಗಿ ಸ್ವತಃ ರೈತರೇ ಹಳ್ಳಕ್ಕೆ ಸಿಮೆಂಟ್ ಪೈಪ್ಗಳನ್ನು ಹಾಕಿ ತಮ್ಮ ಸ್ವಂತ ಖರ್ಚಿನಲ್ಲಿ ಜೆಸಿಬಿ, ಟ್ರ್ಯಾಕ್ಟರ್ಗಳ ಸಹಾಯದಿಂದ ಕಲ್ಲು, ಗರಸು ಹಾಕಿ ರಸ್ತೆಯನ್ನು ಸಮತಟ್ಟು ಮಾಡಿಕೊಂಡಿದ್ದಾರೆ.
