ಲಕ್ಷ್ಮೇಶ್ವರ: ತಾಲೂಕಿನ ಬಾಲೆಹೊಸೂರು ಗ್ರಾಮದ ಸಮೀಪದಲ್ಲಿನ ಕಿರುಸೇತುವೆ ಮಳೆಯಿಂದ ಕುಸಿದಿದ್ದು, ಈ ಮಾರ್ಗದ ಬಸ್ ಸಂಚಾರ ಸ್ಥಗಿತಗೊಂಡು ಜನರು ಪರದಾಡುವಂತಾಗಿದೆ.
15ರಿಂದ 20 ದಿನಗಳ ಹಿಂದೆಯೇ ಸೂರಣಗಿಯಿಂದ ಬಾಲೆಹೊಸೂರಿಗೆ ಸಂಪರ್ಕ ಕಲ್ಪಿಸುವ ಮಾರ್ಗಮಧ್ಯೆದ ಸೇತುವೆಯು ಕುಸಿದು ಅಪಾಯಕ್ಕೆ ಆಹ್ವಾನ ನೀಡುತ್ತಿತ್ತು. ಈ ಬಗ್ಗೆ ಸಂಬಂಧಪಟ್ಟ ಪಿಡಬ್ಲೃಡಿ ಇಲಾಖೆ ಅಧಿಕಾರಿಗಳ ಗಮನಕ್ಕೆ ತಂದರೂ ಯಾವುದೇ ಪ್ರಯೋಜನವಾಗಿಲ್ಲ. ಈಗ ಕಿರು ಸೇತುವೆ ಸಂಪೂರ್ಣ ಕುಸಿದು ವಾಹನ ಸಂಚಾರ ವ್ಯತ್ಯಯವಾಗಿದೆ. ಈ ದಾರಿಯಲ್ಲಿ ಬೈಕ್ ಮಾತ್ರ ಸಾಗಬಹುದಾಗಿದ್ದು, 4 ಚಕ್ರದ ವಾಹನ, ಚಕ್ಕಡಿ ಹಾದು ಹೋಗುವುದಿಲ್ಲ. ಇದರಿಂದ ಜನತೆ, ರೈತರು ಪರದಾಡುವಂತಾಗಿದೆ.
ಬಾಲೆಹೊಸೂರು, ಹಾಲಗಿ, ಮರೂಳ, ನೆಗಳೂರ, ಕೆರೆಕೊಪ್ಪ, ಮಾದಾಪುರ, ಮರಡೂರ ಸೇರಿ ಹಲವು ಗ್ರಾಮಗಳ ಜನರಿಗೆ ಸಮಸ್ಯೆಯಾಗಿದೆ. ಈ ಗ್ರಾಮಗಳವರು ನಿತ್ಯ ವ್ಯಾಪಾರ-ವಹಿವಾಟು, ಶಿಕ್ಷಣದ ಉದ್ದೇಶಕ್ಕಾಗಿ ಲಕ್ಷ್ಮೇಶ್ವರಕ್ಕೆ ಬರುತ್ತಾರೆ. ಬಸ್ ಸಂಚಾರ ಸ್ಥಗಿತದಿಂದ ಸುತ್ತುವರಿದು ಸಂಚರಿಸುವಂತಾಗಿದೆ. ಶಾಲಾ-ಕಾಲೇಜಿಗೆ ಹೋಗುವ ಮಕ್ಕಳಿಗೆ ಹೆಚ್ಚು ತೊಂದರೆ ಆಗಿದೆ. ಬೇರೆ ಊರಿಗೆ ಹೋಗುವವರನ್ನು ಸೂರಣಗಿಯಿಂದ ಬೈಕ್ ಮೂಲಕ ಕರೆದುಕೊಂಡು ಹೋಗಬೇಕಾಗಿದೆ ಎಂದು ಗ್ರಾಮದ ಸಿ.ಎಫ್. ಹಿರೇಮಠ ‘ವಿಜಯವಾಣಿ’ಗೆ ತಿಳಿದರು.
