ನಿಲ್ದಾಣದೊಳಗೆ ಬರುತ್ತಿಲ್ಲ ಬಸ್​

ನೊಣವಿನಕೆರೆ ರಸ್ತೆಯಲ್ಲೇ ಕಾಯಬೇಕಾಗಿದೆ ಪ್ರಯಾಣಿಕರು

ನೊಣವಿನಕೆರೆ: ತಿಪಟೂರು ತಾಲೂಕು ನೊಣವಿನಕೆರೆಯಲ್ಲಿ ಸರ್ಕಾರ ಲಕ್ಷಾಂತರ ಖರ್ಚು ಮಾಡಿ ಬಸ್​ ನಿಲ್ದಾಣ ನಿಮಾರ್ಣ ಮಾಡಿದರೂ ನಿಲ್ದಾಣದೊಳಗೆ ಬಸ್​ಗಳು ತೆರಳದೆ ನಿಲ್ದಾಣದ ಮುಂಭಾಗದ ವೈ.ಟಿ.ರಸ್ತೆಯಲ್ಲಿ ನಿಲ್ಲಿಸುತ್ತಿರುವುದರಿಂದ ರಸ್ತೆಯಲ್ಲಿ ಬಸ್​ಗಾಗಿ ಕಾಯುವ ಸ್ಥಿತಿ ನಿರ್ಮಾಣವಾಗಿದೆ.

ನೊಣವಿನಕೆರೆ ತಾಲೂಕಿನ ಪ್ರಮುಖ ಹೋಬಳಿ ಕೇಂದ್ರವಾಗಿದ್ದು, ಸುತ್ತಮುತ್ತಲ 30ಕ್ಕೂ ಹೆಚ್ಚು ಗ್ರಾಮೀಣ ಪ್ರದೇಶದ ಸಾರ್ವಜನಿಕರು ಹಾಗೂ ಶಾಲಾ, ಕಾಲೇಜು ವಿದ್ಯಾರ್ಥಿಗಳು ತುರುವೇಕೆರೆ ಮಾರ್ಗವಾಗಿ ಬೆಂಗಳೂರು, ಮೈಸೂರು ಮತ್ತು ತಿಪಟೂರು ಮಾರ್ಗವಾಗಿ ಶಿವಮೊಗ್ಗ, ಹಾಸನಕ್ಕೆ ತೆರಳುತ್ತಾರೆ. ಈ ಊರುಗಳಿಗೆ ಸಂಚರಿಸುವ ಬಸ್​ಗಳು ಬಸ್​ ನಿಲ್ದಾಣದ ಒಳಗೆ ಬಾರದ ಕಾರಣ ಜನರು ಬಿಸಿಲು, ಮಳೆ ಎನ್ನದೆ ರಸ್ತೆಯಲ್ಲಿ ಕಾಯುವಂತಾಗಿದೆ.

ಬಸ್​ ನಿಲ್ದಾಣವನ್ನು 2011ರಲ್ಲಿ ನಿರ್ಮಾಣ ಮಾಡಲಾಗಿದೆ. ಹೀಗೆ ನಿರ್ಮಾಣವಾದ ನಿಲ್ದಾಣ ಕೆಲವು ವರ್ಷಗಳಲ್ಲೇ ಸಾರ್ವಜನಿಕರ ಉಪಯೋಗಕ್ಕೆ ಬಾರದೆ ಅಕ್ರಮ ಚಟುವಟಿಕೆಗಳ ತಾಣವಾಗಿ ಮಾರ್ಪಟ್ಟಿತ್ತು. ಇದನ್ನು ಗಮನಿಸಿದ ವಿದ್ಯಾರ್ಥಿಗಳು ಹಾಗೂ ಸಾರ್ವಜನಿಕರು ರಸ್ತೆ ತಡೆನಡೆಸಿದಾಗ ಅಧಿಕಾರಿಗಳು ಸ್ಪಂದಿಸಿ ನಿಲ್ದಾಣದ ನಿರ್ವಹಣೆ ಹಾಗೂ ಸಂಚಾರ ನಿಯಂತ್ರಕರ ನಿಯೋಜನೆ ಮಾಡಿ ಬಸ್​ಗಳು ನಿಲ್ದಾಣದ ಒಳಗೆ ಹೋಗಿ ಬರುವುದು ವ್ಯವಸ್ಥಿತವಾಗಿ ನಡೆಯುತ್ತಿತ್ತು. ಇತ್ತೀಚೆಗೆ ಕೆಲವು ತಿಂಗಳಿಂದ ಸಂಚಾರ ನಿಯಂತ್ರಕರ ನಿಯೋಜನೆ ಇಲ್ಲದ ಕಾರಣ ರಸ್ತೆಯಲ್ಲಿ ನಿಲ್ಲಿಸಿ ಜನರನ್ನು ಹತ್ತಿಸಿಕೊಂಡು ಹೋಗುತ್ತಿರುವುದು ಸಮಸ್ಯೆಯಾಗಿದೆ.

ಬೆಳಗ್ಗೆ ವಿದ್ಯಾರ್ಥಿಗಳು, ನೌಕರರು ಕಾಯುತ್ತಿದ್ದರು ಕೆಲವು ಬಸ್​ಗಳು ನಿಲ್ಲಿಸದೆ ಹೋಗುವುದು ನಿತ್ಯ ನಡೆಯುತ್ತಿವೆ. ಈ ಬಗ್ಗೆ ಮನವಿ ಸಲ್ಲಿಸಿದರೂ ಸಂಬಂಧಪಟ್ಟ ಅಧಿಕಾರಿಗಳು ಸ್ಪಂದಿಸುತ್ತಿಲ್ಲ. ಬಸ್​ ತಡೆದು ಚಾಲಕ ಮತ್ತು ನಿರ್ವಾಕರನ್ನು ಕೇಳಿದರೆ ಉಡಾೆ ಉತ್ತರ ನೀಡುತ್ತಾರೆ. ನಿಲ್ದಾಣದಲ್ಲಿ ವೃದ್ಧರು, ರೋಗಿಗಳು, ಚಿಕ್ಕ ಮಕ್ಕಳು ಹಾಗೂ ಮಹಿಳೆಯರು ಕಾಯ್ದು ಕುಳಿತಿದ್ದರು ಒಳಗಡೆ ಬಾರದೆ ಹೋಗುವುದರಿಂದ ತೊದರೆಯಾಗಿದೆ. ವೈ.ಟಿ.ರಸ್ತೆಯಲ್ಲಿ ವಾಹನ ಸಂಚಾರ ಹೆಚ್ಚಾಗಿದ್ದು, ರಸ್ತೆದಾಟುವಾಗ ಅಪಘಾತಗಳು ಸಂಭವಿಸುತ್ತಿವೆ. ಸರ್ಕಾರ ನಿಲ್ದಾಣದಲ್ಲಿ ಒಬ್ಬ ಸಂಚಾರ ನಿಯಂತ್ರಕನ ನಿಯೋಜನೆ ಮಾಡಬೇಕು ಮತ್ತು ನಿಲ್ದಾಣದೊಳಗೆ ಬಸ್​ ಬರುವಂತೆ

ಸ್ಥಳಿಯ ಜನಪ್ರತಿನಿಧಿಗಳು ಹಾಗೂ ಅಧಿಕಾರಿಗಳು ಕ್ರಮ ಕೈಗೊಳ್ಳಬೇಕು ಎಂದು ಗ್ರಾಮಸ್ಥರು ಆಗ್ರಹಿಸಿದ್ದಾರೆ.