ಆರ್.ಕೃಷ್ಣ ಮೈಸೂರು
ಪ್ರತಿ ಬಾರಿಯೂ ಖಾಲಿ ಮಳಿಗೆಗಳ ಉದ್ಘಾಟನೆ ಎಂಬ ಅಪವಾದದಿಂದ ಈ ಬಾರಿ ದಸರಾ ವಸ್ತುಪ್ರದರ್ಶನ ಹೊರಬರಲಿದೆ. ಶೇ.75ಕ್ಕೂ ಹೆಚ್ಚು ಮಳಿಗೆಗಳು ದಸರಾ ಉದ್ಘಾಟನೆ ದಿನವೇ ಸಿದ್ಧವಿರುವಂತೆ ಅಗತ್ಯ ಕ್ರಮ ಕೈಗೊಳ್ಳಲಾಗುತ್ತಿದೆ. ಅಲ್ಲದೆ, ಹೆಚ್ಚು ಜನರನ್ನು ಆಕರ್ಷಿಸುವ ಸಲುವಾಗಿ ವಸ್ತುಪ್ರದರ್ಶನವನ್ನು ವೈವಿಧ್ಯಮಯಗೊಳಿಸುತ್ತಿರುವುದು ವಿಶೇಷವಾಗಿದೆ.
ಅ.15ರಂದು ವಸ್ತುಪ್ರದರ್ಶನ ಆರಂಭಗೊಂಡು ಸುಮಾರು 90 ದಿನ ಇರಲಿದೆ. ನಿತ್ಯ ಸುಮಾರು 30 ಸಾವಿರದಷ್ಟು ಜನರು ಆಗಮಿಸಲಿದ್ದು, ರಜೆ, ವಿಶೇಷ ದಿನಗಳಲ್ಲಿ ಇದರ ಪ್ರಮಾಣ ಇನ್ನೂ ಹೆಚ್ಚಾಗಲಿದೆ. ಜನರನ್ನು ಆಕರ್ಷಿಸಲು ನಾನಾ ಸಾಂಸ್ಕೃತಿಕ ಕಾರ್ಯಕ್ರಮ, ವಿಶೇಷ ಆಕರ್ಷಣೆಗಳು ಸಹ ಇರಲಿವೆ. ಎಂದಿನಂತೆ ‘ಎ’ ಬ್ಲಾಕ್ನಲ್ಲಿ ದಿನನಿತ್ಯದ ಅಗತ್ಯ ವಸ್ತುಗಳ ಪ್ರದರ್ಶನ, ಮಾರಾಟ ಇರಲಿದೆ. ‘ಬಿ’ ಬ್ಲಾಕ್ನಲ್ಲಿ ಸರ್ಕಾರದ ವಿವಿಧ ಯೋಜನೆಗಳನ್ನು ತಿಳಿಸಿಕೊಡುವ ಮಳಿಗೆಗಳು, ‘ಸಿ’ ಬ್ಲಾಕ್ನಲ್ಲಿ ಮಕ್ಕಳನ್ನು ರಂಜಿಸುವ ಅಮ್ಯೂಜ್ಮೆಂಟ್ ಪಾರ್ಕ್ ಇರಲಿದೆ.
ಮಳಿಗೆಗಳ ನಿರ್ಮಾಣ ಕಾರ್ಯ ಚುರುಕಿನಿಂದ ನಡೆಯುತ್ತಿದ್ದು, ದೀಪಾಲಂಕಾರ, ದುರಸ್ತಿ, ಶೌಚ ಸ್ವಚ್ಛತೆ ಸೇರಿದಂತೆ ಇನ್ನಿತರ ಮೂಲಸೌಲಭ್ಯ ಕಾಮಗಾರಿಗಳು ಅಂತಿಮ ಹಂತದಲ್ಲಿವೆ. ಮುಖ್ಯದ್ವಾರಕ್ಕೆ ಈಗಾಗಲೇ ಬಣ್ಣದ ಕೆಲಸ, ಫೌಂಟೇನ್, ಚರಂಡಿಗಳನ್ನು ಶುಚಿಗೊಳಿಸಲಾಗುತ್ತಿದೆ. ಪಾರ್ಕ್ಗಳನ್ನು ವಿನ್ಯಾಸಗೊಳಿಸುವ ಕಾರ್ಯ ನಡೆಯುತ್ತಿದೆ. ಅಮ್ಯೂಸ್ಮೆಂಟ್, ಫುಡ್ಕೋರ್ಟ್, ಸಂಗೀತ ಕಾರಂಜಿಗೆ ವಿದ್ಯುತ್ ಸಂಪರ್ಕ ಕಲ್ಪಿಸುವ ಕಾರ್ಯ ಚುರುಕುಗೊಂಡಿದೆ.
ಈ ಬಾರಿ ಮರಳು ಕಲಾಕೃತಿಗೆ ವಿಶೇಷ ರೂಪ ನೀಡಲು ಪ್ರಾಧಿಕಾರ ನಿರ್ಧರಿಸಿದೆ. ಸರ್ಕಾರದ ಐದು ಗ್ಯಾರಂಟಿಗಳನ್ನು ಮರಳು ಕಲಾಕೃತಿಯಲ್ಲಿ ರಚಿಸಲಾಗುತ್ತದೆ. ಅಲ್ಲದೆ, ದೇಶದ ಹೆಮ್ಮೆಯ ಚಂದ್ರಯಾನಕ್ಕೂ ಮರಳು ಸ್ಪರ್ಶ ಸಿಗಲಿದೆ. ಇದರೊಂದಿಗೆ ಗುತ್ತಿಗೆ ಪಡೆದವರು ಸಹ ಪ್ರತಿ ವರ್ಷದಂತೆ ಈ ಬಾರಿಯೂ ಅತ್ಯಾಕರ್ಷಕ ವಿನ್ಯಾಸ ರೂಪಿಸಲು ನಿರ್ಧರಿಸಿದ್ದಾರೆ.
ಲಗೇಜ್ ಇಡಲು ಕೊಠಡಿ
ಸರ್ಕಾರ ಮಹಿಳೆಯರಿಗೆ ಉಚಿತ ಬಸ್ ಪ್ರಯಾಣ ನೀಡಿರುವುದರಿಂದ ಈ ಬಾರಿ ವಸ್ತುಪ್ರದರ್ಶನಕ್ಕೆ ಹೆಚ್ಚಿನ ಸಂಖ್ಯೆಯಲ್ಲಿ ಮಹಿಳೆಯರು ಆಗಮಿಸುವ ನಿರೀಕ್ಷೆ ಇದೆ. ಹಾಗಾಗಿ ಮಹಿಳೆಯರು ಲಗೇಜ್ ಇಟ್ಟು ವಸ್ತುಪ್ರದರ್ಶನವನ್ನು ಆರಾಮವಾಗಿ ನೋಡಲು ಅನುಕೂಲವಾಗುವಂತೆ ಇದೇ ಪ್ರಥಮ ಬಾರಿಗೆ ಲಗೇಜ್ ಕೊಠಡಿ ಆರಂಭಿಸಲಾಗುತ್ತಿದೆ. ಪ್ರವೇಶ ದ್ವಾರದ ಮುಂಭಾಗ ಇದಕ್ಕಾಗಿ ಕೊಠಡಿಯನ್ನು ಪ್ರಾಧಿಕಾರ ಮೀಸಲಿಟ್ಟಿದೆ.
ನೆನಪು ಉಳಿಸಲು ‘ಸೆಲ್ಫಿ ಪಾಯಿಂಟ್’
ಸಾಮಾನ್ಯವಾಗಿ ಜನ ಸೇರುವ ಸ್ಥಳದಲ್ಲಿ ಫೋಟೋ ಕ್ರೇಜ್ ಹೆಚ್ಚಿರುತ್ತದೆ. ಹಾಗಾಗಿ, ಪ್ರಾಧಿಕಾರ ಈ ಬಾರಿ ಸೆಲ್ಫಿ ಪಾಯಿಂಟ್ ಮಾಡಲು ಮುಂದಾಗಿದ್ದು, ಈ ಮೂಲಕ ವಸ್ತುಪ್ರದರ್ಶನ ಭೇಟಿ ನೆನಪಾಗಿ ಉಳಿಸುವ ಪ್ರಯತ್ನ ನಡೆದಿದೆ.
